No Hol Bak—Nomata Iu Busy
1. Why nao samfala hol bak for askem pipol for studyim Bible witim olketa?
1 Samfala hol bak for askem pipol for studyim Bible from olketa busy. For lukaftarem Bible study iumi needim taem. Iumi needim taem for prepare, duim datfala Bible study, and helpem student for winim samfala hard samting long laef. Aposol Paul sei hem givim laef bilong hem for helpem olketa long Thessalonica for savve long Jehovah. (1 Thess. 2:7, 8) Wanem nao iumi savve duim for studyim Bible witim samwan nomata iumi busy?
2. From iumi lovem Jehovah, hao nao bae iumi iusim taem bilong iumi?
2 Iumi Needim Taem for Worship: Tru samting nao, iumi needim taem for worshipim Jehovah. Olsem example, iumi needim taem for go long meeting evritaem, duim ministry, readim Bible, and for prea. Nomata samwan wea marit hem busy, bae hem laek for markem taem for hasband or waef bilong hem. From iumi lovem Jehovah, iumi bae hapi tumas for “iusim gud” taem bilong iumi for worshipim hem. (Eph. 5:15-17; 1 John 5:3) Jesus sei barava important part long worship bilong iumi hem for teachim pipol for kamap disaepol. (Matt. 28:19, 20) Taem iumi ting raonem toktok bilong Jesus datwan bae helpem iumi for no hol bak for studyim Bible witim samwan.
3. Wanem nao iumi savve duim for gohed lukaftarem Bible study nomata sapos samting happen wea bae mekem iumi misstim study?
3 Bat waswe sapos samting happen wea bae mekem iumi misstim study bilong iumi samfala taem, olsem iumi mas waka, duim wanfala theocratic assignment, or iumi kasem bigfala sik? Samfala taem, samfala pablisa mas go long nara ples and olketa iusim mobile or computer for duim Bible study. Olketa wea kasem big sik askem student for kam long haos bilong olketa. Samfala pablisa arrange witim wanfala pablisa wea olketa savve hem bae lukaftarem Bible study bilong olketa taem olketa no stap.
4. Wanem gud samting nao iumi savve kasem taem iumi studyim Bible witim samwan?
4 Paul iusim taem and strong bilong hem for helpem olketa narawan for lanem truth and datwan mekem hem hapi tumas. (Acts 20:35) Taem hem tingim evriwan wea hem helpem long Thessalonica, datwan mekem hem thankiu long Jehovah. (1 Thess. 1:2) Nomata iumi busy, sapos iumi no hol bak for studyim Bible witim samwan, iumi bae hapi tumas and satisfae long ministry.