Olketa Distrik Convention Savve Mekem Olketa Tru Samting Showaot Klia
1. Olketa festival wea olketa Israelite garem evri year, givim olketa chance for ting raonem and storyim olketa wanem olketa tru samting?
1 Olketa Israelite bifor savve hipap for olketa festival thrifala taem evri year. Nomata olketa man nomoa mas go long Jerusalem for olketa festival olsem, bat staka taem full famili savve go tu. (Deut. 16:15, 16) Olketa hipap olsem givim chance long olketa Israelite for ting raonem and storyim olketa tru samting. Wanem nao samfala long olketa tru samting hia? Wanfala samting hem wei wea Jehovah hem showimaot love and givim evri samting wea olketa needim. (Deut. 15:4, 5) Nara samting hem wei wea olketa savve trustim Jehovah for leadim and protectim olketa. (Deut. 32:9, 10) And tu, olketa savve tingim hao from olketa pipol bilong Jehovah, olketa mas showimaot wei bilong Jehovah long laef bilong olketa. (Deut. 7:6, 11) Distaem tu, iumi kasem gud samting from olketa distrik convention evri year.
2. Hao nao distrik convention bae helpem iumi for minim olketa tru samting from Bible?
2 Convention Helpem Iumi for Minim Olketa Tru Samting: Long olketa distrik convention iumi enjoyim olketa tok, olketa interview, drama and olketa demonstration wea savve helpem iumi for minim and followim olketa tru samting from Bible. (John 17:17) Olketa brata redyim staka samting finis for convention wea bae kamap long disfala year. Organization bilong Jehovah redyim olketa tok wea bae helpem evriwan wea kam long convention. (Matt. 24:45-47) Waswe, iu luk forward for olketa tok wea bae kamap?
3. Wanem nao iumi savve duim for kasem gud samting from convention?
3 Iumi bae barava kasem gud samting sapos iu kam long thrifala day evriwan long convention and lisin gud. Hem gud for story witim boss for askem taem off from waka, sapos iu no duim yet. Trae for sleep early long naet mekem taem iu kam long convention long next day iu lisin gud long olketa tok. Mek sure mobile phone bilong iu no ring nogud hem disturbim iu or narawan. Hem gud for sidaon kwaet, no text long mobile phone, no kaikai or drink long taem program hem gohed.
4. Wanem nao olketa mami and dadi savve duim for helpem pikinini bilong olketa long taem bilong convention?
4 Taem olketa Israelite famili hipap long Festival bilong Olketa Smol Leaf Haos olketa tekem olketa pikinini bilong olketa “for olketa savve lisin and lane” taem olketa readim Law. (Deut. 31:12) Hem naes for lukim evriwan long famili sidaon tugeta and olketa young wan sidaon kwaet and lisin gud. Long evening hem gud for famili lukim wanem nao olketa raetem, and storyim olketa point from olketa tok wea olketa interest long hem. Hem gud for olketa dadi and mami lukaftarem pikinini bilong olketa long taem bilong spel and long ples wea olketa stap, bikos olketa pikinini savve duim “krangge” samting taem olketa stap seleva.—Prov. 22:15; 29:15.
5. Hao nao gudfala wei bilong iumi long ples wea iumi stap mekhae long olketa tru samting?
5 Gudfala Wei Bilong Iumi Mekhae Long Olketa Tru Samting: Gudfala wei bilong iumi long ples or taon wea convention kamap savve mekhae long olketa tru samting. (Titus 2:10) Olketa wakaman long olketa hotel tinghae long pipol wea followim olketa rul long hotel, and wea showimaot olketa patient and kaen long olketa wakaman. (Col. 4:6) Taem samfala brata long Bethel go story witim wanfala manager long wanfala hotel, datfala woman hem sei: “Mifala laekem iufala for kam long hotel bilong mifala bikos iufala olketa gud pipol. Olketa Jehovah’s Witness kaen and showim respect long olketa wakaman and olketa lukaftarem ples tu.”
6. Hao nao kaleko wea iumi werem long ples or taon wea convention kamap mekhae long olketa tru samting?
6 Taem iumi werem convention badge, datwan hem for pipol savve iumi garem wanfala convention and for olketa nara brata and sista for luksavve hu nao iumi, and tu, hem for givim witness for olketa wea lukim iumi. Pipol long ples or taon wea convention kamap luksavve olketa wea werem convention badge, olketa bae werem naes kaleko, olketa luk klin and no ova tumas for werem style kaleko wea big tumas long world distaem. (1 Tim. 2:9, 10) Dastawe, iumi mas mek sure lukluk bilong iumi and kaleko wea iumi werem long ples or taon wea convention kamap hem luk gud. Nomata taem iumi long convention, kaleko bilong iumi mas showimaot respect. Sapos long evening iumi laek for go lukim narawan or go kaikai samwea iumi mas tingim iumi kam for convention and iumi mas evritaem werem kaleko wea fitim.
7. Wanem nao wanfala wei for showimaot iumi tinghae long olketa brata and sista bilong iumi long taem bilong convention?
7 Taem olketa Israelite go long olketa festival evri year, olketa hapi for associate witim olketa Jew wea kam from olketa nara ples long Israel, and olketa nara kantri long world and datwan mekem olketa for garem wan mind. (Acts 2:1, 5) Long taem bilong olketa distrik convention nao pipol savve lukim wei wea olketa Christian brata and sista stap gud tugeta. Staka taem datwan nao pipol wea lukim tinghae long hem. (Ps. 133:1) Long lunch taem, hem gud for story witim olketa wea sidaon klosap long iumi and for go meetim olketa narawan. Dastawe, hem gud for holem kam kaikai for lunch winim wei for go aot for peim kaikai.
8. Why nao hem gud for volunteer sapos iumi fit for duim?
8 Pipol wea kam long convention tinghae long wei wea evri samting long convention gohed gud, and evriwan wea waka olketa volunteer nomoa. Waswe, iu willing for waka long taem bilong convention? (Ps. 110:3) Staka taem full famili savve volunteer for waka tugeta mekem olketa pikinini lane for duim samting for olketa narawan. Sapos iu man for savve shame, wei for waka long convention hem gud wei for iu meetim olketa nara brata and sista. Wanfala sista hem sei: “Mi savve long famili bilong mi and tu-thri fren nomoa. Bat taem mi help for duim klining, mi start for savve long staka brata and sista! Mi barava enjoyim!” Taem iu volunteer for waka long taem bilong convention, datwan savve helpem iu for savve moa long samfala brata and sista and iu bae barava hapi. (2 Cor. 6:12, 13) Sapos iu laek for volunteer, askem olketa elder for wanem nao iu savve duim.
9. Wanem nao iumi bae duim for invaetem pipol for kam long convention?
9 Invaetem Olketa Narawan for Herem Olketa Tru Samting: Olsem iumi savve duim long olketa year bifor, thrifala week bifor convention, iumi bae duim wanfala spesol waka for invaetem pipol for kam. Olketa kongregeson bae laek for givimaot datfala invitation long evri territory bilong olketa sapos hem fitim. (Lukim box “Hao Nao for Iumi Offerim Disfala Invitation Pepa?”) Holem kam long convention eni invitation wea iufala no givimaot. Then olketa brata and sista wea kam for convention savve iusim for story long eniwan wea olketa meetim long ples wea olketa stap.
10. Storyim samfala experience wea showimaot waka for givimaot invitation evri year hem gud samting.
10 Waswe, pipol kam long convention taem iumi invaetem olketa? Long wanfala convention, wanfala hasband and waef talem long wanfala attendant hao tufala kam long convention bikos samwan givim pepa long tufala. Tufala tingse maet bae hem interesting for go long datfala convention, so tufala draev for winim 320 kilometer. Long nara story, wanfala sista givim invitation pepa long wanfala man taem sista hia duim preaching waka. Datfala man interest for savve abaotem datfala convention, so sista storyim datfala invitation witim hem. Tu-thri day bihaen, taem sista go long convention, hem lukim nao datfala man and fren bilong hem and tufala holem wanfala niu release.
11. Why nao hem important for go long distrik convention evri year?
11 Olketa festival wea kamap thrifala taem evri year, hem wanfala wei wea Jehovah showimaot love and helpem olketa Israelite for “worshipim hem long stretfala wei and followim olketa tru samting.” (Josh. 24:14) Wei wea iumi go long convention evri year helpem iumi gohed “followim olketa tru teaching,” and hem important part long worship bilong iumi. (3 John 3) Jehovah bae blessim hard waka bilong evri brata and sista wea kam long convention, and evriwan bae kasem gud samting.
[Blurb long page 4]
Gudfala wei bilong iumi long ples or taon wea convention kamap savve mekhae long olketa tru samting
[Blurb long page 5]
Thrifala week bifor convention, iumi bae duim wanfala spesol waka for invaetem pipol for kam
[Box long page 3-6]
Olketa Reminder for 2012 Distrik Convention
◼ Taem Bilong Convention Program: Long thrifala day evriwan, program bae start long 9:20 a.m. Olketa door bae open long 8:00 a.m. Taem music hem start, hem gud for iumi evriwan sidaon, mekem taem program hem start evri samting gohed gud. Long Friday and Saturday, program bae finis long 4:55 p.m., and long Sunday program bae finis long 3:40 p.m.
◼ Markem Ples for Sidaon: Iu savve keepim nomoa ples for sidaon for famili bilong iu, olketa wea kam witim iu or eni Bible student bilong iu.—1 Cor. 13:5.
◼ Kaikai for Lunch: Plis tekem kam kaikai mekem iu no go aot from convention for peim kaikai long taem for spel. Putim basket kaikai long ples wea bae no disturbim eniwan. Tekem smol basket kaikai wea fitim nomoa and no tekem kam glass container.
◼ Donation: Iumi savve showimaot iumi tinghae long convention taem iumi willing for givim donation for waka evriwea long world long taem bilong convention. Sapos eniwan laek givim cheque, hem mas raetem “Jehovah’s Witnesses of the Solomon Islands Trust Board.”
◼ Accident and Emergency: Long convention, sapos eniwan needim help saed long medical, plis lukim wanfala attendant wea bae stretawe talem First Aid Department, mekem olketa wea savve saed long diswan lukluk long man wea sik and givim help wea fitim. Sapos man needim ambulance then First Aid Department savve ringim olketa.
◼ Medicine: Sapos iu needim spesol medicine for sik bilong iu hem gud for iu holem kam datfala medicine.
◼ Plis Go Lukim Man Hia (S-43-SP) Form: Sapos long taem bilong convention, iu witness long wanfala man and hem interest, then iu savve fulimap disfala form, Plis Go Lukim Man Hia. Olketa pablisa shud tekem kam wan or tufala form olsem long convention. Iu savve givim olketa form wea iu fulimap long brata wea waka long bukrum or secretary long kongregeson.
◼ Volunteer: Sapos eniwan laek volunteer for waka, hem savve go lukim Volunteer Service Department long convention. Olketa pikinini wea no kasem 16 year yet savve help sapos olketa waka witim mami and dadi or olketa nara mature pablisa.
[Box long page 6]
Hao Nao for Iumi Offerim Disfala Invitation Pepa?
For iumi duim full territory bilong iumi, hem gud for no story tumas. Maet iumi sei olsem: “Mifala duim wanfala waka wea gohed evriwea long world for givimaot disfala invitation pepa. Diswan hem bilong iu. Disfala pepa hem storyim staka samting moa abaotem diswan.” Showimaot iu interest long samting wea iu storyim. Taem iu givimaot invitation pepa long olketa weekend, offerim olketa magasin sapos hem fitim.