Niufala Wei for Duim Pablik Witnessing
1. Hao nao olketa Christian long first century showimaot gudfala example long wei for preach long staka pipol?
1 Olketa Christian long first century no preach long haos tu haos nomoa. Olketa preach long pablik tu. (Acts 20:20) Olsem example, olketa go preach long temple bikos olketa savve bae olketa faendem staka pipol long there. (Acts 5:42) Taem aposol Paul stap long Athens, evriday hem go for preach long pipol long market. (Acts 17:17) Distaem, main wei wea iumi talemaot gud nius hem for preach long haos tu haos. Bat iumi savve preach tu long olketa park, ples for parkim trak, bisnis territory, aotsaed long olketa stoa, and long olketa nara ples wea iumi savve faendem pipol. Evri pablisa savve duim pablik witnessing, bat iumi bae storyim tufala niu wei for duim diswan wea staka bae garem chance for duim.
2. Long November 2011, wanem nao niu wei for preach wea olketa brata and sista traem long New York City?
2 Spesol Wei for Duim Pablik Witnessing Long Olketa Taon: Long 2013 Yearbook long page 16 and 17, hem storyim wanfala niu wei for duim pablik witnessing wea olketa brata and sista traem long New York City start long November 2011. Long samfala area long taon wea staka pipol savve go pas, olketa putim olketa tebol and trolley wea showimaot olketa pablikeson long olketa difren languis. Evri day staka thousand pipol savve go pas long olketa tebol hia. Samfala long olketa pipol hia hem olketa wea stap long olketa hae storey building wea olketa witness no savve go insaed and olketa wea staka taem no stap long haos. Staka pipol nao interest long olketa pablikeson. Insaed wanfala month nomoa, olketa tekem 3,797 magasin and 7,986 buk. Staka laekem samwan for studyim Bible witim olketa. Main reason for duim disfala waka hem for startim Bible study. So taem olketa meetim samwan wea interest for study, olketa pioneer givim address bilong datfala man long kongregeson wea hem stap long territory bilong olketa, mekem olketa savve go visitim hem.
3. Waswe, olketa long nara kantri tu savve duim disfala waka?
3 From disfala niu wei for preach hem mekem staka pipol for interest, samfala nara kantri wea garem olketa taon tu start for duim diswan. Branch office long olketa kantri hia bae disaedem wanem taon nao hem fitim for duim diswan. Olketa savve chusim olketa taon wea garem olketa train station, olketa big office building and olketa apartment building, wea datwan mekem staka pipol savve wakabaot long datfala ples. Bihaen datwan, branch office bae givim instruction long olketa kongregeson wea bae duim disfala waka. Kongregeson bae markem olketa regular and spesol pioneer for duim disfala waka, and samfala taem olketa auxiliary pioneer tu savve duim datwan.
4. Hao nao olketa duim disfala spesol pablik witnessing long olketa taon?
4 Hao Olketa Duim Disfala Waka: Olketa wea duim disfala spesol pablik witnessing long olketa taon savve weit for pipol kam lukluk long olketa pablikeson long tebol or trolley. Taem eniwan kam, olketa pioneer savve talem hem for tekem eni buk wea hem interest long hem. Olketa savve iusim Bible for ansarem eni kwestin wea olketa askem. Olketa pioneer no storyim donation arrangement taem eniwan tekem buk. Bat sapos eniwan laek savve hao for sapotim waka bilong iumi, then olketa pioneer savve talem hem for sendem eni donation long address wea stap long datfala pablikeson. Sapos hem fitim, olketa pioneer savve askem man hia: “Waswe, iu laekem eniwan for kam storyim Bible witim iu long haos bilong iu?” Or olketa savve sei: “Sapos iu laekem eniwan for helpem iu minim disfala buk, mifala willing for study witim iu.”
5. Wanem gud samting nao wanfala hasband and waef kasem from tufala share long disfala waka?
5 Staka brata and sista enjoyim disfala waka. Wanfala hasband and waef sei: “Taem mifala standap saed long tebol and lukim staka thousand pipol wakabaot pas evri day, datwan mekem mifala luksavve mifala share long bigfala waka wea gohed long full world for helpem pipol garem chance for herem gud nius. Mifala tingim wei wea Jehovah barava lovem evriwan hia and datwan strongim mifala for laek gohed duim preaching waka. Taem mifala lukim evriwan wea go pas and then samfala kam long tebol, datwan mekem mifala tingim wei wea Jehovah lukaotem man wea garem gudfala heart. Mifala luksavve mifala waka tugeta witim olketa angel.”
6. (a) Wanem nao narafala wei for duim pablik witnessing, and hao nao hem difren from spesol pablik witnessing long olketa taon? (b) Wanem nao iumi savve duim for organizem territory for pablik witnessing witim olketa nara kongregeson?
6 Pablik Witnessing wea Kongregeson Savve Arrangem: Diswan hem narafala niu wei for duim pablik witnessing. Olketa elder long kongregeson nao savve arrangem diswan. Olketa pablisa savve putim tebol or trolley long ples wea staka pipol savve go pas long territory bilong datfala kongregeson nomoa. Diswan hem difren from datfala spesol pablik witnessing long olketa taon wea branch office nao disaedem wanem taon for duim and olketa brata and sista from samfala kongregeson waka tugeta for duim pablik witnessing long olketa ples wea olketa markem long datfala taon.—Lukim box “Organizem Gud Territory for Pablik Witnessing.”
7. Sapos kongregeson garem ples wea fitim for duim pablik witnessing, wanem nao olketa elder savve duim for organizem datwan?
7 Olketa elder bae tingim sapos territory bilong kongregeson garem eni ples wea staka pipol savve wakabaot go pas and disaed sapos olketa bae arrangem pablik witnessing. Maet ples wea olketa savve tingim for putim tebol and trolley hem olketa busy street, front long staka stoa, airport, ples for weitim transport, and ples wea staka pipol savve hipap for sports or olketa nara samting. Gud samting savve kamaot from wei for putim tebol long sem ples, long semtaem, and long olketa sem day. Olketa brata faendemaot staka pipol savve kam long tebol wea olketa putim long ples wea staka stoa hem stap. Long samfala ples, maet hem gud for putim smol tebol or trolley nomoa mekem hem no blokem road. Olketa elder savve daonlodim from Web site bilong iumi olketa file wea olketa bae iusim for wakem piksa bilong olketa Wastaoa and Awake magasin and Wanem Bible Teachim buk for putim long datfala tebol or trolley. Olketa wakem olketa piksa hia especially for iusim long pablik witnessing. Olketa wea duim disfala waka bae duim sem samting wea olketa wea duim spesol pablik witnessing long olketa taon duim and olketa mas barava followim direction bilong service overseer. Sapos eniwan wea interest hem no stap long territory bilong olketa, olketa shud fulimap datfala form, Plis Go Lukim Man Hia (S-43) and givim long secretary.
8. Waswe iu savve duim pablik witnessing nomata kongregeson no organizem datwan?
8 Evriwan Savve Duim Pablik Witnessing: Long samfala kongregeson maet olketa no garem eni ples for putim tebol or trolley long territory wea staka pipol savve go pas long hem. Nomata olsem, olketa pablisa long kongregeson savve duim pablik witnessing tu. Waswe, long territory bilong kongregeson bilong iu hem garem olketa ples wea garem olketa stoa wea pipol savve kam for shopping? Waswe, eni park or ples wea pipol savve hipap hem stap? Waswe, eni ples hem stap wea staka pipol savve hipap for sports or olketa nara samting? Sapos olsem, iu savve duim pablik witnessing long there.
9. Why nao iumi laek for traem best for preach long pipol long eni ples wea iumi kasem olketa?
9 Jehovah hem laekem “for evri difren kaen man mas sev and for garem stretfala savve abaotem olketa tru teaching.” (1 Tim. 2:4) So iumi traem best for talemaot message abaotem Kingdom long staka pipol bifor end hem kam. (Matt. 24:14) Long staka ples hem hard for kasem pipol long haos bilong olketa. Nomata olsem, iumi savve preach long olketa taem iumi meetim olketa long pablik. Maet hem nomoa chance wea pipol garem for herem gud nius. So iumi barava laek for duim gud ministry bilong iumi taem iumi preach long pipol long eni ples wea iumi kasem olketa.—2 Tim. 4:5.
[Box long page 5]
Organizem Gud Territory for Pablik Witnessing
Samfala taem olketa pablisa from olketa difren kongregeson savve duim pablik witnessing long olketa sem ples. Samfala pablisa from olketa difren kongregeson savve leavim olketa magasin long sem stoa, or olketa preach long sem bisnis area. Diswan savve mekem olketa bisnis pipol and olketa narawan for kros nomata olketa pablisa no preach long semtaem. So hem gud for olketa pablisa duim nomoa territory bilong kongregeson taem olketa duim pablik witnessing.
Sapos olketa pablisa laek for duim pablik witnessing long territory bilong nara kongregeson, olketa mas story witim service overseer bilong kongregeson bilong olketa. Datfala service overseer savve story witim service overseer long nara kongregeson for mek sure hem olraet for olketa pablisa duim datwan. Sapos tu-thri difren languis kongregeson bae preach long sem area, service overseer bilong each kongregeson mas story tugeta for mek sure olketa kongregeson hia duim pablik witnessing long wei wea bae no mekem eniwan kros. Taem evriwan organize evri samting bae ‘stret and no olobaot.’—1 Cor. 14:40.
[Piksa long page 6]
[Piksa long page 6]