Bible Savve Teachim Pipol
1. Wanem nao theme bilong circuit assembly for 2014, and iumi bae herem ansa bilong wanem kwestin long datfala program?
1 Jehovah hem Nambawan Teacher bilong iumi. (Isa. 30:20, 21) Wanem nao Jehovah iusim for teachim iumi? Hem givim iumi Bible wea winim eni nara buk. Hao nao wei for followim teaching bilong God savve helpem iumi long physical and spiritual wei, and tu, long tingting and feeling bilong iumi? Iumi bae herem ansa for disfala kwestin long circuit assembly program bilong iumi for 2014 service year. Theme bilong datfala program hem “Bible Savve Teachim Pipol,” wea kam from 2 Timothy 3:16.
2. Olketa wanem kwestin nao bae mekhae long olketa main point long program?
2 Lisin for Olketa Point Hia: Iumi bae herem ansa for olketa kwestin long daon wea mekhae long olketa main point long program:
• Taem iumi followim teaching bilong God, hao nao datwan savve helpem iumi? (Isa. 48:17, 18)
• Wanem gud samting nao bae iumi kasem sapos iumi changem samfala samting long laef bilong iumi for duim full-taem service? (Mal. 3:10)
• Wanem nao iumi mas duim sapos iumi herem olketa “teaching wea difren”? (Heb. 13:9)
• Wanem nao iumi savve duim for followim wei bilong Jesus for teach? (Matt. 7:28, 29)
• Why nao olketa wea teach long kongregeson mas teachim olketa seleva firstaem? (Rom. 2:21)
• Bible savve helpem iumi long wanem wei? (2 Tim. 3:16)
• Wanem nao pipol duim taem Jehovah “sekem” olketa nation? (Hag. 2:6, 7)
• Wanem nao Jehovah trustim iumi for duim? (Eph. 5:1)
• Why nao iumi mas trae hard for gohed followim teaching bilong Jehovah? (Luke 13:24)
3. Why nao hem important for iumi attendim and lisin gud long disfala program?
3 Bifor Paul storyim toktok long 2 Timothy 3:16 wea hem nao theme bilong disfala program, hem storyim olketa nogud samting wea bae happen long olketa last day. Hem sei tu: “Wei bilong olketa nogud man and olketa man for laea bae worse moa. Bae olketa laea long pipol and bae pipol laea long olketa tu.” (2 Tim. 3:13) Hem barava important for iumi lisin long teaching bilong God and for followim, mekem no eniwan laea long iumi! So iumi mas disaed strong for attendim and lisin gud long disfala program wea iumi bae kasem long barava taem.