Iusim Olketa Bible Pablikeson Long Wisefala Wei
1, 2. Hao nao plande pipol ting long olketa pablikeson bilong iumi, and diswan mekem wanem kwestin kamap?
1 “Start kam long 1965, mi readim olketa pablikeson bilong iufala. Mi chekim olketa scripture long Bible taem mi read, and evri samting insaed olketa pablikeson bilong iufala hem stret witim wanem Bible talem. Longtaem kam nao mi laek for savve wanem nao tru samting abaotem God and Jesus, and for tok stret, long olketa pablikeson bilong iufala and Bible nao mi kasem olketa stretfala ansa.” Datwan hem wanem wanfala man talem long leta wea hem raetem go long headquarter bilong Olketa Jehovah’s Witness. Insaed datfala leta, hem ask tu for wanfala Bible study.
2 Olsem datfala man wea tinghae long olketa pablikeson, plande million pipol evriwea long world tinghae tu long olketa pablikeson wea datfala “faithful and wise slave” provaedem for helpem man for studyim Bible. (Matt. 24:45) Evri year, organization bilong Jehovah printim barava staka pablikeson for helpem pipol wea garem honest heart “kasem stretfala savve bilong truth.” (1 Tim. 2:4) Hao nao iumi savve iusim olketa Bible pablikeson bilong iumi long wisefala wei?
3. Hao nao iumi savve stap klia long wei for westem olketa pablikeson?
3 No Westem: Gogo, maet iumi savve garem staka literature winim wanem iumi fit for iusim. Wanem nao iumi savve duim mekem iumi no westem olketa nambawan pablikeson bilong iumi? Iumi needim fasin for luksavve taem iumi tekem pablikeson for iusim long ministry. Winim wei for tekem staka pablikeson wea iumi bae offerim, maet iumi tekem wan or tufala and then bihaen iumi offerim olketa, go bak tekem samfala moa. Diswan savve stopem wei for hipimap staka pablikeson long haos bilong iumi. Olsem tu, sapos iumi garem staka magasin wea iumi no givimaot, hem bae gud for daonem namba bilong magasin iumi tekem.
4. Wanem nao kongregeson savve duim sapos staka tumas literature hem stap?
4 Plande Extra Pablikeson Stap: Sapos kongregeson garem staka tumas long samfala pablikeson, literature servant maet laek for chek witim olketa nara kongregeson long area bilong hem for savve sapos olketa kongregeson hia savve iusim olketa pablikeson hia. Olketa pablisa savve offerim olketa old pablikeson long olketa insaed famili wea no Witness, olketa Bible student, and olketa narawan. Olketa wea just start for kaban witim kongregeson maet laekem olketa old pablikeson hia for theocratic library bilong olketa.
5. Hao nao iumi savve showimaot wei for tinghae long olketa pablikeson bilong iumi?
5 Iumi laekem olketa pablikeson bilong iumi for kasem goal bilong hem, hem nao for helpem honest pipol lanem plande samting abaotem olketa nambawan plan bilong Jehovah. Olsem Jesus wea no westem leftova kaikai bihaen hem feedim staka pipol long mirakol wei, goal bilong iumi hem for iusim gud olketa nambawan Bible pablikeson wea iumi kasem. (John 6:11-13) Message for sevem laef insaed olketa pablikeson bilong iumi no savve muvim heart bilong pipol wea raeteous, sapos hem stap nomoa long haos or insaed basket bilong iumi. So, namba bilong olketa pablikeson wea iumi tekem shud no winim wanem iumi fit for iusim long ministry and iumi shud iusim long wisefala wei for helpem nara pipol.—Phil. 4:5.