Iusim Gud Olketa Old Magasin
Winim wei for keepim staka old magasin or just torowem nomoa, hem gud for givimaot long pipol. Wanfala magasin nomoa savve helpem man for interest long truth and mekem hem laek for worshipim Jehovah. (Rome 10:13, 14) Bae iumi storyim samfala idea for iusim gud olketa old magasin.
Taem iumi preach long territory wea iumi no savve duim olowe, maet hem gud for leavim wanfala magasin long haos wea pipol no stap.
Taem iumi duim pablik witnessing long ples wea pipol weit for bas or transport, or weit long wharf, showim tu-thri old magasin long man and letem hem chusim which wan nao hem laekem.
Taem iumi go long clinic or eni nara ples wea iumi mas weit, wea hem insaed territory bilong iumi, iu savve leavim tu-thri old magasin long there. Hem gud for askem firstaem samwan wea waka long there bifor iu leavim olketa magasin. Sapos eniwan leavim olketa magasin finis, no leavim olketa nara magasin.
Bifor iu go long olketa return visit bilong iu, tingim wanem subject nao bae hem interest long hem. Waswe, hem marit and garem pikinini? Waswe, hem interest for savve abaotem olketa nara kantri? Waswe, hem interest long farming? Lukim sapos eni article stap long olketa old magasin wea maet return visit bilong iu interest long hem and givim long hem.
Sapos return visit bilong iu no stap staka taem, taem iu meetim hem moa, iu savve givim hem samfala old magasin wea hem no kasem yet.