Lanem Pikinini Bilong Iu for Duim Waka Bilong God
1. Psalm 148:12, 13 strongim olketa Christian dadi and mami for duim wanem?
1 Jehovah invaetem olketa young wan for praisem hem. (Ps. 148:12, 13) So olketa Christian dadi and mami mas gohed lanem pikinini bilong olketa long olketa tru samting wea Bible teachim and olketa law bilong God. Dadi and mami lanem pikinini tu for preachim gud nius. Wanem nao dadi and mami duim for gohed lanem pikinini for preach?
2. Hao nao gudfala example bilong dadi and mami helpem pikinini bilong tufala?
2 Gudfala Example: Judge Gideon talem 300 man bilong hem: ‘Lane taem iufala luk followim mi.’ (Judg. 7:17) Olketa pikinini savve lane taem olketa lukluk and followim wanem dadi and mami duim. Wanfala dadi wea waka long naet, hem tekem olketa pikinini bilong hem long preaching waka taem hem kasem haos long Saturday morning nomata hem barava taed. Diswan showaot dadi hia lanem olketa pikinini bilong hem hao preaching waka hem main samting long laef bilong olketa. (Matt. 6:33) Waswe, olketa pikinini bilong iu lukim iu hapi for prea, readim Bible, ansa long olketa meeting, and duim preaching waka? Hem tru, diswan no minim iu bae duim olketa samting hia long perfect wei. Bat olketa pikinini bilong iu bae followim wanem iu lanem long olketa for worshipim Jehovah sapos olketa lukim wei wea iu duim best for worshipim hem.—Deut. 6:6, 7; Rom. 2:21, 22.
3. Olketa wanem spiritual goal nao dadi and mami helpem pikinini bilong olketa for markem and kasem?
3 Olketa Goal wea Pikinini Gohed for Kasem: Dadi and mami waka hard for lanem pikinini for wakabaot, toktok, werem kaleko seleva, and samfala nara samting. Taem pikinini hem big, dadi and mami markem olketa niufala goal for olketa kasem. Sapos dadi and mami insaed truth, tufala savve helpem pikinini for markem and kasem olketa spiritual goal fitim age and savve bilong pikinini. (1 Cor. 9:26) Waswe, iu lanem pikinini bilong iu for ansa long toktok bilong hemseleva and for redyim seleva tok bilong hem long Theocratic Ministry Skul? (Ps. 35:18) Waswe, iu lanem olketa for duim olketa difren part long preaching waka? Waswe, iu helpem pikinini for markem goal for baptaes and duim full taem service? Waswe, iu helpem olketa for associate witim olketa brata and sista wea hapi and wea bae encouragem olketa?—Prov. 13:20.
4. Hao nao olketa pikinini kasem gud samting from dadi and mami wea lanem olketa for duim waka bilong God taem olketa smol?
4 Man wea raetem Psalms sei: ‘O God, iu teachim mi from taem mi young yet, and kam kasem distaem mi gohed for tok abaotem olketa nambawan waka bilong iu.’ (Ps. 71:17) Start lanem pikinini bilong iu taem hem smol yet for duim waka bilong God. From iu start for helpem pikinini taem hem smol, datwan bae helpem hem for kasem gud samting taem hem big!—Prov. 22:6.