Kwestin Box
◼ Wanem nao pikinini mas lanem for mekem hem kamap mature Christian?
For “stretem and trainim olketa [pikinini] followim samting wea Jehovah talem,” olketa Christian dadi and mami mas duim staka samting. (Eph. 6:4) Olsem example, parents luksavve olketa pikinini kasem gud samting taem olketa duim text tugeta evri morning. Long taem bilong famili worship and long olketa narataem, maet famili savve lukim wanfala video and story raonem, storyim wanfala article from Young People Ask, actim olketa story long Bible, or practicem hao for storyim biliv bilong olketa long narawan. Bat for olketa pikinini “kamap mature,” mami and dadi mas teachim olketa pikinini olketa deep samting long Bible tu.—Heb. 6:1.
Tingim, taem iumi preach iumi trae for startim Bible study and iumi iusim Wanem Nao Really Samting wea Bible Teachim? buk for study witim pipol. Bihaen olketa finis for studyim datfala buk, iumi iusim “Gohed Kasem Gud Samting From Love Bilong God” buk. Why nao iumi duim datwan? Bikos Wanem Bible Teachim buk helpem olketa Bible study for savve long olketa main teaching long Bible. “Love Bilong God” buk teachim olketa hao for followim olketa Bible principle long laef bilong olketa. Tufala buk hia bae helpem olketa Bible study for kamap strongfala Christian and “for garem bigfala faith.” (Col. 2:6, 7) Disfala information savve helpem olketa pikinini bilong iumi tu. Iumi laekem olketa for lane abaotem ransom, datfala Kingdom, and wanem nao happen long man bihaen hem dae. Hem important tu for olketa pikinini savve why God letem pipol for safa and hao for luksavve iumi stap long olketa last day bilong disfala world. And tu, olketa mas barava sure Olketa Jehovah’s Witness teachim olketa tru samting. Olketa young wan shud savve hao for followim olketa Bible principle and hao for “iusim evritaem tingting bilong olketa for luksavve long samting.” (Heb. 5:14) Taem dadi and mami teachim pikinini, tufala mas tingim age and savve bilong pikinini and storyim samting wea fitim hem. Bat hem gud for tufala luksavve tu samfala pikinini savve lanem olketa deep samting abaotem God nomata olketa smol yet.—Luke 2:42, 46, 47.
Long jw.org Web site, hem bae garem samting for helpem olketa dadi and mami studyim Wanem Bible Teachim buk witim olketa pikinini. For lukim diswan iufala savve go long jw.org, then go long BIBLE TEACHINGS > TEENAGERS. Gogo bae Web site garem samting for helpem parents for studyim “Love Bilong God” buk tu witim olketa pikinini. Iufala savve iusim diswan or iusim eniwan long tufala buk hia for study witim olketa pikinini. Dadi and mami savve disaed sapos olketa bae iusim information hia for study witim olketa pikinini wanwan, for trainim pikinini for duim study seleva, or iusim lelebet taem long Famili Worship for study.