Waswe, Iu Savve Duim Evening Witnessing?
1. Wanfala savveman sei Paul savve preach long haos tu haos long wanem taem?
1 Datfala buk Daily Life in Bible Times sei aposol Paul savve go preach long haos tu haos “start long 4 klok long aftanun go kasem leit naet.” Iumi no savve sapos diswan nao schedule wea aposol Paul followim, bat iumi savve hem willing for ‘duim evri samting mekem hem savve sharem gud nius.’ (1 Cor. 9:19-23) Datwan minim hem changem schedule bilong hem for preach long haos tu haos long taem wea hem savve meetim staka pipol.
2. Why nao evening hem gud taem for preach?
2 Long staka ples, olketa pablisa savve preach long haos tu haos long morning. Bat maet datwan hem no best taem for meetim pipol long territory bilong iu. Wanfala pioneer sei: “Long daytaem staka pipol no savve stap long haos, bat long evening nao staka pipol savve stap.” Taem iu duim evening witnessing, hem chance for storyim gud nius witim olketa man wea no savve stap long haos long daytaem. And tu, staka taem olketa haosholder no busy and olketa willing for story. Sapos hem fitim, olketa elder shud arrangem grup for duim preaching long evening.
3. Taem iu duim evening witnessing, wanem nao iu savve duim for showimaot iu iusim gudfala tingting?
3 Iusim Gudfala Tingting: Hem important for iusim gudfala tingting taem iu duim evening witnessing. Olsem example, sapos iu kasem haosholder long taem wea hem no fitim, olsem long taem wea hem kaikai, hem gud for talem hem bae iu kam bak long narataem. No gohed for preach long naet wea datwan bae disturbim haosholder wea redi for sleep. (2 Cor. 6:3) Sapos wanfala ples hem no sef for preach long evening, hem gud for preach long there taem hem daylaet yet.—Prov. 22:3.
4. Wanem gud samting nao iu savve kasem taem iu duim evening witnessing?
4 Gud Samting wea Iu Bae Kasem: Iumi hapi taem iumi meetim staka pipol long haos and savve preach long olketa. Taem iumi preach long plande pipol, bae iumi garem staka chance for helpem olketa narawan for “sev and for garem stretfala savve abaotem olketa tru teaching.” (1 Tim. 2:3, 4) Waswe, iu savve changem schedule bilong iu for preach long evening?