Kwestin Box

◼ Wanem nao best wei for givim selen for helpem olketa brata long olketa nara kantri wea garem need?

Samfala taem iumi herem olketa brata bilong iumi long nara kantri needim material samting from olketa kasem persecution, disaster, or nara hard samting. Diswan muvim samfala brata for sendem selen stret go long branch office bilong datfala kantri and askem datfala branch for iusim selen for helpem wanfala brata, wanfala kongregeson, or wanfala building project.—2 Cor. 8:1-4.

Nomata hem gud for tingim olketa brata olsem, staka taem samfala need stap wea barava important winim wanem brata wea givim selen tingim. Samfala taem olketa brata provaed for datfala need finis. Iumi barava sure hao taem pipol givim contribution long branch office for waka raonem world, Kingdom Hall Fund, or for olketa disaster, datwan nao wanem bae olketa iusim datfala selen for hem.

Olketa brata long evri branch kasem training finis for kwiktaem deal witim eni need wea kamap. Long evritaem olsem, branch talem go diswan long Governing Body. Sapos need stap for kasem moa help, maet Governing Body askem olketa nara branch wea stap klosap for givim help or headquarter savve sendem selen stret go long datfala kantri wea needim help.—2 Cor. 8:14, 15.

Dastawe, evri contribution for waka raonem world, olketa building project long olketa nara kantri, and for disaster shud go long branch office bilong kantri wea iumi stap. Sendem thru long kongregeson or stret go long branch office. Long wei olsem, “faithful and wise slave,” thru long arrangement wea Governing Body markem, lukaftarem need bilong olketa brata evriwea long world followim stretfala wei.—Matt. 24:45-47; 1 Cor. 14:33, 40.