Lanem Narawan for Lovem Jehovah
1. Wanem nao mekem samfala for laek kamap fren bilong Jehovah?
1 Waswe, iu savve tingim firstfala taem wea iu lane abaotem Jehovah? Wanem nao mekem iu for laek kamap fren bilong hem? Staka gudfala pipol talem hao olketa nambawan wei bilong Jehovah, olsem wei wea hem tingim and lovem pipol nao mekem olketa for laek kamap fren bilong hem.—1 John 4:8.
2, 3. Hao nao iumi savve iusim Wanem Bible Teachim buk for helpem Bible study fren gud witim Jehovah?
2 “Diswan Nao God Bilong Iumi”: Wanem Bible Teachim buk, mekhae long love wea Jehovah garem and hao iumi need for fren gud witim hem. Hao nao iumi savve iusim disfala buk for lanem olketa narawan for fren gud witim God? Taem iumi storyim wanfala niu point iumi savve askem olketa kwestin olsem: “Wanem nao iu lanem abaotem Jehovah from disfala trufala teaching?” or “Hao nao disfala point showimaot Jehovah hem Dadi wea winim eni nara dadi?” Wei for lanem Bible study bilong iu olsem bae helpem hem for fren gud witim Jehovah for olowe.
3 Taem iumi helpem Bible study for luksavve hao wei for lane abaotem Jehovah God hem spesol, hem bae talem toktok olsem Isaiah hem talem, “diswan nao God bilong iumi.” (Isa. 25:9) Taem iumi storyim Bible, iumi savve mekhae long olketa gud samting wea evriwan bae kasem taem Jehovah iusim gavman bilong hem wea Christ Jesus rulim for mekem kamap tru olketa promis bilong hem.—Isa. 9:6, 7.
4, 5. For lovem Jehovah hem minim wanem?
4 Showimaot Iu Lovem Jehovah: Wei for lovem Jehovah long full heart, soul, and evri savve bilong iu, no minim nomoa for garem strongfala feeling for God. Bat man mas followim olketa wei and tingting bilong God. (Ps. 97:10) Iumi showimaot iumi lovem God taem iumi obeyim olketa law bilong hem and gohed for ‘holy and duim waka wea showimaot iumi lovem God,’ nomata long olketa hard taem or long taem pipol spoelem iumi.—2 Pet. 3:11; 2 John 6.
5 Iumi hapi taem iumi duim wanem God laekem bikos iumi lovem hem. (Ps. 40:8) Olketa Bible study mas gogo luksavve hao evri law bilong God hem for mekem olketa wakman bilong Hem kasem gud samting for olowe. (Deut. 10:12, 13) Taem man followim olketa law bilong Jehovah, datwan showimaot hem tinghae long olketa nambawan samting wea God duim. Helpem olketa Bible study for luksavve hao sapos olketa followim olketa stretfala wei bilong Jehovah, datwan bae protectim olketa from staka nogud samting wea savve spoelem olketa.
6. Wanem gud samting nao iumi savve kasem sapos iumi lovem Jehovah?
6 Gud Samting for Olketa wea Lovem God: Jehovah barava lukaftarem gud olketa hambol pipol wea lovem hem, and hem showimaot long olketa, “olketa deep samting bilong hem.” (1 Cor. 2:9, 10) Taem olketa lane abaotem olketa plan bilong Jehovah, olketa garem hope and luksavve long olketa gud samting wea bae happen. (Jer. 29:11) Jehovah bae kaen tumas long olketa wea lovem Hem. (Ex. 20:6) Olketa tinghae long hope for laef olowe bikos long bigfala love bilong God for olketa.—John 3:16.
7. Hao nao iu feel taem iu lanem narawan for lovem Jehovah?
7 Taem iumi savve gud long Dadi bilong iumi long heven, datwan mekem iumi for storyim hem long nara pipol. (Matt. 13:52) Hem nambawan waka for lanem olketa narawan and pikinini bilong iumi for lovem Jehovah! (Deut. 6:5-7) Iumi and olketa Bible study mas gohed praisem Jehovah from iumi kasem ‘staka gud samting from Hem.’—Ps. 145:7.