Waswe, Iu Redi for Memorial?

Last Pasova blo Jesus hem barava important. From hem redi for dae, hem plan for kaikaim Pasova witim olketa aposol blo hem and for startim wanfala niu celebration, hem nao Evening Kaikai blo Lord. So hem sendem go Peter and John for go redyim wanfala rum. (Lu 22:7-13; lukim piksa lo kava.) Diswan remindim iumi hao iumi tu need for redi for Memorial lo March 27. Olketa kongregeson bae mekem olketa arrangement for wanfala brata for givim tok, redyim bred and wine, and samfala samting moa. Nomata olsem, hao nao iumi wanwan savve redi for Memorial?

Redyim heart blo iu. Readim and ting raonem Memorial Bible reading. Wanfala schedule hem stap lo Lukluk lo Olketa Scripture Evriday. Lo disfala buklet Tul for Studyim Bible lo Appendix 16A-16B hem garem wanfala schedule wea garem samfala moa information insaed. (Lukim tu April 2020 Laef and Ministry Meeting Buk.) Olketa famili savve faendem olketa information lo Watch Tower Publications Index or lo Research Index for Olketa Jehovah’s Witness for iusim lo taem blo famili worship for story raonem why ransom hem barava important.

Invaetem olketa narawan. Barava share lo disfala invitation campaign. Ting abaotem samfala wea bae iu invaetem, olsem olketa return visit, olketa wea iu study witim bifor, olketa frens, and relative. Olketa elder, no forgetim olketa wea inactive. Tingim sapos samwan wea no stap lo area blo iu, hem savve faendem ples and taem for Memorial lo home page lo jw.org, go lo ABAOTEM MIFALA and selectim “Memorial.”

Wat moa iumi savve duim for redi?