Jehovah Mekem Pipol Bilong Hem Luk Naes Tumas Witim Laet
“Standap, O woman, sendem go laet bilong iu, from laet bilong iu kam finis and glory bilong Jehovah hem shaen go long iu.”—ISAIAH 60:1.
1, 2. (a) Hao nao living bilong olketa man? (b) Hu nao mekem olketa man stap long darkness?
“IUMI barava needim samwan olsem Isaiah or Saint Paul!” Hem nao samting wea U.S. President Harry Truman talem witim sorre long olketa year bilong 1940. Why nao hem talem toktok hia? Hem luksavve hao world long taem bilong hem needim olketa leader wea garem barava hae standard saed long fasin. Olketa man kam thru long barava dark taem wea worse winim eni narataem long mek-20 century, mek-2 world war. Nomata war hem finis, world still no garem peace. Darkness go ahed. Tru nao, 57 year bihaen datfala war hem finis, world still stap long darkness. Sapos President Truman laef yet, iumi sure hem bae lukim hao need hem still stap for olketa leader wea garem gudfala fasin olsem Isaiah or aposol Paul.
2 Iumi no savve sapos President Truman savve or nomoa, bat aposol Paul story abaotem darkness wea mekem trabol for olketa man, and hem givim warning abaotem diswan insaed raeting bilong hem. Olsem example, hem warnim olketa brata: “Iumi garem wanfala faet, no againstim blood and body, bat againstim olketa gavman, againstim olketa wea garem paoa, againstim olketa world ruler bilong disfala darkness, againstim olketa wicked spirit long olketa ples bilong heven.” (Ephesians 6:12) Toktok hia showaot Paul luksavve long spiritual darkness wea kavarem world and hem savve tu wea nao datwan hem kam from—army bilong olketa strongfala demon wea hem kolem “olketa world ruler.” From olketa strongfala spirit nao mekem world stap long darkness, wanem nao olketa man savve duim for aotem datwan?
3. Nomata olketa man stap long darkness, wanem nao Isaiah profesi abaotem for olketa wea faithful?
3 Isaiah tu storyim darkness wea mekem trabol for olketa man. (Isaiah 8:22; 59:9) Bat, taem hem storyim taem bilong iumi, hem talem profesi hao, nomata long olketa dark taem distaem, Jehovah bae mekem future bilong olketa wea lovem laet moa braet. Tru nao, nomata Paul or Isaiah no stap witim iumi, iumi garem samting wea God muvim olketa for raetem for leadim iumi. For lukim hao diswan hem wanfala blessing for olketa wea lovem Jehovah, iumi bae lukluk long samfala profesi toktok bilong Isaiah long chapter 60 bilong buk bilong hem.
Wanfala Tokpiksa Woman Sendem Go Laet
4, 5. (a) Jehovah komandim wanfala woman for duim wanem, and hem promisim wanem samting? (b) Wanem nao barava spesol information wea stap insaed Isaiah chapter 60?
4 Firstfala toktok bilong Isaiah 60 hem for wanfala woman wea barava no stap gud—hem leidaon long graon, long darkness. Seknomoa, laet sut kam, and Jehovah hem singaot: “Standap, O woman, sendem go laet bilong iu, from laet bilong iu kam finis and glory bilong Jehovah hem shaen long iu.” (Isaiah 60:1) Hem taem for datfala tokpiksa woman for standap and showimaot laet bilong God, glory bilong hem. Why nao olsem? Iumi lukim ansa long nextfala verse: “Lukim! darkness nao bae kavarem earth, and dark cloud olketa nation; bat long iu Jehovah bae shaen go, and long iu glory bilong hemseleva bae showaot.” (Isaiah 60:2) Taem datfala woman obeyim komand bilong Jehovah, nambawan samting bae kamaot from datwan. Jehovah hem sei: “Olketa nation bae go long laet bilong iu, and olketa king long wei wea iu shaen braet tumas.”—Isaiah 60:3.
5 Barava spesol toktok long thrifala verse hia hem olsem introduction and olketa main point bilong Isaiah chapter 60. Hem talem wanem nao bae kasem wanfala tokpiksa woman and explainim hao iumi savve stap insaed laet bilong Jehovah nomata olketa man stap long darkness. Bat, wanem nao mining bilong olketa tokpiksa insaed first thrifala verse hia?
6. Hu nao woman long Isaiah chapter 60, and hu nao stand for hem long earth?
6 Datfala woman long Isaiah 60:1-3 hem Zion, organization bilong olketa angel bilong Jehovah long heven. Distaem, remnant bilong “Israel bilong God,” kongregeson bilong olketa spirit-anointed Christian wea garem hope for rul witim Christ long heven, olketa stand for Zion. (Galatians 6:16) Gogo, disfala spiritual nation bae garem 144,000 member, and Isaiah chapter 60 hem fulfill distaem long olketa wea laef long earth insaed long “olketa last day.” (2 Timothy 3:1; Revelation 14:1) Disfala profesi talem planti samting tu abaotem olketa wea kaban witim olketa anointed Christian hia, datfala “big crowd” bilong “nara sheep.”—Revelation 7:9; John 10:16.
7. Zion hem hao long 1918, and profesi talem wanem samting abaotem diswan?
7 Waswe, datfala “Israel bilong God” leidaon long darkness for lelebet taem, olsem datfala tokpiksa woman hem piksarem? Yes, diswan hem happen winim 80 year go pas finis. Insaed long first world war, olketa anointed Christian barava stragol for keepim preaching waka for go ahed. Bat long 1918, lastfala year bilong war, preaching waka hem klosap stop. Joseph F. Rutherford, wea leadim preaching waka raonem world, and samfala nara Christian wea garem bigfala responsibility kasem olketa longfala prison sentence from olketa giaman reason. Buk bilong Revelation storyim olketa anointed Christian long earth long datfala taem olsem olketa dead body wea leidaon “long bigfala road bilong bigfala taon wea long spiritual wei olketa kolem Sodom and Egypt.” (Revelation 11:8) Tru nao, datwan hem wanfala barava dark taem for Zion, wea olketa anointed pikinini bilong hem long earth stand for hem!
8. Wanem nao bigfala change wea kamap long 1919, and wanem nao kamaot from datwan?
8 Bat, long year 1919 wanfala bigfala change kamap. Jehovah givim laet long Zion! Olketa bilong Israel bilong God wea laef yet barava duim samting for showimaot laet bilong God, and no fraet for talemaot moa datfala gud nius. (Matthew 5:14-16) From olketa Christian hia kamap strong moa, olketa narawan kam long laet bilong Jehovah. Firstaem, olketa niu wan kasem anointing for kamap olketa member bilong Israel bilong God. Isaiah 60:3 kolem olketa, olketa king, from olketa bae rul witim Christ insaed Kingdom bilong God long heven. (Revelation 20:6) Bihaen, wanfala big crowd bilong olketa nara sheep kam long laet bilong Jehovah. Olketa nao “olketa nation” wea datfala profesi story abaotem.
Olketa Pikinini Bilong Datfala Woman Kam Hom!
9, 10. (a) Datfala woman lukim wanem nambawan samting, and diswan piksarem wanem? (b) Wanem reason nao Zion garem for hapi?
9 Jehovah start for talem moa samting abaotem datfala information wea stap long Isaiah 60:1-3. Hem givim nara komand long datfala woman. Lisin long wanem nao hem talem: “Liftimap eye bilong iu evriwea and lukim!” Woman hia obey, and hem lukim samting wea barava mekem hem feel gud! Olketa pikinini bilong hem kakam bak long hom. Scripture hem go ahed for sei: “Olketa hipimap evriwan tugeta; olketa kam long iu. From farawe ples olketa son bilong iu kam, and olketa dota bilong iu wea olketa bae lukaftarem olketa long saed.” (Isaiah 60:4) Waka for talemaot Kingdom wea start long 1919 pullim planti thousand niu wan long service bilong Jehovah. Olketa tu kamap olketa “son” and “dota” bilong Zion, olketa anointed member bilong Israel bilong God. Long wei olsem, Jehovah mekem Zion luk naes tumas taem hem tekem kam long laet, olketa last wan bilong 144,000.
10 Waswe, iu savve tingim hapi bilong Zion from olketa pikinini bilong hem stap witim hem? Bat, Jehovah givim Zion olketa nara reason for hapi. Hem sei: “Long datfala taem iu bae lukim and shaen witim hapi, and heart bilong iu bae seksek and kamap big, bikos long iu olketa richfala samting bilong sea bae kam; olketa gudfala samting bilong nation bae kam long iu.” (Isaiah 60:5) Followim profesi toktok hia, start kam long olketa year bihaen long 1930, staka Christian wea garem hope for stap olowe long earth kam long Zion. Olketa kamaot from “sea” bilong olketa man wea stap separate from God and olketa stand for olketa rich samting bilong olketa nation. Olketa nao “olketa barava spesol samting bilong evri nation.” (Haggai 2:7; Isaiah 57:20) Lukim tu hao olketa “barava spesol samting” hia no servem Jehovah followim mind bilong olketa seleva. Nomoa, olketa addim go moa wei wea Zion hem luk naes tumas from olketa kam for worship witim olketa anointed brata bilong olketa, and olketa kamap “wanfala sekson” witim olketa anda long “wanfala shepherd.”—John 10:16.
Olketa Bisnisman and Shepherd Kam Long Zion
11, 12. Storyim olketa crowd wea kakam long Zion.
11 Samting wea kamaot from disfala wei for hipimap pipol wea profesi storyim hem bigfala increase long namba bilong olketa wea praisem Jehovah. Nextfala toktok bilong datfala profesi storyim diswan. Tingim sapos iu standap witim datfala tokpiksa woman long Maunt Zion. Iu luk go long east, and wanem nao iu lukim? “Barava bigfala sekson bilong olketa camel wea muv bae kavarem iu, olketa young camel bilong Midian and Ephah. Evriwan from Sheba—olketa bae kam. Olketa bae karem gold and frankincense. And olketa bae talemaot praise bilong Jehovah.” (Isaiah 60:6) Staka bisnisman witim olketa camel gogo followim olketa road wea lead go long Jerusalem. Olketa camel olsem wanfala flood wea kavarem full land! Olketa bisnisman karem olketa present wea garem hae price, “gold and frankincense.” And olketa bisnisman hia kam long laet bilong God for praisem hem long pablik, ‘for talemaot praise bilong Jehovah.’
12 Hem no olketa bisnisman nomoa wea kakam. Olketa shepherd tu kam long Zion. Profesi hem go ahed for sei: “Olketa bae tekem olketa sheep bilong Kedar kam long iu. Olketa man sheep bilong Nebaioth—bae servem iu.” (Isaiah 60:7a) Olketa tribe wea lukaftarem olketa sheep kakam long datfala holy taon for offerim best animal bilong olketa long Jehovah. Olketa offerim nomata olketa seleva for servem Zion! Waswe, Jehovah welkamim olketa man hia from difren ples? God seleva ansa: “Witim wei for mi appruvim, olketa bae kamap long altar bilong mi, and mi bae mekem luk naes haos bilong mi wea luk naes.” (Isaiah 60:7b) Jehovah hapi tumas for acceptim olketa sakrifaes and service bilong olketa man hia from difren ples. Olketa mekem temple bilong hem luk naes tumas.
13, 14. Wanem samting nao kakam from west?
13 Distaem, tanem hed bilong iu and luk raon long west saed. Wanem nao iu lukim? Farawe, hem samting wea luk olsem wanfala white cloud antap long sea. Jehovah askem kwestin wea stap long mind bilong iu: “Hu nao olketa hia wea flae kam olsem wanfala cloud, and olsem olketa kurukuru wea go long bird haos bilong olketa?” (Isaiah 60:8) Jehovah seleva ansarem kwestin bilong hem: “Olketa island bae go ahed for hope long mi, olketa ship bilong Tarshish tu olsem long firstaem, for mekem olketa son bilong iu kam from farawe, silver and gold bilong olketa tu, long nem bilong Jehovah, God bilong iu and long Holy Wan bilong Israel, from hem mekem iu luk naes tumas.”—Isaiah 60:9.
14 Waswe, iu savve lukim diswan long mind bilong iu? Datfala white cloud hem kamap moa klos and hem luk olsem olketa smol white samting farawe long west. Hem luk olsem olketa bird wea speed antap long wave. Bat taem olketa kam moa klos, iu lukim hao olketa nao olketa ship wea openem sail bilong olketa for kasem wind. From staka ship hia sail go long Jerusalem olketa luk olsem wanfala sekson bilong olketa kurukuru. From olketa port wea farawe, olketa ship hia speed go for tekem kam olketa wea biliv long Jerusalem for worshipim Jehovah.
Organization Bilong Jehovah Hem Grow
15. (a) Toktok long Isaiah 60:4-9 storyim wanem increase? (b) Olketa tru Christian showimaot wanem kaen spirit?
15 Verse 4 go kasem 9 showimaot klia hao organization hem grow evriwea long world start long 1919 kam kasem distaem! Why nao Jehovah blessim Zion witim wei for kamap big olsem? Bikos start kam long 1919, Israel bilong God evritaem obeyim Jehovah long wei for givim go laet bilong hem. Bat, waswe, iu lukim hao verse 7 sei olketa wea arrive “kamap antap long altar bilong [God]”? Altar hem ples wea olketa mekem olketa sakrifaes, and disfala part bilong profesi remindim iumi hao for servem Jehovah, man mas mekem olketa sakrifaes. Aposol Paul hem raet: “Mi askem iufala . . . for givim body bilong iufala olsem sakrifaes wea laef, holy, wea God acceptim, wanfala holy service witim paoa bilong iufala for tingting stret.” (Romans 12:1) Followim toktok bilong Paul, olketa really Christian no satisfae for just attendim meeting wanfala taem evri week. Olketa givim taem, strong, and samting olketa garem for apim klinfala worship. Waswe, olketa hia no mekem haos bilong Jehovah luk naes tumas? Profesi bilong Isaiah talem hao hem bae olsem. And iumi savve sure hao olketa strongfala worshiper hia luk naes tumas long eye bilong Jehovah.
16. Long bifor, hu nao help long building waka, and hu nao duim sem samting distaem?
16 Olketa niu wan hia want for waka. Datfala profesi hem go ahed for sei: “Olketa man from difren ples bae buildim olketa wall bilong iu, and king bilong olketa bae waka for iu.” (Isaiah 60:10) Firstaem wea toktok long hia hem fulfill, long taem wea olketa Jew kam bak from Babylon, olketa king and nara pipol from olketa nation help for buildim moa temple and taon bilong Jerusalem. (Ezra 3:7; Nehemiah 3:26) Hem fulfill distaem long wei wea datfala big crowd saportim anointed remnant for buildimap trufala worship. Olketa help for buildimap olketa Christian kongregeson and from diswan strongim olketa “wall” bilong organization bilong Jehovah wea olsem wanfala taon. Olketa share tu long really building waka—for buildim olketa Kingdom Hall, Assembly Hall, and olketa Bethel. Long olketa wei olsem, olketa saportim olketa anointed brata for kea for evri need bilong organization bilong Jehovah wea go ahed for grow!
17. Wanem nao wanfala wei wea Jehovah mekem pipol bilong hem luk naes?
17 Lastfala toktok bilong Isaiah 60:10 hem barava encouragem man! Jehovah hem sei: “From kros bilong mi, mi hitim iu, bat from gudwill bilong mi bae mi showimaot mercy long iu.” Tru nao, long 1918/19, Jehovah disciplinem pipol bilong hem. Bat datwan hem samting bilong bifor. Distaem hem taem for Jehovah showimaot mercy long olketa anointed servant bilong hem and olketa nara sheep wea fren bilong olketa. Pruv hao diswan hem tru hem blessing bilong bigfala increase, wea ‘mekem olketa luk naes tumas.’
18, 19. (a) Jehovah promisim wanem saed long olketa niu wan wea kam insaed organization bilong hem? (b) Wanem nao olketa last verse bilong Isaiah chapter 60 talem iumi?
18 Each year, planti handred thousand moa “man from difren ples” kaban witim organization bilong Jehovah, and chance bae stap for planti moa pipol kam followim olketa. Jehovah hem sei long Zion: “Olketa gate bilong iu bae open evritaem; bae olketa no sat long day or long naet, mekem olketa samting bilong olketa nation savve kam long iu, and olketa king bilong olketa bae lead.” (Isaiah 60:11) Samfala wea enemy trae for satem olketa “gate” hia, bat iumi savve olketa kanduit win. Jehovah seleva talem hao hem bae mek sure olketa gate hia bae stap open. Datfala increase bae go ahed.
19 Samfala nara wei stap wea Jehovah blessim pipol bilong hem, mekem olketa luk naes long olketa last day distaem. Olketa last verse bilong Isaiah 60 showimaot insaed profesi hao hem duim diswan.
Waswe, Iu Savve Minim?
• Hu nao “woman” bilong God, and hu nao stand for hem long earth?
• Wanem taem nao olketa pikinini bilong Zion leidaon long graon, and hao and long wanem taem nao olketa “standap”?
• Long wei for iusim olketa difren tokpiksa, hao nao Jehovah profesi abaotem increase bilong namba bilong olketa wea talemaot Kingdom?
• Long olketa wanem wei nao Jehovah mekem laet shaen long pipol bilong hem?
[Piksa long page 10]
“Woman” bilong Jehovah kasem komand for standap
[Piksa long page 12]
Olketa ship luk olsem olketa kurukuru antap long sea