Duim Return Visit Long Olketa wea Interest
1. Hao nao iumi savve helpem pipol wea iumi meetim wea interest?
1 Man wea plantim olketa seed long garden mas watarem, for olketa seed hia grow. Hem semsem tu witim pipol wea iumi meetim long territory wea interest long message bilong iumi. (1 Cor. 3:6) Sapos iumi laek for mekem interest bilong olketa tokpiksa seed hia for grow, iumi mas go bak long olketa and iusim Word bilong God for watarem olketa.
2. Wanem nao iu savve duim mekem haosholder interest taem iu go bak lukim hem?
2 Askem Kwestin: Taem iu redyim story for preaching waka, hem bae gud for redyim tu wanfala kwestin wea haosholder bae interest long hem taem iu go bak for duim return visit. Askem datfala kwestin long end bilong story bilong iutufala, and markem taem for go bak lukim hem. Samfala iusim wanfala point insaed Wanem Bible Teachim buk for showim hao for duim Bible study.
3. Wanem nao samfala samting wea iu savve raetem abaotem samwan wea interest?
3 Raetem Record: Taem iu leavim datfala haosholder, raetem daon olketa samting wea iufala storyim. Raetem nem and wea nao hem stap. Raetem day and taem wea iu preach long hem, wanem iufala storyim, and sapos hem tekem eni buk, iu savve raetem datwan tu. Iu savve raetem tu religion bilong hem and sapos hem marit and garem eni pikinini. Raetem sapos hem storyim problem or eni samting wea hem interest long hem. Olketa samting hia savve helpem iu for storyim samfala point wea hem interest long hem taem iu go bak for lukim hem. Raetem tu taem wea iu markem for go bak and kwestin wea iu askem.
4. Why nao iumi shud no givap taem iumi go bak long olketa wea interest?
4 No Givap: Satan bae gohed for trae ‘tekaotem datfala message’ wea olsem seed wea stap long heart bilong wanfala man. (Mark 4:14, 15) Dastawe, iu mas no givap sapos iu go bak staka taem, bat datfala man no stap long haos. Iu savve raetem note or leavim wanfala message. Wanfala pioneer startim study witim wanfala woman wea hem meetim long preaching waka, bat evritaem hem go bak, datfala woman no stap, so hem raetem leta long hem. Bat gogo, taem sista hia lukim disfala woman long haos, hem sei hem barava hapi long wei wea disfala sista tingim hem. Sapos iumi watarem seed bilong truth wea stap long heart bilong man wea interest, iumi savve kasem hapi taem iumi lukim hem grow for kamap wanfala mature Christian, and gogo hem “garem thirti frut, samfala sixti, and samfala handred.”—Mark 4:20.