Sevenfala Wei for Kasem Gud Samting From Bible Reading

“Bible hem buk wea plande pipol baem, and evri year hem main buk wea olketa salem winim eni nara buk.”​​—⁠TIME MAGASIN.

“Samfala taem mi readim Bible, bat hem boring tumas long mi.” ​​—⁠KEITH, MAN FROM ENGLAND WEA PLEIM MUSIC WEA STAKA SAVVE LONG HEM.

STAKA pipol garem Bible bat olketa sei olketa no kasem gud samting taem olketa readim. Bat olketa narawan tinghae long wanem olketa readim long Bible. Tingim disfala samting wea Nancy talem: “Evri morning taem mi readim Bible and ting raonem, datwan barava helpem mi sapos problem kamap long datfala day. Hem barava helpem mi taem mi feel wikdaon winim eni nara samting wea mi traem long 35 year wea go pas.”

Nomata sapos iu no readim Bible enitaem, waswe, iu interest for savve why nao olketa narawan kasem gud samting taem olketa readim? Sapos iu readim Bible distaem, waswe, iu laek for kasem staka nara gud samting from datwan? Sapos olsem, traem sevenfala wei wea disfala article storyim.

1 Garem stretfala reason for readim Bible

◼ Maet iu readim Bible olsem wanfala story buk nomoa, or iu readim from olketa narawan readim, or from iu laek savve sapos hem bae helpem iu long disfala nogud world. Bat iu bae kasem gud samting sapos goal bilong iu hem for lanem tru samting abaotem God. Iu bae kasem gud samting tu sapos iu readim Bible bikos iu laek savve sapos message insaed savve helpem iu.

Hem important for garem stretfala reason for readim Bible. Tingim Bible olsem wanfala mirror. James sei: “Sapos man herem toktok bilong God bat hem nating duim eni samting, hem olsem man wea lukim feis bilong hem long mirror bat no duim eni samting. Hem lukim hemseleva bat taem hem go, semtaem nomoa hem forgetim hao hem luk. Bat man wea lukluk long perfect law wea mekem man free and gohed duim wanem law talem, bae hem hapi bikos hem no herem nomoa bat hem duim wanem law talem.”​—⁠James 1:​23-​25.

Man hia wea lukluk long mirror lukim feis bilong hem bat hem no duim eni samting for stretem lukluk bilong hem. Maet hem kwiktaem for luk insaed mirror nomoa, or maet hem les for changem eni samting wea hem lukim. Long sem wei tu, sapos iumi readim Bible samfala taem or no followim wanem iumi readim, bae iumi no kasem staka gud samting. Bat iumi bae hapi tumas sapos iumi lukluk long Bible from iumi laek “duim” wanem Bible talem and followim tingting and wei bilong God.

2 Chusim gudfala Bible transleison

◼ Maet iu garem staka Bible transleison long languis bilong iu. Eni Bible transleison iu iusim savve helpem iu, bat samfala transleison garem olketa oldfala toktok or toktok wea man wea skul gud nomoa bae minim. (Acts 4:​13) Samfala Bible transleison change followim olketa kastom bilong man and no garem tru message. Samfala aotem nem bilong God, Jehovah, from Bible and changem for “God” or “Lord.” So taem iu chusim Bible transleison for readim, chusim wanfala wea olketa transleitim stret, wea isi for minim, and wea bae mekem iu laek gohed for readim.

Staka pipol sei New World Translation nao hem Bible olsem.a Tingim wanfala olo man long Bulgaria. Hem go long meeting bilong Olketa Jehovah’s Witness and samwan givim hem New World Translation Bible. Bihaen, hem sei: “Mi readim Bible for staka year, bat no enitaem mi readim Bible transleison wea isi for minim and wea barava kasem heart bilong mi.”

3 Prea

◼ Iu savve minim gud Bible sapos iu askem God for helpem iu, olsem man wea raetem psalm hem sei: “Openem eye bilong mi, mekem mi savve lukim olketa nambawan samting wea law bilong iu teachim.” (Psalm 119:18) Evritaem iu readim Bible, prea long God and askem hem for helpem iu minim wanem iu readim. Iu savve thankiu long hem tu from hem givim kam Bible, bikos sapos nomoa, hard for iumi savve long God.​—⁠Psalm 119:⁠62.

Waswe, God herem prea olsem? Tingim wanem hem happen long tufala really sista long Uruguay. Taem tufala young gele hia readim Daniel 2:​44, tufala no minim, so tufala prea long God for sendem samwan for helpem olketa minim datwan. Then nomoa, tufala Jehovah’s Witness kam long haos bilong tufala, readim scripture wea tufala prea abaotem, and minim long tufala hao Kingdom bilong God bae changem olketa gavman bilong man.b Tufala sista hia barava bilivim God nao ansarem prea bilong olketa.

4 Readim evriday

◼ Staka pipol laek readim Bible nomoa taem nogud samting happen. Wanfala man wea pablisim olketa buk hem sei bihaen olketa terrorist attak long America long September 11, 2001, “staka pipol nao baem Bible.” Bat Bible encouragem iumi for readim evriday bikos hem sei: “Iu mas tingim evritaem disfala buk bilong law and iu mas readim and ting raonem day and naet mekem iu duim evri samting wea law talem. Sapos iu duim olsem, iu bae wise and evri samting wea iu duim bae gohed gud.”​—⁠Joshua 1:⁠8.

Taem iu readim Bible evriday, bae iu kasem gud samting. Tingim man wea bihaen hem heart attak hem disaed for kaikaim olketa gudfala kaikai. Waswe, bae hem kasem gud samting sapos hem kaikaim gudfala kaikai taem hem kasem pain nomoa? Nomoa. Sapos hem no laek heart attak moa, hem mas kaikaim gudfala kaikai evriday. Hem semsem tu for iumi. Wei for readim Bible evriday bae mekem ‘evri samting wea iumi duim gohed gud.’

5 Changem wei for duim Bible reading

◼ Hem gud for readim Bible from Genesis go kasem Revelation, bat maet iu savve iusim samfala nara wei tu for duim Bible reading. Iu savve followim samfala wei hia.

Readim story abaotem samwan long Bible. Readim olketa chapter or buk wea story abaotem samwan wea worshipim God, olsem:

• Joseph: Genesis 37-​50.

• Ruth: Ruth 1-3.

• Jesus: Matthew 1-​28; Mark 1-​16; Luke 1-​24; John 1-​21.c

Chusim topic. Readim olketa scripture wea storyim datfala topic. Olsem example, duim research abaotem prea, and then readim kaonsel wea Bible talem abaotem prea and samfala prea wea stap long Bible.d

Read big. Taem iu read big, datwan savve helpem iu. (Revelation 1:⁠3) Maet evriwan long famili savve share for read tugeta. Each wan savve readim paragraf or toktok bilong wanfala man long Bible. Samfala laek lisin long Bible reading long CD. Wanfala woman sei: “Mi faendem hem hard for mi startim Bible reading bilong mi, so mi start for lisin long Bible reading long CD. Distaem mi enjoyim tumas wei for readim Bible winim eni story buk.”

6 Ting raonem wanem iu readim

◼ From iumi evriwan busy tumas distaem, iumi no garem staka taem for ting raonem samting. Bat olsem bele bilong iumi mas pisisim kaikai mekem body hem strong, iumi tu mas ting raonem wanem iumi readim long Bible mekem iumi kasem gud samting from datwan. Taem iumi readim Bible, maet iumi savve tingim olketa kwestin olsem: ‘Wanem nao mi lanem abaotem Jehovah God? Hao nao mi savve followim scripture wea mi readim? Hao nao mi savve iusim datfala scripture for helpem narawan?’

Taem iumi ting raonem Bible olsem, wanem iumi readim savve kasem heart bilong iumi and mekem iumi interest for gohed readim Bible. Psalm 119:97 sei: “Mi laekem tumas law bilong iu! Hem nao samting wea mi ting raonem long full day.” Man wea raetem psalm ting raonem olketa toktok bilong God evriday. Datwan mekem hem for barava tinghae long wanem hem lanem.

7 Askem samwan for helpem iu minim Bible

◼ God no sei iumiseleva mas trae hard for minim Bible. Bible sei: “Samfala samting hem hard for man minim.” (2 Peter 3:​16) Buk bilong Acts storyim wanfala bigman bilong Ethiopia no minim wanfala part long Bible wea hem readim. God sendem wanfala wakaman bilong Hem for helpem datfala man. From datwan, datfala bigman bilong Ethiopia “hapi tumas and gohed long gogo bilong hem.”​—⁠Acts 8:​26-​39.

Iu tu savve kasem gud samting from Bible reading sapos iu askem samwan for helpem iu minim wanem iu readim. Askem Olketa Jehovah’s Witness wea stap long ples bilong iu, or iusim address long page 4 long disfala magasin for askem free Bible study.

[Footnotes]