Wanem for Talem Abaotem Olketa Magasin

Wastaoa April-June

“Hem no isi for duim stret samting taem nara pipol forcem iumi for duim wanem olketa laekem. Long tingting bilong iu, wanem nao bae helpem iumi for no duim datwan? [Weit for hem ansa. Then readim Proverbs 29:25.] Wanfala story long disfala magasin hem storyim faevfala wei for fraet long God and no long man.” Showim story wea start long page 20.

Awake! March

“Iumi evriwan tinghae long wei for garem olketa gudfala fren. Olketa wanem wei nao iu laekem wanfala fren for garem? [Weit for hem ansa.] Lukim wanem Bible talem. [Readim Proverbs 17:17.] Disfala story garem olketa idea for chusim olketa gudfala fren and for kamap gudfala fren for olketa narawan.” Showim datfala story wea start long page 18.

The Watchtower April 1

“Mi laek for herem tingting bilong iu abaotem wanem Jesus talem. [Readim John 3:3.] Long tingting bilong iu, wanem nao hem minim for born moa? [Weit for hem ansa.] Wei for minim wanem Jesus talem bae affectim laef bilong iumi and hope bilong iumi for future. Disfala magasin bae storyim why nao olsem.”

Awake! April

“Luk olsem staka skul pikinini savve wari tumas. Long tingting bilong iu, waswe, olketa samting olsem hem difren from taem wea dadi and mami bilong iu young yet? [Weit for hem ansa.] Wei for wari tumas savve spoelem man. [Readim Ecclesiastes 7:7a.] Disfala magasin storyim hao olketa bigman savve helpem young pipol for savve wanem for duim.”