No Hol Bak for Conductim Bible Study!
1. Long wanem wei nao iumi “no hol bak for duim gud samting”?
1 Taem iumi gohed strong for talemaot gud nius abaotem Kingdom bilong God, iumi “no hol bak for duim gud samting” for pipol wea stap long territory bilong iumi. (Prov. 3:27) Disfala message abaotem olketa nambawan samting wea bae kamap anda long rul bilong God hem winim eni narafala message wea iumi savve sharem witim narafala man. Nomata maet iu willing for sharem Kingdom hope taem iu duim enitaem witnessing or givimaot literature, hem bae gud tumas for markem wanfala goal for conductim Bible study sapos iu no duim yet.
2. Why nao maet iumi hol bak for startim Bible study?
2 Samfala taem, samting wea stopem iumi for conductim Bible study hem tingting bilong iumiseleva. Samfala hol bak for conductim Bible study bikos olketa tingse olketa no fit or bikos olketa busy tumas. Maet olketa idea long daon savve helpem iu for no hol bak from wei for share insaed Bible study waka.—Matt. 28:19; Acts 20:20.
3. Why nao iumi fit for teachim Bible?
3 Mi No Fit: Maet iu skul lelebet nomoa or maet narafala reason stap mekem iu tingse iu no fit for conductim Bible study. Olketa Christian minister long first century wea savve tumas olketa “no skul gud and man nating.” Wanem nao helpem olketa for teachim truth long nara pipol? ‘Olketa savve gogo witim Jesus bifor.’ (Acts 4:13) Olketa lane from Nambawan Teacher, Jesus. Olketa teaching bilong hem and hao hem teach stap insaed Bible for iumi. Nomata maet iu skul lelebet nomoa, distaem iu lane abaotem God and plan bilong hem. Diswan hem winim olketa narafala education.—Isa. 50:4; 2 Cor. 3:5.
4. Wanem nao iumi savve lanem from example bilong Amos?
4 Samfala taem Jehovah iusim olketa profet for kaonselem olketa ruler wea duim mistek or samfala nara bigman. Samfala, olsem Amos, hem man nating nomoa. Amos talem: “Mi no wanfala profet, and mi no son bilong wanfala profet tu; bat mi man for lukaftarem olketa animal and man for mekem hol long olketa frut bilong olketa sycamore tree.” (Amos 7:14) Nomata olsem, Amos no hol bak for talemaot judgment message bilong Jehovah long priest Amaziah wea worshipim pikinini buluka. (Amos 7:16, 17) Iumi mas evritaem tingim hao iumi duim waka bilong God and hem nao bae lanem iumi for duim waka wea hem givim iumi for duim.—2 Tim. 3:17.
5. Why nao iumi shud willing tumas for startim Bible study nomata sapos iumi busy tumas?
5 Busy Tumas: Nomata sapos iu busy tumas, luk olsem iu markem taem finis for evritaem share long ministry. Wei for conductim olketa Bible study savve kamap nambawan part bilong ministry. Hem wanfala privilege for lukim hao Word bilong Jehovah savve helpem wanfala man. (Heb. 4:12) Jehovah hapi taem iumi willing tumas for helpem samwan for “kasem stretfala savve abaotem truth.” (1 Tim. 2:4) Olketa angel tu hapi taem samwan hem repent from wei bilong hem bifor and muv ahed long spiritual wei.—Luke 15:10.
6. Wanem spesol waka nao iumi garem wea followim will bilong God?
6 Will bilong God hem for “evri difren kaen man mas sev and kasem stretfala savve abaotem truth.” (1 Tim. 2:4) Hem wanfala spesol waka wea iumi garem for duim samting wea followim will bilong God, wea hem nao for no hol bak for conductim olketa Bible study!