Bigfala Witness Bae Kamap
1. Wanem nao savve mekem olketa visitor tinghae long Memorial? Explainim.
1 Wanem taem? Long naet bilong Memorial. Staka waka nao iumi duim for invaetem pipol kam long Memorial. Hem no just samting wea olketa visitor herem nomoa wea mekem olketa tinghae long Memorial. Bihaen wanfala woman attendim Memorial, hem sei samting hem lukim nao, hem wei wea evriwan kaen long each other, and wei wea olketa volunteer lukaftarem and klinim datfala building. Dastawe nao iumi evriwan, and no brata wea givim tok nomoa, mas givim witness long disfala spesol hipap wea kamap evri year.—Eph. 4:16.
2. Wanem nao iumi wanwan savve duim for givim witness long olketa visitor?
2 Welkamim Olketa Visitor Long Kaenfala Wei: Taem iumi smile and sei hello long olketa visitor long kaenfala wei, datwan givim witness. (John 13:35) Nomata sapos iu no fit for story long evriwan, iu savve meetim pipol wea stap klosap long iu. (Heb. 13:1, 2) Lukaotem olketa visitor wea luk olsem olketa no luksavve long eniwan. Maet olketa kasem nao datfala Memorial pepa wea iumi givimaot finis. Iu savve ask olsem, “Waswe, hem firstaem bilong iu for kam long disfala hipap?” Invaetem olketa for kam sidaon klosap long iu, and redi for ansarem eni kwestin wea maet olketa garem. Sapos kongregeson bilong iu mas lusim datfala ples kwiktaem for nara kongregeson iusim, maet iu sei: “Mi laek for herem tingting bilong iu abaotem Memorial program. Waswe, eni wei for mi meetim iu moa?”
3. Wanem nao iumi savve duim for welkamim olketa wea inactive?
3 Welkamim Olketa wea Inactive: Hem tru, olketa pablisa wea inactive bae kam long Memorial, and tu, samfala wea just attendim Memorial evri year. Welkamim olketa, and letem olketa savve iu barava hapi for lukim olketa. (Rom. 15:7) Olketa elder savve visitim olketa hia no longtaem bihaen Memorial, for encouragem olketa for gohed hipap witim kongregeson. Mifala prea staka pipol wea attendim Memorial bae laek praisem God, no just from wanem olketa herem bat tu, from olketa ‘lukim gudfala samting wea iumi duim.’—1 Pet. 2:12.