Olketa Young Sista Aim for Kamap Mature Christian

1. Wat nao iumi mas duim for kamap mature Christian?

IUMI sapraes for lukim hao wanfala pikinini growap fast for kamap adult. Hao olketa growap hem samting wea happen automatic nomoa. Bat for kamap wanfala mature Christian hem samting wea no happen automatic.b (1 Cor. 13:11; Heb. 6:1) For kasem datfala aim, iumi need for fren gud witim Jehovah. Iumi needim tu help blo holy spirit taem iumi waka hard for garem olketa wei blo God, lanem olketa practical skill, and redi for duim olketa responsibility blo iumi lo future.—Prov. 1:5.

2. Wat nao iumi lanem from Genesis 1:​27, and wat nao bae iumi storyim lo disfala article?

² Taem Jehovah wakem human being, hem wakem man and woman. (Readim Genesis 1:27.) Lo physical wei, hem isi for luksavve hao olketa man difren from woman, and olketa difren lo olketa nara wei tu. For example, Jehovah wakem olketa man and woman for duim olketa specific responsibility, so olketa need for garem olketa wei and skill wea bae helpem olketa for duim responsibility blo olketa. (Gen. 2:18) Lo article hia, bae iumi storyim wat wanfala young sista savve duim for kamap mature Christian. Then lo next article, bae iumi storyim wat olketa young brata savve duim for kamap mature Christian.

WAKA HARD FOR GAREM OLKETA WEI BLO GOD

3-4. Wea nao olketa young sista savve faendem gud example for followim? (Lukim tu piksa.)

³ Bible storyim example blo staka woman wea lovem Jehovah and servem hem. (Lukim article hia lo jw.org “Wanem Nao Iumi Savve Lanem From Olketa Woman lo Bible?”) Olketa garem olketa wei wea theme text blo iumi storyim, olketa “no ova tumas long eni samting wea olketa duim,” and ‘olketa faithful long God long evri samting.’ And tu, iufala savve faendem olketa mature Christian sista lo kongregeson wea iufala savve followim example blo olketa.

⁴ Olketa young sista, tingim which sista lo kongregeson nao hem showim gud example wea iu laek for followim. Tingim olketa gudfala wei blo hem, then ting abaotem hao iu savve followim. Lo olketa next paragraf, bae iumi storyim thrifala important quality wea wanfala mature sista need for waka hard for garem.

5. Why nao hem important for wanfala mature Christian sista for hambol?

⁵ Hambol fasin hem wanfala important quality wea mature Christian sista need for garem. If wanfala sista hambol, hem bae fren gud witim Jehovah and olketa narawan. (Jas. 4:6) For example, wanfala sista wea lovem Jehovah bae hambol for gohed sapotim principle blo hedship arrangement wea Dadi blo iumi lo heven hem markem. (1 Cor. 11:3) Disfala principle blo hedship arrangement hem apply insaed kongregeson and lo famili tu.c

6. Wat nao olketa young sista savve lanem from wei blo Rebekah for hambol?

⁶ Tingim example blo Rebekah. Lo full laef blo hem, hem wanfala wise woman wea savve mekem olketa gud disison and luksavve lo taem for duim samting. (Gen. 24:58; 27:​5-17) Nomata olsem, Rebekah showimaot respect and willing for followim instruction. (Gen. 24:​17, 18, 65) If iu hambol for sapotim arrangement blo Jehovah olsem Rebekah, iu bae kamap samwan wea garem gud influence lo famili blo iu and lo kongregeson.

7. Olsem Esther wea savve lo limit blo hem, hao nao olketa young sista savve followim example hem?

⁷ Evri mature Christian need for hambol and savve lo limit blo olketa. Bible sei: “Wisdom hem stap witim olketa wea hambol.” (Prov. 11:2) Esther hem wanfala hambol faithful servant blo God. From hem hambol and savve lo limit blo hem, hem no praod taem hem kamap queen. Hem lisin lo advaes blo kasin blo hem Mordecai and followim. (Esther 2:​10, 20, 22) Iu savve followim example blo Esther, taem iu askem narawan for gud advaes and followim.—Titus 2:​3-5.

8. Olsem 1 Timothy 2:​9, 10 storyim, hao nao wei for hambol and for savve lo limit bae helpem wanfala sista for mekem wise disison saed lo kaleko and dressap?

⁸ Esther showim disfala quality lo narafala wei tu. Hem young gele wea “luk naes tumas,” nomata olsem, hem no laek duim samting for kasem attention blo evriwan. (Esther 2:​7, 15) Hao nao wanfala Christian sista savve kasem gud samting from example blo Esther? Lo 1 Timothy 2:​9, 10, (Readim.) hem storyim wanfala samting for duim. Aposol Paul talem olketa Christian woman for werem kaleko wea showimaot respect and gudfala tingting. Greek word wea hem iusim showim hao wanfala woman shud evritaem werem kaleko wea showimaot respect, and tingim tu hao olketa narawan bae ting lo hem. Iumi barava tinghae lo olketa mature sista wea followim disfala advaes for werem kaleko wea showimaot respect!

9. Wat nao iumi savve lanem from example blo Abigail?

⁹ Wei for luksavve hem wanfala important fasin wea evri mature Christian sista need for garem. Wat nao wei for luksavve hem minim? Hem minim ability wea samwan garem for understandim wat hem stret and wat hem rong and then hem chus for duim stret samting. Tingim example blo Abigail. Hasband blo hem mekem wanfala bad disison wea bae kosim big problem for evriwan lo haos blo hem. Abigail kwiktaem duim samting bikos hem garem wei for luksavve. (1 Sam. 25:​14-23, 32-35) Wei for luksavve hem helpem iumi for savve lo taem for toktok and taem for kwaet. And tu, taem iumi story olketa narawan, hem bae helpem iumi for no ask abaotem eniting wea iumi no garem raet for savve or wea bae mekem olketa feel nogud.—1 Thess. 4:11.

WAKA HARD FOR LANEM OLKETA PRACTICAL SKILL

10-11. Taem iu savve read and raet gud, hao nao datwan savve helpem iu and olketa narawan? (Lukim tu piksa.)

¹⁰ Wanfala Christian sista need for lanem olketa practical skill. Samfala skill wea wanfala gele lanem taem hem smol bae helpem hem lo laef. Bae iumi storyim samfala example.

¹¹ Lane for read and raet gud. Lo samfala culture, olketa no ting dat for read and raet hem wanfala important skill wea olketa gele shud lanem. Bat hem gud and important for evri Christian lane for read and raet.d (1 Tim. 4:13) So nomata hem no isi, no letem eniting stopem iu for lane for read and raet. Hao nao datwan bae helpem iu? Hem savve helpem iu for faendem waka for selen and duim gud. And tu, bae hem isi for iu studyim Bible and teachim lo olketa narawan. And important samting, from iu savve read datwan bae helpem iu for ting raonem gud Bible taem iu readim, and iu bae fren klos witim Jehovah.—Josh. 1:8; 1 Tim. 4:15.

12. Wat nao iu lanem from Provebs 31:​26, SIPB?

¹² Lanem for lisin and story gud lo pipol. Hem important for olketa Christian duim datwan. Disaepol James givim disfala advaes: “Evriwan mas willing for lisin, no kwiktaem for toktok.” (Jas. 1:19) For lisin gud taem narawan story, hem showim iu “tingim” hem. (1 Pet. 3:8) If iu no minim wat hem talem or hao hem feel, hem gud for askem olketa kwestin wea fitim. Tingting firstaem bifor iu story. (Prov. 15:​28, ftn.) Tingim diswan: ‘Hao, samting wea mi bae talem hem tru and encouragem narawan? Hao, hem showimaot respect and kaen?’ Lane from olketa mature sista wea savve lisin gud and story kaen. (Readim Provebs 31:​26, SIPB.) Lukluk gud lo hao olketa story. Taem iu lanem gud disfala skill, iu bae fren gud witim olketa narawan.

13. Hao nao iu savve lane for lukaftarem olketa responsibility lo haos? (Lukim tu piksa.)

¹³ Lane for lukaftarem olketa responsibility lo haos. Lo staka ples, olketa woman nao duim staka waka lo haos. Maet mami or nara sista savve helpem iu for lanem olketa skill wea bae helpem iu. Wanfala sista wea nem blo hem Cindy sei: “Wanfala best samting wea mami teachim mi, hem hao taem iu duim gud waka blo iu datwan savve mekem iu hapi. From mi lanem hao for kuki, klining, soengim kaleko, and hao for iusim wise selen taem mi shopping, datwan helpem mi for lukaftarem miseleva and duim moa samting lo service blo Jehovah. Mami teachim mi lo hao for welkamim narawan, and diswan helpem mi for meetim olketa naes brata and sista wea mi savve followim example blo olketa.” (Prov. 31:​15, 21, 22) Wanfala young sista wea waka hard for lanem hao for lukaftarem haos and welkamim olketa narawan, bae kamap blessing for evriwan lo famili blo hem and insaed kongregeson.—Prov. 31:​13, 17, 27; Acts 16:15.

14. Wat nao iu lanem from experience blo Crystal, and wat nao iu shud focus lo hem?

¹⁴ Lane for sapotim iuseleva. Diswan hem wanfala important goal for evri mature Christian lanem. (Phil. 4:11) Wanfala sista wea nem blo hem Crystal sei: “Taem mi lo hae skul, parents blo mi encouragem mi for chusim olketa course wea bae helpem mi bihaen. Dadi laekem mi for tekem accounting, and gogo datwan barava helpem mi.” And hem no inaf for lanem nomoa hao for earnim selen, bat trae for lanem tu hao for iusim wise lo selen, mekem iu no spend winim wat iu earnim. (Prov. 31:​16, 18) Taem iu gohed focus lo olketa spiritual goal blo iu, hem bae helpem iu for no garem kaon and bae iu satisfae nomoa witim simpol laef.—1 Tim. 6:8.

REDI FOR DUIM OLKETA FUTURE RESPONSIBILITY

15-16. Why nao olketa singol sista barava spesol insaed kongregeson? (Mark 10:​29, 30)

¹⁵ Taem iu waka hard for garem olketa spiritual fasin and olketa important skill, datwan bae helpem iu for barava redi for olketa future responsibility. Tingim samfala example lo wat iu savve duim.

¹⁶ Iu savve disaed for singol for samfala taem. Olsem Jesus storyim, samfala gele disaed for no marit, nomata wei for singol hem samting wea culture blo olketa no acceptim. (Matt. 19:​10-12) Olketa narawan maet gohed singol bikos lo samfala reason. Bat iu savve sure hao Jehovah and Jesus no ting daonem olketa singol sista. Evriwea lo world, olketa singol sista nao garem positive influence lo kongregeson. From olketa lovem and kea for olketa narawan, olketa kamap sista and mami blo staka lo kongregeson.—Readim Mark 10:​29, 30; 1 Tim. 5:2.

17. Hao nao wanfala young sista savve plan distaem for duim full-taem service?

¹⁷ Iu savve kamap wanfala full-taem servant. Olketa young sista duim staka samting saed lo preaching waka evriwea lo world. (Ps. 68:11) Hao, iu savve plan distaem for duim full-taem service? Maet iu savve pioneer, volunteer lo construction, or waka lo Bethel. Prea abaotem goal blo iu. Story witim olketa wea insaed full-taem service, and faendaot wat iu savve duim mekem iu qualify. Then plan for kasem datfala goal. Taem iu kasem, hem bae openem wei for iu kasem staka privilege lo service blo Jehovah.

18. Why nao wanfala sista shud chusim gud hu nao bae hem maritim? (Lukim tu piksa.)

¹⁸ Maet iu chus for marit. Olketa quality and skill wea iumi storyim bae redyim iu for kamap wanfala gud waef. And if iu ting for marit, iu shud chusim gud brata wea iu bae maritim. Diswan hem wanfala barava important disison wea iu bae mekem. Hem gud for tingim tu hao taem iu marit, bae iu stap anda lo hedship blo man wea iu maritim. (Rome 7:2; Eph. 5:​23, 33) So tingim diswan: ‘Hao, hem wanfala mature Christian brata? Hao, olketa spiritual samting hem main samting lo laef blo hem? Hao, hem mekem olketa wise disison? Hao, hem savve talem sapos hem nao rong? Hao, hem respectim olketa woman? Waswe, hem savve helpem mi for gohed fren gud witim Jehovah, provaed for mi, and kamap gud fren blo mi? Hao, hem duim gud olketa responsibility blo hem? For example, wat nao olketa assignment blo hem lo kongregeson, and waswe, hem duim gud?’ (Luke 16:10; 1 Tim. 5:8) Tru samting nao, if iu laek for faendem wanfala gud hasband, iu tu need for prepare for kamap wanfala gud waef.

19. Taem Bible sei waef hem “wanfala helper,” why nao hem shud hapi?

¹⁹ Bible sei hao wanfala gud waef hem “wanfala helper” wea “barava fitim” hasband blo hem. (Gen. 2:18) Hao, diswan minim waef hem no important? No! Responsibility blo waef hem barava important. Staka taem, Bible storyim Jehovah olsem samwan wea savve helpem olketa narawan. (Ps. 54:4; Heb. 13:6) Waef helpem hasband taem hem sapotim hem. For example, taem hasband mekem olketa disison for famili, waef waka tugeta witim hem. And bikos waef lovem Jehovah, hem duim best blo hem for pipol lukim olketa gudfala blo hasband blo hem. (Prov. 31:​11, 12; 1 Tim. 3:11) Iu savve prepare for disfala future responsibility taem iu strongim love blo iu for Jehovah, gohed helpem olketa narawan lo famili and lo kongregeson.

20. Wat nao gud samting wea wanfala mami savve duim for famili blo hem?

²⁰ Taem iu wanfala mami. Afta iu marit, maet iutufala garem pikinini. (Ps. 127:3) So hem gud for iu ting abaotem wat iu need for duim for kamap wanfala gud mami. Olketa quality and skill wea iumi storyim lo disfala article, bae helpem iu for kamap wanfala gud waef and mami. Taem iu garem love, kaen and patient, iu helpem famili blo iu for hapi and olketa pikinini bae feel sef.—Prov. 24:3.

21. Hao nao iumi ting lo olketa young sista blo iumi, and why nao olsem? (Lukim piksa lo kava.)

²¹ Mifala lovem iufala olketa young sista, for evri samting wea iufala duim for Jehovah and pipol blo hem. (Heb. 6:10) Iu waka hard for garem olketa spiritual quality and skill wea mekem laef blo iu and olketa wea stap witim iu for hapi, and iu redi for olketa future responsibility. Iu barava spesol insaed organization blo Jehovah!