Lane From Olketa Mature Christian

Iumi barava tinghae long olketa mature Christian long kongregeson. Samfala hia faithful for worshipim Jehovah for staka year finis. Maet olketa narawan kasem training for kamap gud long ministry no longtaem go nomoa. Olketa lukim wei wea Jesus leadim Christian kongregeson and mekem preaching waka hem grow long olketa last day distaem. (Matt. 28:19, 20) Taem olketa kasem hard taem and test olketa kasem “strong wea winim strong bilong man.” (2 Cor. 4:7) Iumi savve lanem staka samting from olketa mature Christian hia. Olketa hapi for teachim narawan long olketa samting wea olketa lanem. (Ps. 71:18) So iumi shud willing for lane from olketa. Wanem taem nao iumi savve lane from olketa?

Long Ministry. Olketa niu pablisa needim training wea bae helpem olketa kamap gud long ministry. Iumi savve lanem staka samting from olketa mature Christian taem iumi waka witim olketa long ministry. (Lukim article “Gohed Strong and No Givap for Duim Ministry,” long Wastaoa bilong February 15, 2015, mek-thri paragraf long subheding “Helpem Olketa Niu Pablisa.”) Wanem gud samting nao iu kasem taem iu waka witim olketa mature Christian long ministry?

Waswe, iu savve askem wanfala mature Christian for iutufala waka tugeta long ministry? Sapos datfala pablisa hem olo, maet iu savve askem Bible study bilong iu for iutufala go study long haos bilong datfala olo pablisa. Bihaen, iu savve askem hem eni advaes for helpem iu kamap gud long ministry.

Spendem Taem Witim Olketa: Spendem taem witim olketa mature Christian mekem iu savve gud long olketa. Askem wanfala long olketa for join insaed famili worship bilong iufala and askem hem for storyim olketa experience bilong hem. Sapos pablisa hia hem wanfala olo, maet iufala savve duim famili worship long haos bilong hem. Askem hem hao hem kam insaed truth. Wanem nao samfala blessing wea hem kasem? Hao nao truth hem grow long ples wea iufala stap? Wanem nao mekem hem hapi for worshipim Jehovah?

Iumi mas garem wei for luksavve and no askem tumas samting from olketa. Iumi evriwan, nomata olketa mature Christian tu, garem difren savve long wei for duim ministry. (Rome 12:6-8) Samfala mature Christian olketa olo, so maet olketa no fit for spendem staka taem witim iumi. Nomata olsem, iumi savve lanem staka samting from olketa mature Christian hia wea faithful for worshipim Jehovah.