Taem Bilong Memorial, Chance for Duim Moa Long Preaching Waka!
1. Why nao iumi shud laek for duim moa samting long preaching waka long March, April, and May?
1 Waswe, iu savve duim moa samting long preaching waka long olketa month wea Memorial bae kamap? Long staka ples, olketa savve garem gudfala weather, and olketa day hem long. Samfala pablisa wea bae holiday from waka or skul, savve iusim olketa taem hia for duim moa samting long preaching waka. Start long April 2, iumi bae enjoyim wanfala spesol waka for askem pipol wea interest for kam long Memorial wea bae kamap long April 17. And iumi laek for helpem olketa wea kam, for attendim wanfala spesol tok wea bae kamap long week bilong April 25. Tru tumas, iumi garem staka reason why iumi laek duim moa samting long preaching waka long March, April, and May.
2. Wanem nao wanfala nambawan wei for iumi duim moa samting long preaching waka?
2 Auxiliary Pioneer: For duim auxiliary pioneer hem wanfala nambawan wei for duim moa samting long preaching waka. From iumi evriwan busy, diswan minim iumi mas plan gud firstaem and changem lelebet schedule bilong iumi. (Prov. 21:5) Maet iu savve leavim firstaem samfala samting wea no important tumas wea iumi savve duim evritaem. (Phil. 1:9-11) Hem gud for storyim long olketa narawan long kongregeson, wei wea iu laek for duim auxiliary pioneer, mekem sapos olketa laekem, olketa tu savve auxiliary pioneer!
3. Wanem nao famili savve duim for mekem plan for duim moa samting?
3 Hem gud for famili storyim goal bilong olketa long next Famili Worship. (Prov. 15:22) Sapos evriwan long famili waka tugeta, maet samfala long famili savve auxiliary pioneer long wan or tu-thri month. Waswe sapos iu luksavve iu no fit for auxiliary pioneer? Famili savve mekem plan for duim moa samting long preaching waka long samfala evening or iusim staka hour long olketa weekend.
4. Olketa wanem blessing nao iumi savve kasem taem iumi duim moa samting long preaching waka long taem bilong Memorial?
4 Jehovah savve long evri samting wea iumi duim for worshipim hem and hem tinghae long datwan. (Heb. 6:10) Man savve hapi taem hem duim samting for Jehovah and olketa narawan. (1 Chron. 29:9; Acts 20:35) Iu savve duim moa samting long taem bilong Memorial and kasem bigfala hapi and staka blessing!