God Bae ‘Duim Samting wea Hem Laek for Duim’
1. Wanem nao theme for spesol assembly day program for 2012 service year, and why nao hem fitim?
1 Jehovah wakem iumi bikos hem nao wanem hem laek for duim. (Rev. 4:11) Iumi mas lanem and duim samting wea hem laekem. Hem no isi for duim datwan, bikos hem wei bilong iumi man for laek duim “olketa nogud samting wea body laekem and followim tingting bilong iumiseleva” or for “duim olketa samting wea pipol long world duim.” (Eph. 2:3; 1 Pet. 4:3; 2 Pet. 2:10) Sapos God no helpem iumi, bae hem isi nomoa for Satan ‘kasholem iumi for duim wanem hem laekem.’ (2 Tim. 2:26) Spesol assembly day program for 2012 service year, wea start long September 1, 2011, bae helpem iumi evriwan for duim wanfala long thrifala main samting wea Jesus askem long Lord’s Prea wea sei, “duim samting wea iu laek for duim.”—Matt. 6:9, 10.
2. Olketa wanem kwestin nao bae iumi herem ansa bilong olketa?
2 Olketa Kwestin wea Bae Kamap: Taem iumi lisin long olketa tok, herehere for ansa bilong olketa kwestin hia: Iumi mas herem toktok bilong God, bat wanem moa iumi mas duim? Wanem nao iumi savve duim for gohed luksavve long wanem God laekem iumi for duim? Why nao iumi mas willing for helpem evri difren kaen pipol? Wanem nao iu savve duim for hapi and satisfae long laef? Olketa young wan, wanem nao iu mas showimaot long Jehovah? Olketa wanem blessing nao iumi savve kasem taem iumi duim samting wea God laekem? Why nao hem important distaem for strongim and encouragem olketa narawan?
3. Wanem nao iumi savve duim for barava kasem gud samting from disfala assembly?
3 Hem gud for kam long assembly and lisin gud long program. Maet wanfala visiting speaker wea hem wanfala brata long Bethel or wanfala traveling overseer bae kam. Bifor and bihaen long program, no fraet for go story witim hem and waef bilong hem, sapos hem marit. Taem iufala go bak, famili savve reviewim olketa tok long assembly and storyim hao iufala savve waka hard for duim samting God laekem mekem iufala ‘no herem and then forgetim nomoa.’—Jas. 1:25.
4. Why nao hem important for duim wanem God laekem hem main samting long laef bilong iumi?
4 Klosap nao olketa wea aftarem samting wea olketa nomoa laekem and wea no laek duim samting Jehovah laekem bae finis. (1 John 2:17) Iumi thankiu long Jehovah for redyim disfala program wea barava fitim iumi and wea bae helpem iumi for mekem wanem God laekem hem main samting long laef bilong iumi!