Markem Goal for Garem Bible Study
1 “Lukluk long olketa field and lukim hao olketa redi finis for harvest.” (John 4:35) Olketa toktok hia wea Jesus Christ talem hem fitim wanem olketa Christian minister lukim distaem.
2 Iumi savve faendem yet pipol wea garem honest heart wea laek for lanem olketa wei bilong Jehovah. Diswan hem showaot klia long namba bilong olketa niu disaepol wea baptaes each year. Sapos iu barava interest for garem Bible study, wanem nao iu savve duim?
3 Markem Goal: First samting, markem goal for evritaem startim and conductim wanfala Bible study. Tingim disfala goal taem iu long ministry. From Christian assignment wea iumi kasem hem join witim teaching and preaching waka, iumi evriwan shud traem best for garem wanfala or maet samfala moa Bible study.—Matt 24:14; 28:19, 20.
4 Samfala Samting for Tingim: Prea nao hem samting wea olketa Kingdom pablisa mas duim. Samfala taem iumi faendem pipol wea prea finis for kasem help for minim Bible. Hem wanfala blessing for Jehovah iusim iumi long wei for faendem eniwan olsem and lanem olketa!—Hag. 2:7; Acts 10:1, 2.
5 Wanfala sista hem prea for garem wanfala Bible study and hem showimaot disfala tract Waswe, Iu Laek for Savve Moa Abaotem Bible? long ples wea hem waka. Taem wanfala woman holem wanfala tract, sista hia lukim hem readim and then hem go for story witim hem and startim wanfala Bible study.
6 Olketa nara pablisa wea savve tumas for startim and conductim olketa Bible study savve helpem iu for kasem goal bilong iu for conductim Bible study. Prea long God mekem iu faendem wanfala Bible study, and mekius long help wea stap for kasem goal bilong iu. Maet klosap bae iu kasem hapi long wei for conductim Bible study.