Iu Savve Duim Samting for Mekem Famili blo Iu Hapi

Jehovah laekem olketa famili for hapi. (Ps 127:3-5; Ec 9:9; 11:9) Bat, stress blo disfala world and mistek blo samfala famili member savve spoelem hapi wea iumi garem. Wat nao each wan lo famili savve duim for mekem famili hapi?

Hasband mas respectim waef blo hem. (1Pe 3:7) Hem spendem taem witim waef blo hem. Hem luksavve lo wat waef fit for duim and hem tinghae lo olketa samting wea waef duim for hem and for famili. (Col 3:15) Hem talem lo waef hao hem lovem hem and praisem hem.​—Pr 31:28, 31.

Wanfala waef evritaem lukaotem olketa wei for sapotim hasband blo hem. (Pr 31:12) Hem stap anda lo hasband and waka tugeta witim hem. (Col 3:18) Hem story kaen lo hem and talem olketa gud samting abaotem hasband blo hem lo olketa narawan.​—Pr 31:26.

Olketa parents markem taem for spendem witim olketa pikinini. (De 6:6, 7) Parents talem lo olketa pikinini hao olketa lovem olketa. (Mt 3:17) Taem parents disciplinem olketa pikinini, olketa showim love and garem wei for luksavve.​—Eph 6:4.

Olketa pikinini respectim and obeyim parents blo olketa. (Pr 23:22) Olketa talemaot tingting and feeling blo olketa lo mami and dadi. Olketa acceptim discipline from parents and showimaot respect.​—Pr 19:20.

WATCHIM VIDEO DUIM SAMTING FOR MEKEM FAMILI HAPI, AND THEN ANSAREM KWESTIN HIA:

Wat nao each wan duim for mekem famili blo olketa hapi?