Tingim Wanem Iuseleva Savve Duim for Talemaot Message Abaotem Kingdom!

1. Wanem nao iumi lanem from example bilong David?

¹ King David no savve letem eni samting wea happen for stopem olketa plan bilong hem. Olsem example, David laek for buildim wanfala temple for Jehovah. From Jehovah no letem David for duim datwan, David tingim nara samting wea hem savve duim, so hem givim samfala samting long Solomon for buildim datfala temple. (1 Ki. 8:17-19; 1 Chron. 29:3-9) Winim wei for tingim nomoa wanem hem no savve duim, David tingim wanem hem fit for duim. Hao nao example bilong David savve helpem iumi taem iumi tingim wanem iumi savve duim for talemaot message abaotem Kingdom?

2. Wanem nao iumi savve ting raonem?

² Duim Wanem Iu Fit for Duim: Staka brata and sista changem samfala samting long laef bilong olketa mekem olketa savve auxiliary or regular pioneer. (Matt. 6:22) Waswe, iu tu savve duim datwan? Taem iu ting raonem living bilong iu and prea abaotem wanem iu fit for duim, maet iu luksavve iu garem “chance for duim” datfala waka. Sapos olsem, iusim datfala chance!—1 Cor. 16:8, 9.

3. Nomata iumi no savve pioneer, wanem nao samfala chance wea iumi garem for preach?

³ Bat waswe sapos iu no savve duim pioneer waka? Hem gud for tingim olketa nara samting wea iu savve duim. Olsem example, sapos iu meetim pipol wea no Witness long waka bilong iu, waswe, iu savve preach long olketa long taem wea hem fitim? Or sapos iu garem health problem, waswe, iu savve preach long doctor or nurse bilong iu? Tingim tu olketa wea olo or garem bigfala sik wea no savve duim staka samting long ministry, olketa savve reportim 15, 30, or 45 minute sapos olketa no savve reportim wanfala full hour insaed long month. Taem iu raetem field service report bilong iu, raetem olketa taem wea iu duim enitaem witnessing and olketa pablikeson wea iu offerim, and mek sure iu raetem tu olketa tract, Memorial and convention invitation pepa wea iu offerim. Sapos iu tingim olketa taem wea iu duim enitaem witnessing bae iu sapraes for lukim iu duim staka hour long ministry!

4. Wanem nao iuseleva disaed for duim?

⁴ Nomata iumi savve pioneer or nomoa, iumi laek for iusim evri chance wea iumi garem for talemaot gud nius abaotem Kingdom. Taem iumi duim olsem, iumi bae hapi and satisfae bikos iumi savve iumi duim wanem iumi fit for duim for talemaot gud nius abaotem Kingdom.—Mark 14:8; Luke 21:2-4.