“Talemaot Gud Nius”
1. Wanem gud nius nao iumi mas talem long pipol?
1 Long world wea nogud nius hem staka tumas distaem, iumi garem privilege “for talemaot gud nius abaotem God wea kaen tumas.” (Acts 20:24) Diswan hem for mekem pipol savve hao klosap nao raeteous niu world bilong Jehovah bae kam and “olketa last day” distaem wea “evri samting bifor [bae] hem finis nao.” (2 Tim. 3:1-5; Rev. 21:4) Long datfala taem no eniwan bae hem sik. (Isa. 33:24) Olketa wea iumi lovem wea dae finis bae kamaot from olketa grev and meetim famili and olketa fren. (John 5:28, 29) Full earth bae kamap wanfala paradaes. (Isa. 65:21-23) Olketa hia nao samfala example bilong gud nius wea iumi mas talem long pipol!
2. Why nao taem bilong Memorial hem gudfala taem for iumi preachim gud nius?
2 Long March, April, and May hem olketa gudfala month for talemaot gud nius. Long olketa month hia maet hem no rain tumas. Diswan bae mekem man garem staka chance for duim ministry. And tu, long full world bae iumi celebratem Memorial bihaen sun go daon long Saturday, March 22 wea diswan hem barava important taem long year. Distaem nao hem taem for iumi mekem preaching waka bilong iumi for kamap big moa.
3. Wanem nao savve helpem olketa famili for barava share long bigfala wei?
3 Auxiliary Pioneer: Waswe, iu savve markem taem for auxiliary pioneer for wanfala month, tufala month, or thrifala month evriwan? Hem bae gud for story raonem diswan long famili study. Taem famili waka tugeta, maet wanfala long famili or samfala fit for auxiliary pioneer. (Prov. 15:22) Prea abaotem diswan, and Jehovah savve blessim hard waka bilong iu. (Prov. 16:3) Nomata sapos no eniwan long famili savve auxiliary pioneer, evriwan long famili savve markem olketa goal for barava duim ministry and waka tugeta witim olketa wea fit for pioneer.
4. Sapos iumi garem full-taem waka, hao nao iumi savve markem taem for auxiliary pioneer?
4 Sapos iu garem full-taem waka, maet iu fit for auxiliary pioneer sapos iu markem gud taem bilong iu. Maet iu savve preach taem iu spel for lunch. Or iu savve askem wanfala territory wea klosap long ples wea iu stap or long ples wea iu waka and duim ministry for samting olsem wan hour bifor iu start waka or bihaen iu finis waka. Maet iu savve duim ministry for full day long Saturday and Sunday sapos iu duim olketa nara samting wea no mas important long narafala month bihaen. Samfala askem holiday for wan or tufala day mekem olketa savve iusim datfala taem for preach.
5. Hao nao iu savve helpem olketa wea olo or olketa wea no strong tumas for auxiliary pioneer?
5 Sapos iu olo or sik or iu no strong tumas, maet iu savve auxiliary pioneer taem iu iusim lelebet taem evriday long ministry. Askem Jehovah for givim iu “strong wea winim wanem iumi garem.” (2 Cor. 4:7) Wanfala sista hem auxiliary pioneer nomata hem 106 year! From help wea hem kasem from olketa Christian relative bilong hem and olketa narawan long kongregeson, hem go preach from haos tu haos, duim olketa return visit and olketa Bible study, and hem share long olketa nara part long ministry. Hem help for startim olketa Bible study witim tenfala pipol. Hem talem olsem: “Taem mi ting raonem gudfala chance wea mi garem for auxiliary pioneer, hem strongim love bilong mi and wei for tinghae long Jehovah, Son bilong hem, and organization bilong Hem. Mi barava laek for ‘thankiu long Jehovah!’”
6. Hao nao olketa young wan wea skul yet savve auxiliary pioneer?
6 Sapos iu wanfala young wan wea baptaes finis bat iu skul yet, maet iu tu fit for auxiliary pioneer. Olsem olketa wea waka full-taem, maet iu tu savve iusim olketa weekend for duim ministry. Maet bihaen long skul long samfala day iu savve go preach for samting olsem wan hour. Waswe, bae eni skul holiday kamap wea iu savve iusim for duim ministry? Sapos iu laek for auxiliary pioneer, storyim long dadi and mami bilong iu.
7. Wanem nao maet olketa elder savve duim for encouragem olketa brata and sista for interest moa long ministry long taem bilong Memorial?
7 Encouragem Olketa Narawan: Example wea olketa elder showimaot savve encouragem kongregeson. (1 Pet. 5:2, 3) Maet olketa disaed for garem samfala grup for preaching long early morning, bihaen long skul, or bihaen long waka. Service overseer shud trae for chusim olketa pablisa wea fit for leadim olketa grup hia, and tu hem bae orderim inaf magasin and buk for iusim long olketa month bilong spesol waka and redyim olketa territory for duim.
8. Wanem nao iumi lanem from samting wea wanfala kongregeson duim?
8 Long wanfala kongregeson, olketa elder start for encouragem olketa brata and sista for auxiliary pioneer samfala month bifor long taem bilong Memorial. Evri week olketa elder hia gohed for talem long kongregeson nem bilong olketa pablisa wea laek for auxiliary pioneer. Diswan hem helpem olketa wea laek for duim ministry long bigfala wei hao olketa bae kasem staka help long diswan. Samfala grup for preaching hem kamap long early morning and long evening. From diswan 53 pablisa nao duim auxiliary pioneer long April, klosap haf bilong kongregeson!
9. Why nao taem bilong Memorial hem barava gudfala taem for olketa wea laek kamap pablisa?
9 Helpem Olketa Narawan for Preach: Taem olketa niu wan and olketa young wan fit for preach, olketa savve waka tugeta witim olketa pablisa wea savve gud hao for preach. Gudfala taem for duim diswan hem long taem bilong Memorial taem plande brata and sista long kongregeson bae duim disfala waka long bigfala wei. Waswe, iu garem Bible study wea muv ahed for followim olketa haefala mark wea Jehovah laekem? Waswe, iu garem olketa pikinini wea muv ahed gud bat no pablisa yet? Sapos olketa hia laek for kamap pablisa and iu tingse olketa fit, talem long wanfala elder. Presiding overseer bae chusim tufala elder for story abaotem diswan witim iu and pikinini bilong iu or witim Bible study bilong iu.
10. Wanem nao olketa elder savve duim for helpem olketa pablisa wea wikdaon?
10 Olketa month hia hem barava gudfala taem for olketa pablisa wea wikdaon for waka moa witim kongregeson. Olketa Kongregeson Buk Study overseer and olketa nara elder shud visitim pablisa olsem and talem hem hao olketa hapi for waka witim hem long ministry. Sapos pablisa hia wikdaon for longfala taem finis, tufala elder shud story firstaem witim hem for disaedem sapos hem fit for preach or nomoa.—km-SP 11/00 p. 3.
11. Wanem spesol samting nao showimaot hao “God [hem] kaen tumas?”
11 Redi for Memorial: Ransom hem spesol samting wea showimaot hao “God [hem] kaen tumas.” (Acts 20:24) Plande million pipol evriwea long world bae hipap long Saturday, March 22, bihaen sun hem go daon for celebratem Memorial bilong dae bilong Jesus. Iumi laek for askem pipol for kam and helpem olketa wea garem gudfala heart for kam long disfala important taem wea showimaot hao Jehovah hem kaen tumas long olketa man.
12. Hu nao bae iumi askem for kam long Memorial?
12 Mekem wanfala list bilong olketa wea iu laek askem olketa for kam. Maet olketa wea iu raetem long list bilong iu hem olketa relative, olketa neiba, olketa fren bilong iu from ples iu waka or from skul, olketa Bible study bilong iu bifor and long distaem, and evri narawan wea iu evritaem visitim. Sapos samfala wea iu laekem for kam garem olketa kwestin abaotem Memorial, maet iu iusim article abaotem Evening Kaikai Bilong Lord long appendix wea stap long Wanem Bible Teachim buk long page 206-8. Maet diswan hem mekem wei for wanfala Bible study, from datwan bae givim iu chance for storyim datfala buk wea iumi iusim for duim olketa Bible study.
13. Long wanem wei nao Jehovah blessim hard waka bilong tufala pablisa wea askem olketa narawan for kam long Memorial?
13 Wanfala sista hem raetem nem bilong 48-fala famili wea bae hem askem olketa for kam. Taem hem askem olketa finis, hem raetem date wea hem askem olketa. Hem barava hapi tumas taem hem lukim hao long 48-fala famili wea hem askem olketa for kam long Memorial, 26-fala pipol nao kam! Wanfala brata wea garem stoa hem askem wanfala wakman bilong hem wea hem priest bifor for kam. Datfala man hem kam long Memorial and bihaen hem talem olsem, “Mi lanem staka samting abaotem Bible long wan hour nomoa wea winim 30-fala year taem mi stap long Catholic Church.” No longtaem bihaen Memorial, hem start for study long Wanem Bible Teachim buk.
14. Start long March 1, wanem waka nao bae gohed evriwea long world?
14 Waka for Givimaot: Start long Saturday, March 1 go kasem March 22, bae iumi givimaot wanfala spesol pepa wea askem pipol evriwea long world for kam long Memorial. Hem gud for evri pablisa duim disfala important waka. Hem gud for iumi givim disfala pepa long wanfala man and no for leavim long haos. Bat sapos iufala garem bigfala territory, maet olketa elder disaed for iufala leavim olketa pepa long olketa haos wea no eniwan stap. Long olketa weekend iumi bae offerim olketa niu magasin tu.
15. Wanem nao iumi savve talem taem iumi givimaot disfala Memorial pepa?
15 From iumi garem lelebet taem nomoa for givimaot olketa pepa hia, hem gud for iumi no story longtaem witim haosholder. Showimaot iu hapi and story gud long pipol. Maet iu talem samting olsem: “Mifala barava laek for iu, olketa famili member bilong iu, and olketa fren bilong iu for kam long wanfala important meeting wea bae kamap long March 22. Diswan hem pepa bilong iu. Olketa samting abaotem disfala meeting hem long disfala pepa.” Maet haosholder hem garem samfala kwestin. Or maet hem acceptim disfala pepa and hem talem hao hem laek for kam. Markem taem for go bak long olketa wea interest.
16. Wanem experience nao showimaot hao waka for givimaot olketa pepa for pipol kam long Memorial hem important?
16 Last year wanfala soldia hem lukim long haos bilong hem wanfala pepa wea askem hem for kam long Memorial. Hem disaed for kam bat hem mas askem firstaem bigman long army. Taem hem showim datfala pepa long bigman bilong army, datfala bigman hem kwaet nomoa and talem hao mami and dadi bilong hem olketa Witness and hem savve gogo witim olketa long olketa meeting. Datfala bigman hem letem soldia hia for kam long Memorial and hem tu kam witim hem!
17. Hao nao iumi savve showimaot iumi tinghae long wei wea God hem kaen tumas?
17 Showimaot Fasin for Tinghae: From taem bilong Memorial for 2008 hem klosap, hem fitim each wan long iumi for ting raonem wei wea Jehovah hem kaen tumas long iumi. Aposol Paul hem raet olsem: “Mifala barava askem iufala for no ting nating long wei wea God hem kaen tumas.” (2 Cor. 6:1) Hao nao iumi savve showimaot iumi tinghae long wei wea God hem kaen tumas? Paul hem raet olsem: “Bat long evri wei mifala showimaot hao mifala olketa servant bilong God.” (2 Cor. 6:4) Dastawe, iumi showimaot thankiu bilong iumi long present wea Jehovah givim iumi thru long gudfala fasin bilong iumi and wei wea iumi strong for preachim gud nius. Taem bilong Memorial hem gudfala taem for mekem waka bilong iumi for preachim gud nius hem kamap big.
[Box long page 3]
Hu Nao Fit for Auxiliary Pioneer?
◼ Olketa famili
◼ Olketa wea waka full-taem
◼ Olketa olo and olketa wea no strong tumas
◼ Olketa wea skul
[Box long page 4]
Taem Iumi Givimaot Olketa Memorial Pepa:
◼ No story longtaem bat mekem haosholder interest
◼ Tingim olketa wea interest and markem taem for go bak
◼ Offerim olketa magasin long olketa weekend