Wei wea Kongregeson Buk Study Helpem Iumi
1. Long wanem wei nao faevfala meeting bilong iumi helpem iumi?
1 Faevfala meeting bilong iumi wea kamap evri week followim olketa difren program and garem olketa difren goal. Nomata olsem, evri meeting hia important for helpem iumi for “tingim and muvim each other for showimaot love and duim gudfala waka.” (Heb. 10:24, 25) Wanem nao samfala spesol and gud samting abaotem Kongregeson Buk Study arrangement?
2. Olketa wanem gud samting nao evriwan kasem long wei for hipap long wanfala smol grup long buk study?
2 Helpem Man Muv Ahed Long Spiritual Wei: Olketa wea hipap long wanfala buk study hem no staka olsem olketa wea go long olketa nara kongregeson meeting. Diswan mekem hem isi for garem olketa fren wea savve helpem iumi long spiritual wei. (Prov. 18:24) Waswe, iu duim best bilong iu for savve long evriwan long buk study bilong iu, maet long wei for askem each wan for waka witim iu long ministry? Buk study arrangement helpem tu buk study overseer for savve gud long need bilong each wan long grup and for givim encouragement wea fitim each wan.—Prov. 27:23.
3. Long wanem wei nao buk study arrangement helpem man for koment, and tu, encouragem olketa Bible student for attend?
3 Waswe, iu invaetem olketa Bible student bilong iu for go witim iu long buk study? Olketa wea interest maet hol bak for go long olketa big meeting bat no fraet for go long smol meeting wea kamap long wanfala haos. Wei for fren gud witim olketa narawan hem mekem hem isi for olketa young wan and niu wan for koment. And from grup hem smol, iumi savve koment plande taem and long wei olsem iumi praisem Jehovah.—Ps. 111:1.
4. Wanem nao samfala gud samting abaotem buk study arrangement?
4 Olketa buk study savve kamap long olketa ples long territory wea klosap for olketa pablisa. Nomata no evriwan savve go long buk study wea klosap long olketa, maet iumi no need for go farawe for kasem ples for buk study olsem olketa nara meeting. Maet ples for buk study hem gudfala ples for hipap for field service tu.
5. Long wanem wei nao iumi savve kasem help from buk study overseer saed long ministry?
5 Help Long Ministry: Buk study overseer hem laekem tumas for helpem evriwan for evritaem go preach, teach long gudfala wei, and hapi for duim ministry. So hem trae hard for waka witim evriwan long grup, and helpem each wan long difren part bilong ministry. Sapos hem no isi long iu for duim wanfala part bilong ministry olsem for duim return visit, storyim diswan long buk study overseer bilong iu. Maet hem savve markem wanfala pablisa long grup bilong iu wea garem bigfala savve for duim ministry for iu waka witim hem. Iu bae kamap moabeta long wei for teachim olketa Bible student long wei for lukluk gud long gudfala wei for teach bilong buk study overseer taem hem conductim buk study.—1 Cor. 4:17.
6. Why nao hem gud for iumi trae hard for kasem gud samting from buk study arrangement?
6 Kongregeson Buk Study hem wanfala blessing! Disfala arrangement from Jehovah wea showimaot love helpem iumi for gohed standap strong long spiritual wei long disfala taem wea laef hem no isi.—Ps. 26:12.