Gohed for Strongim Narawan Taem Iumi Preach
1 Iumi evriwan tinghae long gudfala toktok wea savve strongim iumi, hem nao “toktok wea man talem long barava taem.” (Prov. 25:11) Taem iumi waka witim olketa narawan long preaching, wanem kaen story nao iumi savve storyim wea bae strongim olketa?
2 Story wea Strongim Narawan: Taem iumi duim preaching, hem barava gud tumas for iumi storyim olketa samting wea savve helpem iumi for fren gud witim Jehovah! (Ps. 37:30) Iumi savve storyim wanem iumi bae storyim long pipol, or maet talem samfala samting wea happen long preaching wea mekem iumi hapi. (Acts 15:3) Waswe, iumi lanem eni naesfala samting from Bible reading bilong iumi, from olketa niu magasin, or from wanfala meeting bilong kongregeson? Maet iumi savve storyim samfala samting wea iumi herem no longtaem go nomoa long pablik tok long Kingdom Hall.
3 Maet iumi feel nogud taem wanfala man stopem story bilong iumi and iumi no savve wanem for talem. Bihaen iutufala go from datfala man, hem gud for iutufala ting raonem hao for story gud long man olsem long narafala taem. Maet iutufala savve iusim buklet Hao for Startim and Go Ahed for Story Abaotem Bible for faendem samfala idea. Sapos iu talem hao iu hapi long samting wea narawan talem long datfala man, datwan savve strongim hem.
4 Helpem Narawan: Long buk study grup, waswe, eni pablisa stap wea iumi no waka witim for lelebet longtaem? Wei for askem pablisa hia for waka witim iumi savve “strongim faith bilong narawan.” (Rom. 1:12) Sapos iumi waka witim olketa regular and auxiliary pioneer long taem wea no staka pablisa duim preaching, olsem long early morning or long aftanun, iumi savve helpem olketa pioneer hia and olketa bae tinghae long datwan. Waswe, eni pablisa garem sik wea mekem hem for duim lelebet nomoa long preaching? Markem taem for waka witim hem, maet long wanfala Bible study and iutufala savve kasem gudfala samting.—Prov. 27:17.
5 Wei for talem thankiu and for showimaot iu tinghae long olketa smol samting savve strongim narawan. Iumi shud tingim datwan taem iumi waka witim olketa narawan long preaching, from iumi laek for “gohed . . . strongim narawan.”—1 Thess. 5:11.