Welkamim Olketa wea Kam Long Memorial!
1. Wanem taem nao hem gudfala chance for witness long pipol, and why nao olsem?
1 Long taem bilong Memorial hem gudfala chance for witness long olketa wea kam. Long disfala year, iumi expectim winim ten million pipol bae attendim Memorial evriwea long world, for herem datfala tok abaotem nambawan love wea Jehovah and Jesus showimaot taem tufala provaedem datfala ransom. (John 3:16; 15:13) Olketa bae herem long datfala tok olketa blessing wea olketa savve kasem from datfala ransom. (Isa. 65:21-23) Iumi evriwan garem chance for givim witness long olketa wea kam, and hem no brata wea givim tok nomoa. Iumi savve duim olsem taem iumi welkamim olketa wea kam.—Rom. 15:7.
2. Wanem nao iumi savve duim for welkamim olketa wea kam long Memorial?
2 Bae hem gud tumas sapos iu go and sei hello long olketa wea sidaon klosap long iu winim wei for sidaon kwaet and weitim program for start. Maet olketa wea kam olketa fraet and shame, and no savve wanem nao bae gohed. Taem iumi smile and sei hello long olketa, datwan bae mekem olketa no fraet tumas. Iu savve askem olketa wea kam sapos hem firstaem for olketa kam or sapos olketa savve long eniwan long kongregeson. Diswan bae helpem iu for savve hu nao kam bikos olketa kasem invitation pepa. Iu savve askem hem for kam sidaon witim iu mekem iutufala savve iusim Bible and songbuk bilong iu. Sapos Memorial hem kamap long Kingdom Hall, iu savve tekem hem for lukluk raon long Kingdom Hall. Bihaen long tok, askem hem sapos hem garem eni kwestin. Sapos iufala mas lusim Kingdom Hall kwiktaem bikos nara kongregeson bae kam iusim, maet iu savve sei long hem: “Waswe, hem olraet for iumi story moa narataem abaotem disfala celebration?” Sapos hem laekem, iutufala savve arrangem ples and taem for iutufala story moa. Olketa elder bae lukluk for eni inactive pablisa wea attendim Memorial mekem olketa savve encouragem olketa.
3. Why nao hem important for iumi welkamim olketa wea kam long Memorial?
3 Hem firstaem bilong staka wea kam long Memorial for lukim wei wea pipol bilong Jehovah hapi, garem peace, and wan mind. (Ps. 29:11; Isa. 11:6-9; 65:13, 14) Wanem nao iumi laekem olketa wea kam long Memorial for no forgetim? Wanem iumi duim for welkamim olketa nao iumi laekem olketa for no forgetim.