Teachim Olketa wea No Savve Gud Hao for Read
1. Wanem kaen hardfala taem nao iumi kasem long preaching waka?
1 Taem iumi duim preaching waka, samfala taem hem hard for teachim Bible truth long pipol iumi meetim wea no savve hao for read gud. Wanem nao iumi savve duim?
2. Long wanem wei and why nao iumi savve showimaot respect long olketa wea no savve gud hao for read?
2 Showimaot Respect: Samting wea important long Jehovah hem trufala tingting bilong man and no sapos hem skul gud or nomoa. (1 Sam. 16:7; Prov. 21:2) Dastawe, iumi no ting daonem man wea no savve hao for read gud. Luk olsem kaen pipol olsem bae hapi tumas for iumi helpem olketa taem iumi showimaot respect and patient. (1 Pet. 3:15) Diswan minim for iumi no forcem datfala man for readim Bible scripture or paragraf. Taem datfala man lanem staka samting abaotem olketa Bible truth, maet hem laekem tumas for kamap gud long wei for readim Bible, mekem hem hapi for read “smol day and naet.”—Ps. 1:2, 3.
3. Wanem teknik nao iumi savve iusim for teachim olketa wea no savve gud hao for read?
3 Olketa Teknik for Teachim Olketa Bible Study: Olketa piksa hem gudfala teknik for helpem pipol rememberim wanem olketa lanem. Maet iu savve askem Bible study abaotem tingting bilong hem long piksa wea hem lukim long datfala buk wea iutufala iusim. Then iusim samfala kwestin for helpem hem minim datfala piksa. Iusim olketa scripture for minim datfala piksa. Iu savve iusim tu olketa piksa for storyim bak wanem iutufala lanem. No studyim staka samting long wanfala taem wea iutufala study. Mekhae long theme and olketa main point long datfala study, and stap klia from wei for storyim samting wea no insaed study. Readim olketa scripture stret kam from Bible, and iusim olketa kwestin for mekem datfala Bible study for minim gud wanem iutufala readim. Diswan bae helpem hem for laek read gud mekem hem fit for gohed study seleva.
4. Hao nao iumi savve helpem olketa Bible study bilong iumi for kamap gud long hao for read?
4 Olketa Samting for Helpem Man Read Gud: Pipol wea no savve hao for read gud or wea no finisim gud skul bilong olketa savve minim and rememberim gud wanem iutufala studyim. Maet iu savve strongim olketa olsem for iusim kaset bilong organization. Wei for lisin gud and maet for read smol followim datfala reading long buk wea iutufala studyim, bae helpem datfala man for kamap gud long hao for read. Maet hem savve iusim tu disfala brochure Work Hard for Read and Raet for helpem hem. Long samfala ples, olketa elder savve mekem wanfala class for read and raet long kongregeson. Olketa idea hia savve mekem iumi fit for helpem olketa wea no savve gud hao for read mekem olketa minim “holy raeting,” wea savve mekem olketa fit for sev.—2 Tim. 3:15.