Iusim Olketa Buk Long Gudfala Wei
1. Wanem nao iumi savve duim for followim wei bilong Jesus for tinghae long evri samting wea Jehovah givim?
1 Bihaen Jesus duim mirakol for feedim staka pipol, hem talem olketa for hipimap olketa leftova kaikai. (Matt. 14:19-21) Wei bilong Jesus for tinghae long evri samting wea Jehovah givim, savve helpem iumi for ‘showimaot iumi thankiu’ long Jehovah for evri samting wea hem givim iumi long “datfala wakaman wea faithful and wise.”—Col. 3:15; Luke 12:42; Matt. 24:45-47.
2. Wanem nao iumi savve duim mekem olketa magasin no hipap long haos?
2 Olketa Magasin: Hem isi tumas for olketa magasin savve hipap long haos. Sapos magasin order bilong iumi hem big tumas evri month, iumi shud mekem smol order nomoa. Waswe long olketa old magasin? Olketa magasin hia gud yet for pipol readim. Sapos iumi garem staka old magasin, iumi savve askem service overseer or eni elder for helpem iumi faendem wei for givimaot.
3, 4. Wanem nao iumi shud tingim taem iumi orderim buk long Kingdom Hall?
3 Olketa Nara Buk: Taem buk for iusim hem change, chekim firstaem long haos sapos iu garem samfala finis, bifor iu tekem samfala moa long Kingdom Hall. Tekem nomoa wanem iu fit for iusim for datfala week, and sapos hem finis go bak long bukrum.
4 Askem nomoa olketa buk for iuseleva wea iu needim. Raetem nem bilong iu long spes wea olketa markem. Datwan bae helpem iu for luksavve long buk bilong iuseleva. Sapos iu iusim Watchtower Library long CD-ROM and keepim olketa magasin bilong iuseleva, maet iu no need for askem moa olketa Watchtower and Awake! bound volume.
5. Wanem nao iumi shud tingim taem iumi givimaot olketa buk bilong iumi?
5 Givimaot Olketa Buk: Iumi trae for givim olketa buk bilong iumi long olketa wea laek for lane. No forget hao iumi nao main wan wea mas givim donation for olketa buk wea iumi givimaot long preaching. Taem iumi givim buk long olketa wea laek for lane, no forget for talem olketa hao olketa savve givim donation for sapotim disfala waka raonem full world.
6. Why nao iumi barava tinghae long olketa buk bilong iumi, and wanem nao bae iumi duim witim olketa?
6 Jesus duim mirakol for givim kaikai long samfala pipol, bat hem givim spiritual kaikai long evriwan. Jesus sei: “Samting wea mekem man laef nao, hem no kaikai nomoa, bat hem mas evri toktok wea kamaot from mouth bilong Jehovah.” (Matt. 4:4) Olketa buk bilong iumi storyim evri tru samting wea Bible talem for man kasem laef olowe. (John 17:3) Olketa spesol tumas long iumi!