Lisin and Lane
1. Why nao iumi mas trae for lisin gud and lane long distrik convention?
1 Klosap nao olketa distrik convention for 2013 bae start. Olketa brata waka hard for redyim wanfala program for helpem olketa brata and sista evriwea long world for deal witim olketa samting wea olketa feisim distaem. Waswe, iu plan finis for kam long thrifala day long convention? Long olketa convention staka samting savve disturbim man, so iumi mas trae for lisin gud long program. Iumi mas trae for lisin gud tu bikos program savve gohed for long taem winim olketa meeting bilong iumi long kongregeson, and maet iumi taed from iumi kam farawe or from nara samting. Wanem nao bae helpem iumi for gohed lisin gud and lane?—Deut. 31:12.
2. Wanem nao iumi savve duim for redyim heart bilong iumi for convention?
2 Bifor Convention Kamap: Convention program and title bilong olketa tok witim wan or tufala main scripture for olketa tok hia hem stap long Web site bilong iumi, www.jw.org. Sapos iumi savve go long Internet, iumi savve lukim diswan bifor convention and datwan bae helpem iumi for redyim heart bilong iumi for wanem iumi bae herem. (Ezra 7:10) Hem gud for famili storyim datfala program long Famili Worship mekem famili savve luk forward for convention.
3. Wanem nao iu savve duim mekem iu lisin gud?
3 Long Taem Bilong Convention: Hem bae gud tumas sapos iumi iusim toilet bifor program hem start winim wei for go olowe long toilet long taem bilong program. Offem mobile phone long taem bilong program mekem iu no kasem olketa kol or text wea bae disturbim iu and mekem iu no tingting for textim narawan. Sapos iu mas keepim mobile bilong iu on, iu shud putim long setting wea bae no disturbim narawan. Sapos iu iusim smol laptop or tablet long taem bilong program, no iusim long wei wea bae disturbim narawan. No kaikai long taem program hem gohed. (Eccl. 3:1) Lukluk long speaker and taem hem readim scripture, luk followim long Bible bilong iu. Hem gud for raetem olketa note.
4. Wanem nao mami and dadi savve duim for helpem pikinini lisin and lane?
4 Iumi laekem olketa pikinini bilong iumi tu for lisin and lane. Proverbs 29:15 hem sei: “Boy wea mami and dadi no stretem bae mekem mami bilong hem shame.” So hem gud for famili sidaon tugeta mekem dadi and mami mek sure pikinini no storystory, text or wakabaot taem program gohed, bat for olketa lisin gud. Nomata sapos pikinini hem smol and no minim gud evri samting long program, mami and dadi savve trainim hem for sidaon kwaet and no sleep.
5. Why nao hem gud for storyim olketa samting wea iumi lanem long program, and wanem taem nao iu savve duim datwan?
5 End Long Each Day: Sapos iu go for visitim olketa nara brata hem gud for kam bak early mekem iu sleep early and rest gud. Taem iu storyim olketa samting wea iu herem datwan savve helpem iu for no forgetim kwiktaem. So hem gud for famili storyim program tugeta tu-thri minute evri evening. Sapos iu go kaikai witim olketa fren, hem gud for tekem olketa note bilong iu and storyim wan or tufala point wea iu barava laekem. Long famili worship bilong iu bihaen long convention, maet famili savve storyim hao for followim wanem iufala herem long program. Iu savve markem taem evri week tu for readim and storyim olketa niu release.
6. Waswe, for attendim convention hem inaf? Storyim datwan.
6 Distrik convention bilong iumi hem olsem wanfala feast. Iumi savve kasem gud samting from wanfala feast taem iumi kaikaim kaikai wea olketa redyim and hem savve strongim body bilong iumi. Long sem wei tu, iumi savve kasem gud samting from convention bilong iumi taem iumi attendim full program, lisin gud and followim wanem iumi lanem.