Waswe, Iu Fit for Go Insaed Long “Bigfala Door wea Lead Go for Waka”?
1. Wanem “bigfala door wea lead go long waka” nao hem open long iumi?
1 Taem “bigfala door wea lead go for waka” hem open long aposol Paul, hem barava laek for iusim gud datfala chance for duim waka for Kingdom bilong God nomata plande pipol againstim hem. (1 Cor. 16:9) Distaem samting olsem 642,000 Kingdom pablisa evriwea long world go insaed finis long bigfala door wea lead go long waka, long wei wea olketa duim regular pioneer.
2. Why nao hem gud evritaem for iumi tingting gud abaotem laef bilong iumi?
2 Living Savve Change: Nomata living bilong iumi distaem maet stopem waka bilong iumi, datwan savve change. Dastawe, hem barava important evritaem for iumi tingting gud abaotem laef bilong iumiseleva and no weitim taem bilong gudfala living. (Eccl. 11:4) Waswe, iu wanfala young wan wea redi for graduate from hae skul? Waswe, iu wanfala dadi or mami wea olketa pikinini bilong iu bae start for attendim skul? Waswe, iu klosap for finis from waka bilong iu? Olketa change hia long living bilong iu maet givim inaf taem for iu duim regular pioneer. Wanfala sista wea age bilong hem 89 wea bifor hem garem problem saed long health bilong hem, disaed for joinim pioneer service. Why nao olsem? From wan year finis hem no go long hospital, hem tingim hao health bilong hem bae letem hem nomoa for pioneer.
3. Long wanem wei nao samfala mekem change long living bilong olketa for duim regular pioneer?
3 Firstaem Paul hem plan for visitim olketa brata bilong hem long Corinth. Bat, hem changem olketa plan bilong hem for saed bilong gud nius. Distaem, plande wea duim regular pioneer mekem finis samfala change long living bilong olketa mekem olketa fit for pioneer. Samfala mekem laef bilong olketa hem moa simpol mekem olketa needim part-taem waka nomoa for meetim kost saed long living. Olketa kasem bigfala hapi long privilege bilong olketa insaed pioneer service. (1 Tim. 6:6-8) Samfala wea marit finis mekem samfala change long living bilong olketa long wei wea hasband nomoa hem need for waka wea givim chance for waef bilong hem for pioneer.
4. Wanem nao iumi savve duim sapos iumi no sure iumi savve kasem goal bilong hour for olketa pioneer?
4 No hol bak for duim pioneer waka bikos iu tingse hao bae iu no kasem hour bilong hem. For duim diswan iu need for duim tufala hour nomoa insaed long wan day. Sapos iu no sure iu savve duim datwan, iu savve markem goal bilong iu for 70 hour for wanfala month or winim taem iu duim auxiliary pioneer. Diswan hem mekem iu for kasem hapi bilong pioneer waka. (Ps. 34:8) Story witim olketa wea distaem gohed for pioneer. Maet samfala long olketa hia winim olketa hard samting wea iu tu kasem. (Prov. 15:22) Askem Jehovah for blessim wei wea iu waka hard for mekem ministry bilong iu kamap moa big.—1 John 5:14.
5. Why nao wei for duim regular pioneer hem gudfala samting for aftarem?
5 Gudfala Samting for Aftarem: Wei for serve olsem regular pioneer hem mekem man kasem plande blessing. Bae iu kasem bigfala hapi wea kamaot from wei for givim samting. (Acts 20:35) Pioneer waka bae mekem savve bilong iu for iusim Word bilong God long stretfala wei for kamap moa big. (2 Tim. 2:15) Bae iu garem staka chance for lukim hao hand bilong Jehovah bae no short for helpem iu. (Acts 11:21; Phil. 4:11-13) And tu, pioneer waka bae helpem iu for mekem grow olketa spiritual fasin, olsem fasin for gohed strong, and bae strongim go moa wei wea iu fren gud witim Jehovah. (Jas. 4:8) Waswe, iu fit for go insaed long disfala door for waka and kamap wanfala regular pioneer?