Iusim Gud Taem Bilong Iumi Long Ministry
Long 2014 service year, Olketa Jehovah’s Witness iusim 1,945,487,604 hour long preaching waka. Diswan showimaot iumi hapi for waka hard for Jehovah! (Ps. 110:3; 1 Cor. 15:58) From “lelebet taem nomoa hem stap,” iumi laek for iusim gud taem wea iumi spendem long ministry for meetim staka pipol.—1 Cor. 7:29.
Iumi savve iusim gud taem bilong iumi long ministry sapos iumi willing for changem samfala samting. Olsem example, long samfala ples maet samfala spendem samting olsem wan hour long ministry bat olketa no story witim eniwan. Sapos olsem, maet olketa savve duim difren samting long ministry mekem olketa savve story witim staka pipol. Nomata olketa samting no semsem long evri ples, samfala idea hia maet helpem iumi for iusim gud taem bilong iumi mekem iumi “no hit olobaot” taem iumi duim ministry.—1 Cor. 9:26.
Haos Tu Haos: For staka year finis, iumi olketa Witness preach from haos tu haos long morning. From staka pipol waka long day, iumi savve preach from haos tu haos long aftanun or bihaen faev klok long evening taem olketa stap long haos and no busy tumas. Long morning, maet hem gud for iumi duim street witnessing or bisnis territory mekem iumi story witim staka pipol.
Pablik Witnessing: Olketa kongregeson shud putim trolley or tebol long ples wea staka pipol savve go pas long territory bilong olketa. (Lukim July 2013 Kingdom Ministry Bilong Iumi, p. 5.) Sapos gogo staka pipol no savve go pas long ples hia, Kongregeson Service Komiti maet disaed for putim trolley or tebol long nara ples wea hem fitim.
Olketa Return Visit and Bible Study: Sapos iumi luksavve samfala part long day iumi no savve story witim staka pipol long haos tu haos, street or bisnis territory, maet hem gud for duim olketa return visit and Bible study long taem olsem. Or sapos iu luksavve long olketa Saturday morning staka pipol stap long haos, maet iu savve duim haos tu haos long morning and duim Bible study long aftanun or long evening.
Iumi savve kaontem taem nomata iumi no story witim staka pipol, bat iumi barava hapi taem iumi story witim staka pipol. Taem iu duim wanfala part long ministry and iu luksavve iu no savve story witim staka pipol, duim nara samting long ministry. Prea long Jehovah, “man wea ownim planteison,” for helpem iu for luksavve hao for iusim gud taem bilong iu long ministry.—Matt. 9:38.