“Stap Gud Witim Olketa Narawan”
1. Wanem kaonsel long Bible nao iumi shud followim taem iumi meetim man wea kros?
1 Pipol bilong Jehovah laek stap gud witim olketa narawan, and message wea iumi talemaot hem abaotem peace. (Isa. 52:7) Bat samfala taem, pipol wea iumi go for preach long olketa savve kros long iumi. Wanem nao savve helpem iumi for no mekem raoa kamap taem iumi meetim kaen pipol olsem?—Rome 12:18.
2. Why nao hem important for iumi luksavve why man hem kros?
2 Need for Luksavve: Maet samfala kros bikos olketa barava againstim truth, bat samfala maet kros from difren samting. Maet iumi kasem olketa long taem wea no fitim olketa. Maet haosholder garem problem dastawe hem kros. Nomata sapos hem kros from hem no laekem gud nius wea iumi talemaot, iumi shud tingim maet hem kros bikos hem no savve long truth. (2 Cor. 4:4) Wei for luksavve bae helpem iumi for no kros and minim why nao man hem kros.—Prov. 19:11.
3. Wanem nao iumi savve duim for showimaot iumi respectim haosholder?
3 Showimaot Respect: Staka pipol long territory strong for followim religion bilong olketa. (2 Cor. 10:4) Olketa seleva savve disaed sapos olketa bae lisin long iumi or nomoa. Iumi mas no tok daonem biliv bilong haosholder or mekem hem feel olsem iumi savve long Bible winim hem. Sapos hem talem iumi for go, iumi shud respectim datwan.
4. Wanem nao iumi savve duim for kaen long haosholder nomata hem tok spoelem iumi?
4 Wei for Kaen: Nomata sapos haosholder tok spoelem iumi, iumi shud kaen and no kros. (Col. 4:6; 1 Pet. 2:23) Iumi shud trae for storyim samting wea iumi agree long hem, and no argue. Maet iumi savve askem hem long kaenfala wei why nao hem kros long iumi. Bat samfala taem hem gud for leavim hem mekem hem no kros go moa.—Prov. 9:7; 17:14.
5. Wanem gud samting nao savve kamaot taem iumi stap gud witim pipol long ministry?
5 Sapos iumi showimaot iumi laek stap gud witim olketa narawan, maet bae haosholder tingim datwan and lisin long narawan wea kam for preach long hem next taem. (Rome 12:20, 21) Nomata luk olsem hem barava againstim iumi, maet wan day hem bae kamap brata bilong iumi. (Gal. 1:13, 14) Nomata sapos bae hem interest long truth or nomoa, iumi bae mekhae long Jehovah and helpem pipol for tinghae long truth sapos iumi kontrolem iumi seleva and no raoa witim pipol.—2 Cor. 6:3.