Olketa Young Brata Aim for Kamap Mature Christian

1. For kamap wanfala man, wat nao young Christian brata mas lane for duim?

KING David talem Solomon: “Iu mas strong and pruvim dat iu wanfala man.” (1 Ki. 2:​1-3) Diswan hem gud advaes for evri Christian brata followim. For olketa duim datwan, olketa mas lane for obeyim law blo God and followim olketa Bible principle lo evri samting wea olketa duim. (Luke 2:52) Why nao hem important for olketa young brata kamap mature Christian?

2-3. Why nao hem important for wanfala young brata kamap mature Christian?

² Wanfala Christian brata garem staka important responsibility insaed famili and lo kongregeson. For sure, iufala olketa young brata bin tingting abaotem olketa responsibility wea iu bae garem lo future. Maet iu garem aim for duim full-taem service, ministerial servant, and bihaen kamap elder lo kongregeson. And tu, maet iu laek for marit and garem pikinini. (Eph. 6:4; 1 Tim. 3:1) For kasem olketa aim hia and duim gud, iu need for kamap mature Christian.b

³ Wat nao iu savve duim for kamap mature Christian? Staka important skill hem stap wea iu need for lanem and for duim gud. So wat nao iu savve duim distaem for redi for eni future responsibility and for duim gud?

WAT FOR DUIM FOR KAMAP MATURE CHRISTIAN

4. Wea nao iu savve faendem olketa gud example for iu followim? (Lukim tu piksa.)

⁴ Chusim olketa gud example for followim. Bible storyim staka gud example wea olketa young brata savve followim. Bible storyim olketa man from bifor wea lovem God and duim staka responsibility for lukaftarem pipol blo hem. Iu savve faendem gud example blo olketa mature Christian brata insaed famili blo iu and lo kongregeson tu. (Heb. 13:7) And example blo Jesus Christ tu stap wea iu savve followim. (1 Pet. 2:21) Taem iu studyim gud example blo olketa, ting raonem gudfala wei blo olketa. (Heb. 12:​1, 2) Then disaedem hao bae iu followim example blo olketa.

5. Hao nao iu savve garem wei for tingting gud raonem samting, and why nao hem important? (Sams 119:​9, SIPB.)

⁵ Garem and “protectim . . . wei for tingting gud raonem samting.” (Prov. 3:21) Man wea garem wei for tingting gud raonem samting bae tingting gud firstaem, bifor hem duim samting. So waka hard for garem and gohed keepim datwan. Why? Bikos staka young man lo world distaem followim nomoa own idea or feeling blo olketa. (Prov. 7:7; 29:11) And tu, television, movie, Internet and social media savve affectim hao iu ting and duim samting. Bat hao nao iu garem disfala wei for tingting gud raonem samting? First samting, lanem olketa Bible principle and tingim raonem why hem gud for followim. Next samting, iusim olketa Bible principle hia for mekem olketa disison wea Jehovah bae hapi lo hem. (Readim Sams 119:​9, SIPB.) If iu lanem important skill hia, hem bae barava helpem iu for kamap wanfala mature Christian brata. (Prov. 2:​11, 12; Heb. 5:14) Tingim hao wei for tingting gud raonem samting bae helpem iu lo tufala situation: (1) hao iu treatim olketa sista and (2) taem iu mekem disison abaotem kaleko and dressap blo iu.

6. Hao nao wei for tingting gud savve helpem wanfala young brata for respectim olketa sista?

⁶ For tingting gud raonem samting bae helpem iu for respectim olketa sista. For example, wanfala young brata maet interest lo wanfala young sista and datwan hem no rong. Bat, young brata wea garem wei for tingting gud raonem samting bae no talem, raetem, or duim eni samting wea bae givim rong signal lo sista if hem no ting for marit hem. (1 Tim. 5:​1, 2) If hem frenim wanfala sista, brata bae protectim gudfala nem blo sista hia taem hem no stap seleva witim sista bat garem wanfala chaperone.—1 Cor. 6:18.

7. Hao nao wei for tingting gud savve helpem wanfala young brata saed lo kaleko and dressap blo hem?

⁷ Nara samting, hao wanfala young brata dressap and chusim kaleko savve showim tu if hem garem wei for tingting gud raonem samting. Staka taem, olketa wea designim and advertisem olketa latest fashion kaleko no garem eni respect for Jehovah and olketa no followim standard blo Hem. And datwan showaot lo hao olketa designim kaleko wea taet tumas or wea mekem man luk olsem woman. Wanfala young brata wea gohed for kamap mature Christian, bae followim Bible principle and gudfala example blo olketa lo kongregeson taem hem chusim kaleko. Tingim diswan: ‘Hao, olketa kaleko wea mi chusim showim mi garem gudfala tingting and showimaot respect? Waswe, hao mi dressap mekem olketa narawan luksavve mi worshipim God?’ (1 Cor. 10:​31-33; Titus 2:6) Wanfala young brata wea garem gudfala tingting bae olketa brata and sista tinghae lo hem and Jehovah tu.

8. Hao nao wanfala young brata savve lane for kamap samwan wea olketa narawan trustim?

⁸ Kamap samwan wea olketa narawan trustim. Wanfala young brata wea olsem hem duim gud evri responsibility blo hem. (Luke 16:10) Tingim example blo Jesus. Hem waka hard and hem responsible. Hem duim evri assignment wea Jehovah givim lo hem, nomata samfala taem hem no isi. Hem lovem pipol, especially olketa disaepol blo hem and hem willing for dae for olketa. (John 13:1) So olsem Jesus, waka hard for duim eni assignment wea iu kasem. If iu no savve hao for duim, mas hambol and ask for help from olketa mature brata. Trae for duim gud assignment wea iu kasem. (Rome 12:11) And completim gud assignment blo iu, “duim datwan olsem iufala waka for Jehovah and no for olketa man.” (Col. 3:23) Hem tru, iu no perfect, so mas hambol and ask for help taem iu mekem eni mistek lo assignment blo iu.—Prov. 11:2.

WAKA HARD FOR LANEM OLKETA PRACTICAL SKILL

9. Why nao wanfala young brata mas waka hard for lanem olketa practical skill?

⁹ For kamap wanfala mature Christian brata, iu bae need for lanem olketa practical skill. Olketa skill hia bae helpem iu for duim gud olketa responsibility lo kongregeson, garem waka for selen wea bae sapotim iu and famili, and helpem iu for fren gud witim olketa narawan. Bae iumi storyim samfala important skill.

10-11. Hao nao wei for read and raet gud savve helpem wanfala young brata and kongregeson? (Sams 1:​1-3, SIPB.) (Lukim tu piksa.)

¹⁰ Lane for read and raet gud. Bible sei man wea hapi and succeed nao, hem man wea spendem taem for readim Toktok blo God and ting raonem. (Readim Sams 1:​1-3, SIPB.) Man wea readim Bible evriday, bae hem savve lo tingting blo Jehovah and datwan bae helpem hem for garem open mind and savve hao for applyim olketa scripture. (Prov. 1:​3, 4) Iumi needim olketa brata olsem insaed kongregeson. Why nao olsem?

¹¹ Olketa brata and sista needim help blo olketa brata wea savve teach gud and givim advaes from Bible. (Titus 1:9) If iu savve read and raet gud, iu bae preparem olketa tok and koment wea savve strongim faith blo olketa narawan. And tu, iu bae raetem olketa note wea bae helpem iu taem iu study seleva, lisin lo olketa tok lo kongregeson meeting, assembly, and convention. Wat iu raetem bae strongim faith blo iu and iu savve iusim for encouragem narawan.

12. Wat nao bae helpem iu for story gud witim pipol?

¹² Lane for lisin and story gud. Wanfala Christian brata mas lane for lisin and story gud. Man wea savve story gud, hem lisin and understandim tingting and feeling blo olketa narawan. (Prov. 20:5) Hem savve lane for understandim tu tingting and feeling blo samwan from tone blo voice, feis, and body languis. Hard for iu duim diswan if iu no spendem taem witim olketa narawan. If iu evritaem iusim email, text message, and olketa nara electronic device for story, datwan savve spoelem skill wea iu garem for story in person witim pipol. So hem gud for trae faendem olketa wei for story in person witim olketa narawan.—2 John 12.

13. Wat moa wanfala young man savve lanem? (1 Timothy 5:8) (Lukim tu piksa.)

¹³ Lane for sapotim iuseleva. Wanfala mature Christian brata mas lane for sapotim hemseleva and olketa lo famili. (Readim 1 Timothy 5:8.) Lo samfala kantri, olketa young wan maet lanem hao for duim wanfala waka from dadi or relative blo hem. Lo olketa nara kantri, wanfala young wan maet lanem wanfala trade or waka lo hae skul. So hem evritaem gud for lanem skill wea bae helpem iu for faendem waka. (Acts 18:​2, 3; 20:34; Eph. 4:28) Waka hard and mek sure iu finisim wat iu startim. And olketa narawan bae luksavve and tinghae lo waka blo iu. Taem iu duim olsem, bae hem isi for iu faendem waka and duim gud. Olketa quality and skill wea iumi storyim hem important for wanfala young Christian brata garem mekem hem savve lukaftarem olketa responsibility lo future. Distaem bae iumi storyim samfala example.

REDI FOR DUIM OLKETA FUTURE RESPONSIBILITY

14. Hao nao wanfala young brata savve redi for duim full-taem service?

¹⁴ Full-taem service. Staka mature Christian brata start for duim full-taem service taem olketa barava young. Taem iu pioneer, iu savve lane for waka witim olketa difren brata and sista. And tu, hem helpem iu for savve hao for budgetim selen and for no spend winim wat iu kasem. (Phil. 4:​11-13) Wanfala gud wei for startim full-taem service hem for auxiliary pioneer. Staka duim auxiliary pioneer for samfala taem, and datwan helpem olketa for redi for regular pioneer. Taem iu pioneer, door hem open for iu duim olketa nara full-taem service, olsem for waka lo Bethel or construction.

15-16. Wat nao bae helpem wanfala young brata for qualify for ministerial servant or elder?

¹⁵ Ministerial servant or elder. Evri brata shud garem aim for qualify for kamap elder mekem olketa savve helpem olketa lo kongregeson. Bible sei man wea reach aot for disfala responsibility, “gud samting nao hem laek for duim.” (1 Tim. 3:1) Bifor samwan elder, hem mas qualify firstaem for kamap ministerial servant. Olketa ministerial servant helpem olketa elder lo staka difren wei. Olketa elder and ministerial servant willing for helpem olketa brata and sista and strong for waka tugeta witim olketa lo ministry. Olketa young brata savve qualify for ministerial servant nomata age blo olketa hem between 17-19 years. And wanfala qualify ministerial servant savve kasem appointment for elder nomata hem 20 years old.

¹⁶ Hao nao iu savve qualify for olketa responsibility hia? Bible storyim list blo olketa mark wea iu need for kasem. Tingim, olketa mark hia base lo Bible and love blo iu for Jehovah, famili blo iu, and kongregeson. (1 Tim. 3:​1-13; Titus 1:​6-9; 1 Pet. 5:​2, 3) So duim best for understandim each mark, and prea lo Jehovah for helpem iu kasem olketa mark hia.c

17. Wat nao wanfala young brata savve duim for redi for kamap hasband and hed blo famili? (Lukim tu piksa.)

¹⁷ Hasband and famili hed. Olsem Jesus storyim, samfala mature Christian brata olketa go hed singol. (Matt. 19:12) Bat if iu chus for marit, iu bae duim olketa nara responsibility wea hasband and hed lo famili savve duim. (1 Cor. 11:3) And Jehovah expectim hasband for lovem and provaedem for waef, kamap fren blo hem, and helpem hem fren klos witim Jehovah. (Eph. 5:​28, 29) Olketa quality and skill wea iumi storyim lo start blo disfala article olsem for tingting gud raonem samting, respectim olketa sista, and for kamap samwan wea olketa narawan trustim, bae helpem iu for kamap gud hasband. Olketa samting hia bae redyim iu for duim olketa responsibility olsem hasband and hed blo famili lo future.

18. Hao nao wanfala young brata savve redi for kamap gud dadi?

¹⁸ Dadi. Bihaen iu marit, maet iu kamap wanfala dadi. Lo Bible, iu savve lanem staka samting from Jehovah for kamap wanfala gud dadi. (Eph. 6:4) Jehovah talem Son blo hem Jesus, dat hem lovem and hapi lo hem. (Matt. 3:17) If iu kamap dadi, mek sure iu evritaem talem olketa pikinini blo iu dat iu lovem olketa. Praisem olketa for gud samting wea olketa duim. Taem olketa dadi followim example blo Jehovah for trainim pikinini, datwan bae helpem olketa pikinini for kamap mature Christian brata or sista. Iu savve redi distaem for kamap wanfala gud dadi taem iu showim love for olketa lo famili blo iu, kongregeson, and for lukaftarem olketa gud. And lane for talem hao iu lovem and tinghae lo olketa. (John 15:9) Diswan bae helpem iu for kamap gud hasband and dadi lo future. And iu bae kamap wanfala gud wakaman blo Jehovah distaem, blessing for famili blo iu and kongregeson.

WAT NAO BAE IU DUIM DISTAEM?

19-20. Wat nao bae help olketa young brata for kamap olketa mature Christian? (Lukim piksa lo front page.)

¹⁹ Olketa young brata, for kamap wanfala mature Christian hem samting wea no happen automatic. Iu need for chusim olketa gud example for followim, garem wei for tingting gud raonem samting, mas kamap samwan wea olketa narawan trustim, waka hard for lanem olketa practical skill, and redi for duim olketa future responsibility.

²⁰ Taem iu ting abaotem evri responsibility wea iu need for duim, maet iu feel olsem hem hard tumas. Bat iu savve duim gud. Tingim hao Jehovah barava laek for helpem iu. (Isa. 41:​10, 13) And olketa brata and sista lo kongregeson bae helpem iu tu. Taem iu kasem datfala aim for kamap wanfala mature Christian brata, bae iu hapi and satisfae. Mifala lovem iufala olketa young brata! Jehovah bae barava blessim iu distaem, taem iu waka hard for kamap wanfala mature Christian brata.—Prov. 22:4.