Spesol Day for Offerim Bible Study
1 Start long January, evri kongregeson bae markem wanfala Saturday or Sunday evri month for offerim Bible study long pipol. Kongregeson savve markem firstfala Saturday or Sunday or eni nara Saturday or Sunday for duim diswan. Sapos pipol no laekem wanfala Bible study, olketa pablisa savve gohed for offerim Wanem Bible Teachim buk or olketa niu magasin. Olketa elder and ministerial servant mas mekem plan for duim disfala waka and helpem olketa pablisa for startim Bible study.
2 Kongregeson Service Komiti nao bae markem wanem Saturday or Sunday nao for offerim Bible study. Olketa elder bae talem disfala day evritaem mekem olketa pablisa redi gud for disfala waka and traem best for offerim Bible study taem olketa preach from haos tu haos and taem olketa visitim pipol wea interest.
3 Hao for Redi: Olketa idea long hao for startim Bible study hem stap long January 2006 Kingdom Ministry Bilong Iumi and long page 4 long buk Hao for Startim and Go Ahed for Story Abaotem Bible. Samfala maet iusim wanfala tract olsem, Waswe, Iu Laek for Savve Long Tru Samting? And page 3 long November 2007 Kingdom Ministry Bilong Iumi hem garem samfala idea for offerim Bible study. Olketa elder and ministerial servant nao bae tekem disfala grup for preaching for 10 go kasem 15 minute nomoa. Grup bae story or duim demonstration abaotem wan or tufala idea for offerim Bible study.
4 Hem tru, no evriwan bae laekem Bible study or sapos olketa laekem firstaem maet olketa no gohed long datfala study. Bat diswan mas no stopem iumi for duim disfala waka, bikos Jehovah nao bae pullim kam pipol wea olsem sheepsheep long organization bilong hem. (John 6:44) Waka bilong iumi, hem no for plantim olketa seed bilong truth nomoa, bat hem for lukaftarem and watarem samting wea start for grow. Diswan minim for studyim Bible witim olketa wea garem gudfala heart. Taem iumi duim olsem, iumi showaot iumi tinghae for waka witim God.—1 Cor. 3:9.