Kamap Gud Long Ministry​—Raetem Information Abaotem Man wea Interest

“Lukluk gud evritaem long iuseleva and long samting wea iu teachim.” (1 Tim. 4:16) Disfala toktok bilong aposol Paul for Timothy showimaot iumi shud traem best for kamap gud long ministry, nomata iumi just start nomoa for duim disfala waka or iumi duim for longtaem finis. For helpem iumi long diswan, wanfala article wea garem title “Kamap Gud Long Ministry” bae kamap long olketa Kingdom Ministry Bilong Iumi. Each article bae storyim why hem important for duim wanfala samting long ministry and hao for duim datwan. Long month wea datfala article kamap, iumi evriwan bae traem best for followim wanem article hia storyim. Long end bilong datfala month, wanfala part bae kamap long Service Meeting wea bae givim iumi chance for storyim gud samting wea iumi kasem from iumi duim datwan. For month bilong February, bae hem gud for raetem information abaotem man wea interest.

Why Hem Important: For duim gud waka bilong iumi, iumi no preach nomoa bat iumi mas go bak long pipol wea interest and teachim olketa. Datwan hem olsem iumi watarem seed wea iumi plantim. (Matt. 28:19, 20; 1 Cor. 3:6-9) So iumi mas go bak long man wea interest, storyim olketa samting wea hem wari abaotem, and storyim moa gud nius. Dastawe, taem iumi meetim samwan wea interest hem important for raetem information abaotem datfala man.