Hao Nao Iumi Savve Helpem Olketa wea Kam Long Memorial?
1. Wanem nambawan tok nao bae kamap long March 22, 2008?
1 Long March 22, 2008, staka million pipol evriwea long world bae herem wanfala nambawan tok. Olketa wea kam long Memorial bae herem wanfala tok wea storyim bigfala love bilong Jehovah taem hem givim ransom for olketa man. (John 3:16) Olketa bae lane abaotem Kingdom and hao Jehovah bae iusim datwan for duim evri samting wea hem promisim for disfala earth. (Matt. 6:9, 10) Olketa bae lukim love wea pipol bilong God garem, hao iumi waka tugeta, and wei wea iumi hapi for lukim olketa kam long Memorial.—Ps. 133:1.
2. Hao nao iumi savve helpem olketa Bible study wea kam long Memorial?
2 Olketa Bible Study: Samfala wea kam long Memorial, hem olketa wea iumi start for studyim Bible witim olketa no longtaem go nomoa. Tekem olketa hia for story witim olketa brata and sista. Talem olketa hao evri week iumi garem olketa meeting, and showim olketa difren ples long Kingdom Hall. Brata wea duim Memorial tok bae storyim samfala samting for strongim olketa hia for gohed fren gud witim Jehovah. Iu savve iusim samting wea hem storyim for strongim olketa Bible study hia.
3. Wanem nao iumi savve duim for strongim olketa inactive pablisa wea kam long Memorial?
3 Olketa Inactive Pablisa: Samfala wea kam long Memorial hem olketa inactive pablisa. Go lukim olketa and story gud witim olketa. No askem or talem samfala samting wea savve mekem olketa feel nogud. Bihaen day bilong Memorial, hem gud sapos olketa elder go lukim olketa inactive pablisa and mekhae long wei wea olketa kam long Memorial, and long naesfala wei askem olketa for kam long nextfala meeting bilong kongregeson.
4. Hao nao maet iumi wanwan savve helpem olketa narawan wea kam long Memorial?
4 Olketa Narawan: Samfala wea kam long Memorial maet hem olketa fren bilong iumi or samwan long famili wea iumi nao askem olketa for kam. Samfala narawan kam from olketa kasem datfala pepa wea iumi givimaot long taem bilong spesol waka. Sapos iu lukim samfala wea iu no luksavve long olketa, go story witim olketa and talem nem bilong iu and hao iu hapi for lukim olketa. Maet hem firstaem bilong olketa for kam long wanfala meeting bilong iumi. Taem iu story witim hem maet iu savve askem hem wea nao hem stap. Tu-thri day bihaen long Memorial, iu savve go story moa witim olketa and trae for startim Bible study.
5. Wanem nao iumi savve talem for startim Bible study?
5 Taem iu duim return visit, iu savve storyim datfala Memorial tok bifor iu showim Wanem Bible Teachim buk long hem. Brata wea duim Memorial tok bae readim Isaiah 65:21-23. Taem iu duim return visit, maet iu storyim datfala tok and talem hem olsem, “Mi laek for showim long iu samfala nara blessing wea bae kamap from ransom bilong Jesus.” Bihaen, showim page 4-5 bilong Wanem Bible Teachim buk. Or maet iu talem hem olsem, “Staka pipol laek for savve wanem taem nao profesi bilong Isaiah bae kamap tru.” Bihaen, showim paragraf 1-3 long chapter 9. Or maet iu storyim datfala Memorial tok, showim Wanem Bible Teachim buk, and showim hao for duim Bible study witim hem.
6. Taem iumi obeyim toktok bilong Jesus for rememberim dae bilong hem, hu nao iumi savve helpem?
6 Bae hem gud tumas sapos iumi wanwan trae for helpem olketa Bible study, olketa inactive pablisa, and olketa narawan wea kam long Memorial. (Luke 22:19) Tru tumas, Jehovah bae blessim eni samting wea iumi duim for mekem Kingdom waka for kamap big.