Kasem Gud Samting From Field Service Grup Bilong Iu
1. Nomata iumi no garem buk study grup distaem, wanem gud samting nao iumi savve kasem from field service grup bilong iumi?
1 Waswe, iu missim Kongregeson Buk Study wea iumi garem bifor? Olketa buk study grup hem smol and olsem famili. Hem isi for fren gud witim olketa narawan and datwan strongim faith bilong iumi. (Prov. 18:24) Brata wea lukaftarem grup savve gud long iumi and savve encouragem iumi. (Prov. 27:23; 1 Pet. 5:2, 3) Nomata iumi no garem buk study distaem, iumi savve kasem olketa gud samting hia from field service grup bilong iumi.
2. Wanem nao iumi savve duim for fren gud witim olketa long field service grup bilong iumi?
2 Wanem Iumi Savve Duim: Field service grup hem big olsem buk study grup bifor. Taem iumi “waka tugeta” witim narawan long grup, iumi savve fren gud witim olketa. (Phil. 1:27) Waswe, iu waka witim evriwan long grup bilong iu finis? Sapos iu trae for waka witim evriwan, datwan showimaot iu ‘lovem olketa.’ (2 Cor. 6:13) Iumi savve askem narawan long grup tu for joinim Famili Worship bilong iumi or for kaikai witim iumi. Long samfala kongregeson, taem visiting speaker kam for givim tok, olketa markem wanfala field service grup for invaetem brata for kaikai witim olketa. Evriwan long grup savve kaikai tugeta and strongim narawan nomata sapos datfala brata savve kam or nomoa.
3. Wanem nao iu savve duim for kasem help and encouragement from field service grup bilong iu?
3 Nomata distaem kongregeson garem meeting tufala taem nomoa long week, datwan no minim olketa brata no savve helpem and encouragem olketa pablisa olsem bifor. Olketa elder markem wanfala brata for lukaftarem grup mekem hem savve encouragem evriwan and trainim olketa long ministry. Sapos iu no waka long ministry yet witim brata wea lukaftarem grup, hao sapos iu askem hem for waka witim iu? Long wanfala weekend evri month, service overseer waka witim wanfala grup long ministry. Sapos kongregeson no garem staka field service grup, maet service overseer visitim each grup tufala taem long year. Waswe, iu savve joinim grup long day wea service overseer waka witim grup bilong iu?
4. (a) Hao nao olketa elder organizem olketa field service grup? (b) Why nao hem gud for ting raonem sapos grup savve meet long haos bilong iu?
4 Plande taem hem gud for each grup meet seleva for duim preaching long weekend. From each grup meet long semtaem bat long difren ples wea no farawe from haos bilong olketa pablisa, maet datwan mekem hem isi for olketa kasem grup and territory. From olketa grup smol, hem isi for brata organizem grup and olketa pablisa savve kasem territory kwiktaem. Hem isi tu for brata wea lukaftarem grup for helpem grup bilong hem. Bat maet long samfala kongregeson, hem fitim for tu-thri grup hipap tugeta for preaching. Sapos full kongregeson hipap tugeta for preaching long first Saturday long month or bihaen Wastaoa Study, maet hem gud for each grup sidaon tugeta and olketa brata wea lukaftarem olketa grup garem tu-thri minute for organizem grup bilong olketa bifor olketa prea for go preaching.—Lukim box “Waswe, Grup Savve Meet Long Haos Bilong Iu?”
5. Nomata iumi no garem Kongregeson Buk Study distaem, iumi savve Jehovah bae duim wanem samting for iumi?
5 Nomata iumi no garem Kongregeson Buk Study distaem, Jehovah gohed provaedem wanem iumi needim mekem iumi savve duim wanem hem laekem. (Heb. 13:20, 21) Jehovah lukaftarem iumi and iumi no short long eni samting. (Ps. 23:1) Bible sei: “Man wea plantim staka seed bae harvestim staka samting.” (2 Cor. 9:6) So iumi savve kasem plande gud samting from field service grup bilong iumi sapos iumi wanwan duim samting.
[Box long page 6]
Waswe, Grup Savve Meet Long Haos Bilong Iu?
Long samfala kongregeson, olketa grup hipap tugeta long weekend bikos no evri grup garem haos for hipap. Hem privilege for grup meet long haos bilong iumi bikos hem arrangement bilong kongregeson. Waswe, grup savve meet long haos bilong iu? No hol bak bikos iu tingse haos bilong iu no mas gud. Olketa elder bae ting raonem sapos haos bilong iu stap long ples wea fitim grup for meet and olketa nara samting tu, olsem olketa duim taem olketa chusim ples for buk study hipap bifor. Sapos iu laekem grup for meet long haos bilong iu, talem brata wea lukaftarem grup bilong iu.