Iumi Tinghae Long Olketa Privilege wea Iumi Garem!
1 From start bilong olketa man, Jehovah givim olketa servant bilong hem plande difren kaen privilege. Hem givim olketa privilege long olketa man nomata wanem nao age bilong olketa, nomata sapos olketa man or woman, or wanem position olketa garem. (Luke 1:41, 42; Acts 7:46; Phil. 1:29) Olketa wanem privilege nao hem givim iumi distaem?
2 Samfala Long Olketa Privilege Hia: Iumi garem privilege for Jehovah hem teachim iumi. (Matt. 13:11, 15) Nara privilege wea iumi barava tinghae long hem, hem for praisem Jehovah long wei for givim koment long olketa kongregeson meeting. (Ps. 35:18) Taem iumi garem chance for givim koment, iumi barava laekem datwan. Long sem wei, sapos iumi tinghae long each assignment wea iumi kasem long kongregeson olsem privilege, bae iumi duim best bilong iumi long datwan. Waswe, iumi evritaem share long privilege for klinim Kingdom Hall and keepim hem gud?
3 Nomata plande million pipol no sure sapos God hem herem prea bilong olketa, barava important Man long universe hem herem prea bilong iumi, and datwan hem wanfala spesol present wea iumi garem. (Prov. 15:29) Jehovah seleva savve lisin long olketa prea bilong olketa servant bilong hem. (1 Pet. 3:12) Hem no markem haomas taem for iumi savve story witim hem. Wei wea iumi savve prea long hem “evritaem,” hem wanfala barava spesol present!—Eph. 6:18.
4 “Pipol wea Waka Witim God”: Wanfala long olketa nambawan privilege wea iumi garem hem for talemaot gud nius abaotem Kingdom bilong God olsem “pipol wea waka witim God.” (1 Cor. 3:9) Hem wanfala waka wea mekem iumi satisfae and hem strongim iumi tu. (John 4:34) Jehovah no need for iusim olketa man for duim disfala waka, bat hem givim iumi disfala assignment bikos hem lovem iumi. (Luke 19:39, 40) Bat, hem no givim disfala privilege long eniwan nomoa. Olketa wea share long pablik ministry mas kasem and keepim olketa mark wea stap insaed long Bible. (Isa. 52:11) Waswe, iumi showimaot hao iumi tinghae long disfala privilege long wei for mekem ministry olsem important part long schedule bilong iumi evri week?
5 Olketa privilege from Jehovah hem mekem iumi rich. (Prov. 10:22) No ting smol long olketa privilege hia! Taem iumi showimaot hao iumi barava lovem olketa privilege bilong iumi long service, iumi mekem Dadi bilong iumi long heven hapi, wea hem nao Datwan wea givim “evri gudfala and perfect present.”—Jas. 1:17.