“Smol Wan” Kamap “Wan Thousand”
“Smol wan seleva bae kamap wan thousand, and wan wea no mas big bae kamap wanfala maeti nation.”—ISAIAH 60:22.
1, 2. (a) Why nao darkness kavarem earth distaem? (b) Hao nao laet bilong Jehovah shaen long pipol bilong hem?
“DARKNESS nao bae kavarem earth, and thick cloud kavarem olketa nation; bat long iu Jehovah bae shaen go, and long iu glory bilong hemseleva bae showaot.” (Isaiah 60:2) Olketa toktok hia barava storyim samting wea happen long earth start kam long 1919. Christendom rejectim saen bilong Jesus Christ wea stap olsem king, datfala “laet bilong world.” (John 8:12; Matthew 24:3) From Satan hem “kros tumas,” wea hem chief bilong “olketa world ruler bilong disfala darkness,” mek-20 century nao hem barava raf and nogud taem insaed history bilong man. (Revelation 12:12; Ephesians 6:12) Klosap evri pipol stap insaed spiritual darkness.
2 Nomata olsem, laet go ahed for shaen distaem. Jehovah “shaen go” long olketa servant bilong hem, datfala anointed remnant long earth, wea stand for “woman” bilong hem long heven. (Isaiah 60:1) Especially from taem wea olketa kamap free from kaen fasin bilong Babylon long 1919, sekson hia showimaot glory bilong God and ‘letem laet bilong olketa shaen front long olketa man.’ (Matthew 5:16) From 1919 go kasem 1931, laet bilong Kingdom hem shaen braet and braet taem olketa hia aotem enikaen tingting bilong Babylon wea stap yet. Olketa grow for kamap planti thousand taem Jehovah fulfillim disfala promis bilong hem: “Mi bae no fail for hipimap evriwan bilong Israel wea stap yet. Bae mi mekem olketa garem wan mind, olsem wanfala sekson bilong sheep; olketa bae mekem planti noise witim olketa man.” (Micah 2:12) Long 1931, glory bilong Jehovah long pipol bilong hem showaot moa klia taem olketa acceptim datfala nem Olketa Witness Bilong Jehovah.—Isaiah 43:10, 12.
3. Wanem nao showimaot laet bilong Jehovah bae shaen long narafala sekson tu witim anointed sekson?
3 Waswe, laet bilong Jehovah bae shaen go nomoa long olketa bilong “little flock” wea stap yet? (Luke 12:32) Nomoa. English Wastaoa magasin bilong September 1, 1931 story abaotem narafala grup. Taem hem talemaot mining bilong Ezekiel 9:1-11, hem showimaot hao man for raet wea garem inkhorn wea olketa verse hia storyim hem piksarem datfala anointed remnant. Hu nao datfala “man” markem forhed bilong olketa? “Nara sheep,” olketa wea garem hope for laef olowe insaed wanfala paradaes earth. (John 10:16; Psalm 37:29) Long 1935 olketa minim hao disfala grup bilong “nara sheep” nao datfala “great crowd . . . wea kamaot from evri nation” wea aposol John lukim long vision. (Revelation 7:9-14) Start from 1935 kasem distaem, bigfala waka go ahed for hipimap datfala great crowd.
4. Hu nao “olketa king” and “olketa nation” wea Isaiah 60:3 hem story abaotem?
4 Profesi bilong Isaiah story abaotem disfala waka for hipimap taem hem sei: “Olketa nation bae go long laet bilong iu, and olketa king long wei wea iu shaen braet tumas.” (Isaiah 60:3) Hu nao “olketa king” hia? Olketa bilong 144,000 wea stap yet wea, witim Jesus Christ, bae rul insaed Kingdom long heven and wea lead long witness waka. (Romans 8:17; Revelation 12:17; 14:1) Distaem, “olketa nation” wea garem hope for stap long earth wea kasem instruction from Jehovah and invaetem pipol for duim sem samting tu, olketa winim namba bilong anointed remnant wea stap yet.—Isaiah 2:3.
Olketa Servant Bilong Jehovah wea Showimaot Strong
5. (a) Wanem nao showimaot wei wea strong bilong pipol bilong Jehovah no wikdaon? (b) Wanem nao olketa kantri wea barava grow long 1999? (Lukim chart long page 17-20.)
5 Olketa Witness Bilong Jehovah distaem showimaot strong insaed long mek-20 century! And nomata olketa kasem hevi, strong bilong olketa no wikdaon taem olketa feisim year 2000. Olketa tinghevi yet long disfala komand bilong Jesus: “Mekem disaepol long pipol bilong evri nation.” (Matthew 28:19, 20) Namba bilong olketa pablisa bilong gud nius for lastfala service year bilong mek-20 century hem kasem niu peak bilong 5,912,492. Olketa iusim total bilong 1,144,566,849 hour for story long pipol abaotem God and olketa purpose bilong hem. Olketa duim 420,047,796 return visit long pipol wea interest and conductim 4,433,884 free hom Bible study. Datwan hem nambawan record bilong strong service!
6. Wanem niu arrangement nao kamap for olketa pioneer, and wanem nao kamaot from diswan?
6 Long January last year, Governing Body talemaot wanfala change long goal bilong hour for olketa pioneer. Planti iusim diswan for kamap regular or auxiliary pioneer. Olsem example, long first fofala month bilong 1999, branch office long Netherlands kasem foa taem moa big long namba bilong olketa application for regular pioneer winim namba wea olketa kasem long datfala semtaem long year bifor. Kantri long Ghana givim disfala report: “Start long taem wea niu pioneer goal go ahed, namba bilong olketa regular pioneer bilong mifala hem go ap.” Long 1999 service year, namba bilong olketa pioneer evriwea long world hem kasem 738,343—nambawan samting wea showimaot “strong for evri gudfala waka.”—Titus 2:14.
7. Hao nao Jehovah blessim strong waka bilong olketa servant bilong hem?
7 Waswe, Jehovah blessim strong waka hia? Yes. Thru long Isaiah hem sei: “Liftimap eye bilong iu evriwea and lukim! Olketa hipimap evriwan tugeta; olketa kam long iu. From farawe ples olketa son bilong iu kam, and olketa dota bilong iu wea olketa bae lukaftarem olketa long saed.” (Isaiah 60:4) Olketa anointed “son” and “dota” go ahed yet for strong for servem God. And distaem, nara sheep bilong Jesus hipap long saed bilong olketa anointed “son” and “dota” bilong Jehovah insaed 234 kantri and island bilong sea.
“Evri Gudfala Waka”
8. Wanem nao olketa “gudfala waka” wea Olketa Witness Bilong Jehovah busy for duim?
8 Olketa Christian garem responsibility for preachim gud nius bilong Kingdom and for helpem olketa wea interest for kamap olketa disaepol. Bat olketa “barava redy for duim evri gudfala waka.” (2 Timothy 3:17) So, long loving wei olketa lukaftarem famili bilong olketa, showimaot fasin for welkam, and visitim sik pipol. (1 Timothy 5:8; Hebrews 13:16) And olketa volunteer duim tu olketa project olsem for buildim olketa Kingdom Hall—wanfala waka wea givim gudfala witness. Long Togo, bihaen olketa buildim wanfala hall, olketa bigman bilong wanfala charismatic church laek for savve why nao Olketa Witness Bilong Jehovah savve buildim building bilong olketa seleva bat church bilong olketa mas haerem pipol for duim diswan! Report from Togo sei wei wea olketa buildim olketa naes Kingdom Hall hem barava helpem pipol wea stap long sem area and diswan muvim samfala tu for trae rentim or buildim haos long area wea olketa bae buildim olketa hall.
9. Wanem nao Olketa Witness Bilong Jehovah duim taem disaster kam?
9 Samfala taem need kamap for duim narakaen gudfala waka. Long last service year planti kantri kasem disaster, and planti taem olketa first wan for givim help nao Olketa Witness Bilong Jehovah. Example, Hurricane Mitch hem spoelem staka ples long Honduras. Kwiktaem nomoa branch hem arrangem olketa emergency komiti for organizem relief waka. Olketa Witness long Honduras and planti kantri givim donation bilong kaleko, kaikai, medicine, and narafala samting. Olketa Regional Building Komiti iusim savve bilong olketa for buildim moa olketa haos. No longtaem bihaen, olketa brata bilong iumi wea safa long disaster savve go ahed moa long evriday waka bilong olketa. Long Ecuador, Olketa Witness Bilong Jehovah helpem olketa brata bilong olketa taem bigfala flood distroem samfala haos. Bihaen hem lukim wei wea olketa duim diswan, wanfala bigman bilong gavman sei: “Sapos pipol olsem waka for mi, bae mi duim planti samting! Pipol olsem iufala nao shud stap long evri part long world.” Olketa gud waka olsem mekem Jehovah God kasem praise and pruvim “wei for lovem God hem helpem [iumi] long evri samting.”—1 Timothy 4:8.
Olketa “Flae Kam Olsem Wanfala Cloud”
10. Nomata namba bilong anointed go daon, why nao pipol talemaot nem bilong Jehovah winim enitaem bifor?
10 Jehovah ask olsem: “Hu nao olketa hia wea flae kam olsem wanfala cloud, and olsem olketa kurukuru wea go long birdhaos bilong olketa? Olketa island bae go ahed for hope long mi, olketa ship bilong Tarshish tu olsem long firstaem, for mekem olketa son bilong iu kam from farawe . . . Olketa man from difren kantri bae buildim olketa wall bilong iu, and king bilong olketa bae waka for iu.” (Isaiah 60:8-10) Olketa first wan for acceptim wei wea Jehovah “shaen go” nao hem “olketa son” bilong hem, olketa anointed Christian. Then bihaen hem “olketa man from difren kantri,” datfala great crowd, wea loyal for waka for olketa anointed brata bilong olketa, followim lead bilong olketa for preachim gud nius. So, nomata namba bilong anointed hem go daon, pipol go ahed for talemaot nem bilong Jehovah long earth winim enitaem bifor.
11. (a) Wanem nao go ahed yet and wanem nao kamaot from diswan long 1999? (b) Wanem kantri nao garem nambawan report bilong baptism long 1999? (Lukim chart long page 17-20.)
11 Samting wea kamaot from diswan nao, planti million kam “olsem olketa kurukuru wea go long birdhaos bilong olketa,” for faendem sef ples insaed Christian kongregeson. Planti handred thousand moa join evri year, and wei hem open yet for moa pipol. Isaiah hem sei: “Olketa gate bilong iu bae open evritaem; bae olketa no sat long daytaem or long naet, mekem olketa samting bilong nation savve kam long iu.” (Isaiah 60:11) Last year 323,439 nao baptaes for showimaot dedication bilong olketa long Jehovah, and hem no satem olketa gate yet. “Olketa best samting bilong evri nation,” olketa member bilong great crowd, kakam yet insaed olketa gate hia. (Haggai 2:7) Olketa nating raosem eniwan wea laek for lusim darkness. (John 12:46) Letem evriwan olsem no lusim wei wea olketa tinghae long datfala laet!
No Fraet Taem Feisim Hard Taem
12. Hao nao olketa wea lovem darkness trae for killim dae datfala laet?
12 Olketa wea lovem darkness heitim laet bilong Jehovah. (John 3:19) Samfala trae for killim dae datfala laet tu. Diswan no mekem iumi seke. Nomata Jesus tu, datfala “trufala laet wea givim laet long evri difren kaen pipol,” olketa long kantri bilong hem tokspoelem, againstim, and gogo killim hem dae. (John 1:9) Insaed long mek-20 century, pipol mekfani, putim long prison, tambuim, and killim dae tu, Olketa Witness Bilong Jehovah taem olketa showimaot laet bilong Jehovah long faithful wei. Insaed olketa year wea just go pas, olketa enemy talem liar toktok long nius abaotem olketa wea showimaot laet bilong God. Samfala laek for mekem pipol tingse Olketa Witness Bilong Jehovah wanfala danger sekson and shud stopem or tambuim olketa. Waswe, olketa enemy olsem win?
13. Wanem nao kamaot from gudfala wei for talemaot olketa trufala samting abaotem waka bilong iumi long nius?
13 Nomoa nao. Long taem wea fitim, Olketa Witness Bilong Jehovah explainim olketa trufala samting long nius. From diswan, planti niuspepa, magasin, radio and TV talemaot nem bilong Jehovah. Gud samting nao kamap long preaching waka from diswan. Olsem example, long Denmark, wanfala program long TV deal witim disfala subject, “Why faith bilong pipol long Denmark hem go daon.” Olketa interviewim Olketa Witness Bilong Jehovah witim samfala moa. Bihaen, wanfala woman wea lukim datfala program sei: “Hem klia tumas for lukim hu nao garem spirit bilong God.” Olketa startim wanfala study witim hem.
14. Klosap nao olketa enemy bae seke for luksavve long wanem?
14 Olketa Witness Bilong Jehovah savve planti long disfala world bae againstim olketa. (John 17:14) Nomata olsem, profesi bilong Isaiah strongim olketa: “And olketa son bilong olketa wea mekem trabol long iu mas go long iu, baodaon; and evriwan wea no respectim iu mas bendaon long toe bilong leg bilong iu, and olketa mas kolem iu taon bilong Jehovah, Zion bilong Holy Wan bilong Israel.” (Isaiah 60:14) Klosap nao olketa enemy bae seke for luksavve hao olketa faet againstim God seleva. Hu nao savve winim kaen faet olsem?
15. Hao nao Olketa Witness Bilong Jehovah “susum milk bilong olketa nation,” and hao nao diswan showaot long waka bilong olketa for teach and preach?
15 Jehovah promis moa: “Mi bae mekem iu kamap wanfala samting for praod long hem for olowe . . . Iu bae susum milk bilong olketa nation, and susu bilong olketa king iu bae susum; and iu bae savve mi, Jehovah, mi nao Man Wea Sevem iu.” (Isaiah 60:15, 16) Yes, Jehovah nao Man Wea Sevem pipol bilong hem. Sapos olketa depend long hem, olketa bae stap “for olowe.” And olketa bae “susum milk bilong olketa nation,” iusim olketa samting wea stap for mekem tru worship kamap moa big. Olsem example, wise wei for iusim computer and communication technology mekem isi for pablisim Wastaoa insaed 121 languis and Wekap! insaed 62 long semtaem. Olketa wakem wanfala computer program for help for transleitim New World Translation long olketa niu languis, and transleison olsem mekem bigfala hapi kamap. Taem olketa releasem Croatian transleison bilong Christian Greek Scripture long 1999, planti thousand krae witim hapi. Wanfala olo brata sei: “Mi weitim disfala Bible for longtaem nao. Distaem mi savve dae witim peace!” Olketa printim winim 100 million, full or samfala part bilong New World Translation long 34 languis.
Hae Mark Long Fasin
16, 17. (a) Nomata hem hard, why nao hem important tumas for keepim olketa hae mark bilong Jehovah? (b) Wanem experience nao showimaot hao young pipol savve stap klia long dirty samting bilong world?
16 Jesus sei: “Man wea duim olketa nogud samting hem heitim laet.” (John 3:20) Long narasaed, olketa wea stap insaed long laet lovem olketa hae mark bilong Jehovah. Thru long Isaiah, Jehovah sei: “For pipol bilong iu, evriwan long olketa bae raeteous.” (Isaiah 60:21a) Hem wanfala challenge for keepim olketa raeteous mark insaed world wea dirty fasin, fasin for liar, selfish, and praod fasin hem big tumas. Example nao long samfala kantri, living kamap moabeta and hem isi for letem wei for aftarem rich samting pullim man. Bat, Paul givim warning: “Olketa wea wantem tumas for kamap rich kasem test and trap and planti krangge and nogud tingting, wea gogo spoelem and finisim olketa evribit.” (1 Timothy 6:9) Sorre tumas taem samwan barava busy long bisnis gogo hem sakrifaesim olketa important samting olsem wei for hipap witim olketa Christian, holy service, klin fasin, and olketa famili responsibility!
17 For keepim olketa raeteous mark hem savve hard tumas for olketa young wan, taem planti wea sem age witim olketa tekem drug and duim dirty fasin. Long Suriname, wanfala boy wea luk naes tumas long skul hem askem wanfala girl wea 14 year for duim sex witim hem. Girl hia nating willing, and talem hao Bible tambuim kaen samting olsem aotsaed long marit. Olketa nara girl long skul mekfani long hem and trae for forcem hem for changem mind, and sei evriwan laek for sleep witim datfala boy. Nomata olsem, datfala young girl stand strong. Tu-thri week bihaen, olketa faendemaot boy hia garem HIV and hem kamap sik for gud. Datfala girl hapi tumas from hem obeyim komand bilong Jehovah for ‘stap klia from fornication.’ (Acts 15:28, 29) Olketa Witness Bilong Jehovah praod tumas long olketa young wan bilong olketa wea stand strong for stret samting. Faith bilong olketa, and bilong dadi and mami bilong olketa tu, ‘mekem luk naes’—givim honor long—nem bilong Jehovah God.—Isaiah 60:21b.
Jehovah Mekem Grow
18. (a) Wanem nambawan samting nao Jehovah duim for pipol bilong hem? (b) Wanem nao pruvim wei for grow bae go ahed, and wanem nao olketa nambawan hope for olketa wea stap witim laet?
18 Tru nao, Jehovah givimaot laet long pipol bilong hem, blessim olketa, gaedem, and strongim olketa. Insaed long mek-20 century, olketa lukim disfala toktok bilong Isaiah hem fulfill: “Smol wan seleva kamap wan thousand, and wan wea no mas big bae kamap wanfala maeti nation. Mi nao, Jehovah, bae speedim diswan long taem bilong hem.” (Isaiah 60:22) From tu-thri nomoa wea stap long 1919, “smol wan” hem kamap winim “wan thousand.” And diswan no finis yet! Last year 14,088,751 attendim Memorial bilong dae bilong Jesus. Planti long olketa hia no Witness wea strong. Iumi hapi olketa attendim datfala important samting, and iumi invaetem olketa for go ahed for muv kam long laet. Jehovah go ahed for shaen braet long pipol bilong hem. Door long organization bilong hem open yet. So, letem evriwan disaed strong for stap witim laet bilong Jehovah. Datwan mekem iumi kasem olketa bigfala blessing distaem! And datwan givim hapi long future taem evri creation bae praisem Jehovah and hapi long nambawan glory bilong hem!—Revelation 5:13, 14.
Iu Savve Minim?
• Hu nao showimaot glory bilong Jehovah long olketa last day distaem?
• Wanem nao showimaot strong bilong pipol bilong Jehovah hem no wikdaon?
• Wanem nao samfala gudfala waka wea Olketa Witness Bilong Jehovah busy long hem?
• Nomata strong wei for againstim iumi kamap, wanem nao iumi sure long hem?
[Piksa long page 15]
Pipol kam yet long organization bilong Jehovah
[Piksa long page 16]
Iumi hapi bikos Jehovah openem door waed for olketa wea lovem laet