Kwestin From Reader
Taem David raetem toktok lo Psalm 61:8, waswe, hem mek sense for hem sei hem bae praisem nem blo God “for olowe”?
Yes. Datfala toktok hem mek sense and hem stret.
Tingim toktok blo David lo datfala verse and olketa nara verse: “Bae mi singsing for praisem nem blo iu for olowe and evriday bae mi duim wanem mi promisim.” “Mi praisem iu Jehovah, God blo mi, lo full heart blo mi, and mi bae mekhae lo nem blo iu for olowe.” “Mi bae praisem nem blo iu for olowe.”—Ps. 61:8; 86:12; 145:1, 2.
Taem David raetem olketa toktok hia, hem no tingse hem no savve dae. Hem savve Jehovah sei olketa wea sin bae dae, and David savve hem sin. (Gen. 3:3, 17-19; Sams 51:4, 5, SIPB) Hem savve nomata olketa faithful man olsem Abraham, Isaac, and Jacob, olketa dae finis. And David luksavve hem tu bae dae. (Sams 37:25; 39:4, SIPB) Bat toktok blo hem lo Psalm 61:8 showimaot hem barava laek for praisem God for olowe, wea minim for full laef blo hem.—2 Sam. 7:12.
Samfala samting wea David raet abaotem lo Psalms hem olketa samting wea happen lo laef blo hem, olsem iumi lukim lo toktok wea stap front lo Psalms 18, 51, and 52. Lo Psalm 23, David sei Jehovah hem wanfala shepherd wea leadim, strongim, and protectim hem. David tu hem wanfala shepherd wea followim example blo Jehovah, so hem laek for worshipim God ‘evriday lo laef blo hem.’—Ps. 23:6.
Tingim tu hao olketa toktok wea David raetem hem kam from Jehovah. Hem raetem tu samfala profesi wea kamap tru bihaen. For example, lo Sams 110 (SIPB), David raetem profesi abaotem taem wea Lord blo hem wea hem nao Messiah, bae “sidaon long raet saet bilong [God]” lo heven and bae kasem bigfala paoa. Wat nao Messiah bae duim? Bae hem finisim olketa enemy blo God and hem bae “jajem evri pipol” lo earth. Datfala Messiah bae kam from laen blo David. Hem bae rul lo heven and bae hem “prist [for] olowe.” (Sams 110:1-6, SIPB) Jesus sei disfala profesi lo Sams 110 (SIPB) hem abaotem hem and bae hem kamap tru lo future.—Matt. 22:41-45.
David raet abaotem olketa samting lo taem blo hem wea bae kamap tru lo future tu, taem hem resurrect and praisem Jehovah for olowe. Datwan helpem iumi for luksavve hao Sams 37:10, 11, 29 (SIPB) storyim samting wea happen lo Israel bifor and piksarem olketa samting wea bae happen lo full earth lo future taem God mekem olketa promis blo hem for kamap tru.—Lukim paragraf 8 lo article “Iu Bae Stap Witim Mi Long Paradaes” lo disfala magasin.
Psalm 61:8 and olketa nara verse lo Psalms showimaot hao taem David laef lo Israel bifor hem laek for praisem Jehovah go kasem taem hem dae. And datwan showimaot tu hao David bae duim sem samting lo future taem Jehovah mekem hem laef bak.