Kwestin Box

◼ Waswe, hem fitim for pablisa askem pablikeson or Bible study for narawan?

Samfala pablikeson bilong iumi garem spes for man fulimap for askem pablikeson from branch office, or for olketa sendem eni Jehovah’s Witness for go lukim hem. And tu, man savve askem eniwan for studyim Bible witim hem long Web site bilong iumi, www.watchtower.org. Olketa wei hia savve helpem man for savve long truth. Bat samfala problem kamap taem olketa pablisa iusim olketa wei hia for arrangem samwan for go lukim relative or fren, for studyim Bible or givim pablikeson long olketa.

Samfala pipol feel olsem iumi forcem olketa for tekem olketa pablikeson wea olketa no askem and datwan mekem olketa feel nogud. Samfala pablisa feel shame taem samwan wea olketa go lukim hem kros, bikos hem no askem branch office for eniwan go visitim hem. So hem no stret for olketa pablisa fulimap datfala spes wea stap long samfala pablikeson and sendem go long branch office or iusim Web site bilong iumi for askem pablisa for go visitim eniwan, bat hem fitim man wea interest nao mas ask seleva. Sapos olketa long branch office luksavve wanfala pablisa nao hem askem for eniwan go visitim samwan, bae olketa no sendem eniwan.

So wanem nao iumi savve duim for helpem wanfala relative or fren long spiritual wei? Sapos iu laek givim samfala pablikeson long olketa, hem bae gud for iu nao sendem olsem wanfala present. Sapos olketa interest and laekem eni Witness for go lukim olketa bat iu no savve wanem for duim, iu shud fulimap disfala form, Please Go Lukim Man Hia (S-43-SP) and givim long secretary long kongregeson bilong iu and hem bae sendem long branch office. Bat sapos man wea interest hem stap long prison, long mentol hospital or long hospital, iu mas no askem branch office for sendem eniwan for go lukim hem. Iu savve encouragem hem for story witim olketa brata wea savve visit long there or hemseleva nao raet go long branch office.