No Fraet for Preach Long Olketa Man
1. Wanem bigfala need nao stap long wei for lukaftarem Kingdom waka?
1 From distaem hem olketa last day, waka for preach abaotem Kingdom hem gohed for kamap big, dastawe iumi barava needim olketa brata wea fit for leadim disfala preaching waka. (Mark 4:30-32; Acts 20:28; 1 Tim. 3:1-13) Bat long samfala ples, olketa man no interest tumas long gud nius olsem olketa woman. Long samfala kastom, man letem olketa woman nao for tingim olketa spiritual samting and for lanem olketa pikinini. Wanem nao iumi savve duim for helpem olketa man for tingim God and for joinim iumi long trufala worship?
2. Taem Paul and Peter preach long olketa man, wanem gud samting nao kamaot from hard waka bilong tufala?
2 Lukaotem Olketa Man: Taem dadi long haos hem herem gud nius, maet hem helpem samfala long famili for joinim trufala worship. Olsem example, taem Paul and Silas stap long prison, tufala preach long wanfala man wea lukaftarem prison. Man hia and full famili bilong hem nao baptaes. (Acts 16:25-34) Gud samting wea kamap taem Paul preach long Corinth, “Bigman bilong sinagog, wea nem bilong hem Crispus, and evriwan wea stap long haos bilong hem, olketa biliv long Lord.” (Acts 18:8) Jehovah iusim Peter for preach long Cornilius, wanfala bigman long army wea savve “prea strong long God evritaem.” Cornilius witim olketa relative bilong hem and olketa gudfala fren bilong hem nao baptaes.—Acts 10:1-48.
3. For followim example bilong Philip, hu long olketa wea “garem hae position” nao iu savve preach long olketa?
3 Taem iumi preach long olketa man wea garem “hae position” gud samting savve kamaot from datwan. (1 Tim. 2:1, 2) Tingim diswan, angel bilong Jehovah leadim Philip for story long “wanfala bigman” wea lukaftarem selen bilong queen bilong Ethiopia. Philip herem disfala man “readim big datfala profesi wea Isaiah hem raetem” and Philip hem minim gud nius abaotem Jesus long disfala man. Disfala man long Ethiopia kamap wanfala disaepol and maet hem tu talemaot gud nius taem hem gogo bak long ples bilong hem. Maet hem preach tu long datfala queen and olketa wakaman bilong hem, wea no garem chance for herem gud nius.—Acts 8:26-39.
4. Hao nao iumi savve givim chance long olketa man for herem gud nius?
4 Story Witim Olketa Man: From olketa man savve waka long daytaem, waswe, iu savve changem schedule bilong iu for duim preaching waka long olketa evening, weekend, or long olketa holiday? Markem taem for preach long bisnis territory. Datwan mekem iumi garem chance for preach long olketa man wea no evritaem stap long haos. Olketa brata tu savve trae for preach long olketa man wea olketa waka witim. Taem iumi go preach long territory wea iumi preach evritaem, maet olketa brata savve lukaotem chance for story witim eni man wea stap long haos.
5. Wanem nao wanfala sista savve duim taem hem faendem wanfala man wea interest long gud nius?
5 Sapos wanfala sista faendem eni man wea interest, hem mas no go seleva for duim return visit. Maet hem tekem hasband bilong hem or eni nara brata. Taem datfala man gohed gud, sista savve askem eni brata wea fit for study witim datfala man.
6. Hao nao iumi savve followim wei bilong Paul for ‘mekem staka man’ kamap disaepol?
6 Chusim Olketa Topic wea Olketa Man Interest Long Hem: Aposol Paul tingim and changem story bilong hem for fitim olketa wea lisin long hem, ‘mekem staka man’ savve kamap disaepol. (1 Cor. 9:19-23) Iumi tu mas tingim wanem topic nao olketa man bae interest long hem, and maet iumi redyim story bilong iumi for fitim datwan. Olsem example, olketa man nao savve wari saed long selen, gudfala gavman, and for lukaftarem gud famili bilong olketa. Maet olketa interest tu abaotem mining bilong laef, plan bilong God for disfala earth, and why God letem iumi for safa. Pipol bae laek lisin long Kingdom gud nius sapos iumi ting raonem gud firstaem wanem for talem.—Prov. 16:23.
7. Wanem nao olketa long kongregeson savve duim for helpem olketa hasband wea no biliv wea kam long meeting?
7 Showimaot Iu Interest Long Olketa Hasband wea No Worshipim God: Gudfala wei bilong olketa Christian sista savve mekem olketa hasband wea no biliv for worshipim God, and olketa long kongregeson tu savve helpem olketa hasband olsem. (1 Pet. 3:1-4) Taem olketa hasband wea no biliv kam long meeting witim waef bilong olketa, wei wea iumi welkamim olketa savve barava helpem olketa. From hem kam long meeting, datwan showimaot hem interest lelebet for savve abaotem God, and maet hem laek for studyim Bible.
8. Wanem nao olketa brata savve duim for helpem olketa hasband wea no biliv wea no interest tumas long Bible?
8 Maet firstaem, samfala hasband no interest tumas long olketa spiritual samting, bat maet gogo olketa laek for storyim Bible witim wanfala brata wea olketa savve gud long hem. Olketa brata long wanfala kongregeson samfala taem go lukim wanfala famili wea hasband no biliv, and olketa story witim hem abaotem olketa samting wea olketa savve hem interest long hem. Gogo olketa storyim Bible, and distaem disfala man hem baptaes nao. Wanfala brata tu helpem wanfala naes hasband wea no biliv for wakem fence raonem haos bilong hem. Taem brata showimaot interest long hem, disfala hasband studyim Bible nao. (Gal. 6:10; Phil. 2:4) Sapos iu wanfala Christian brata, waswe, iu trae for helpem wan or samfala hasband olsem wea no biliv?
9. Wanem gud samting nao savve kamaot from wei for trainim olketa Christian man hia?
9 Trainim Olketa for Duim Samfala Waka Long Future: Olketa man wea acceptim gud nius and laek for duim moa waka for Jehovah bae kamap olketa “man olsem present,” wea hem nao olketa Christian elder wea iusim savve and strong bilong olketa for lukaftarem kongregeson bilong pipol bilong Jehovah. (Eph. 4:8; Ps. 68:18) Olketa man hia barava willing for lukaftarem kongregeson. (1 Pet. 5:2, 3) Diswan hem nambawan blessing for olketa brata and sista evriwea long world!
10. Hao nao staka pipol kasem gud samting from help wea Ananias givim long Paul?
10 Tingim Saul, hem kamap “aposol for olketa nation,” nomata hem persecutim olketa Christian bifor. (Rom. 11:13) From diswan, disaepol Ananias fraet lelebet for go preach long Saul. Nomata olsem, Ananias duim samting wea Lord talem, and hem go preach long datfala man wea kamap aposol Paul. Long olketa year bihaen, waka wea Paul duim helpem plande thousand pipol wea hem preach long olketa, and plande million pipol gohed for kasem gud samting from olketa leta wea hem raetem wea stap long Bible.—Acts 9:3-19; 2 Tim. 3:16, 17.
11. Why nao iumi willing for changem story bilong iumi, mekem iumi savve preach long olketa man?
11 Iumi mas willing for changem story bilong iumi, mekem iumi no fraet for preach long olketa man. Jehovah bae blessim hard waka wea iumi duim for sapotim Kingdom waka, taem iumi gohed for no fraet for preach long olketa man.