Barava Redi Gud for Memorial
Hem wanfala hapi privilege for olketa wea followim Christ for barava redi gud for datfala naet wea iumi bae tingim dae bilong Jesus Christ! (Luke 22:19) Wanem nao iumi savve duim for redi gud for Memorial?
◼ Taem and Ples: Evriwan shud savve long barava taem and ples for Memorial. Sapos tu-thri kongregeson bae iusim wanfala Kingdom Hall, hem important for arrive early and go aot kwiktaem mekem nara kongregeson savve kam insaed. Hem important for no blokem wei for olketa narawan kam insaed and go aot.
◼ Askem Pipol for Kam: Waswe, olketa pablisa garem finis Memorial pepa? Waswe, olketa readim finis and minim gud? Waswe, iu practice finis long hao for givimaot disfala Memorial pepa? Hu nao bae iu givim Memorial pepa long hem? Iumi mas trae hard for givimaot evri Memorial pepa wea iumi garem.
◼ Transport: Samfala wea interest and samfala brata and sista maet needim transport for kam and for go bak, or iumi savve duim nara samting for helpem olketa for kam long Memorial. Wanem nao olketa plan wea iumi savve mekem for helpem olketa?
◼ Bred and Wine: Mas pasim bred and wine bihaen sun go daon. Sapos eni anointed brata or sista no fit for kam, mekem plan for hem mas kasem bred and wine. Redyim firstaem bred and wine wea fitim.—Lukim February 15, 2003, Wastaoa, page 14-15, paragraf 14, 17.
◼ Kingdom Hall: Klinim gud firstaem Kingdom Hall. Putim firstaem tebol, kava, pleit, and kap bifor pipol start for kam long Kingdom Hall. Sapos Memorial bae kamap long eni nara ples, gudfala saond system mas stap mekem evriwan wea kam savve herem brata wea givim tok. Chusim firstaem olketa attendant and olketa wea bae pasim bred and wine. Olketa mas savve long wanem olketa bae duim. Lukluk and kaleko bilong olketa brata hia mas klin and showimaot respect.
For rememberim disfala important taem wea Jesus Christ hem dae, iumi wanwan and kongregeson laek for barava redi gud. Tru nao, Jehovah bae blessim olketa wea tinghae long evri samting wea hem duim for iumi long wei wea Hem givim kam Son bilong hem Jesus Christ for dae for iumi.