Lanem Olketa Important Leson From Olketa King blo Israel

1-2. Wat nao iumi lanem from Bible abaotem samfala king blo Israel?

BIBLE storyim winim 40-fala man wea rul olsem king lo Israel.a Hem honest for storyim klia wat olketa king hia duim. For example, iumi lanem dat even olketa gud king duim samfala bad samting tu. Tingim King David wea hem wanfala gud king. Jehovah sei: “Servant blo mi David . . . followim wei blo mi witim full heart blo hem, and duim samting wea stret lo eye blo mi.” (1 Ki. 14:8) Nomata olsem, David durong witim wanfala marit woman and mekem plan for killim dae hasband blo woman hia taem olketa go for faet.—2 Sam. 11:​4, 14, 15.

² Bat, staka king wea no faithful tu duim samfala gud samting. Tingim Rehoboam. Jehovah ting lo hem olsem man wea “duim samting wea nogud.” (2 Chron. 12:14) Bat, Rehoboam obeyim komand blo God for letem tenfala tribe for separate from kingdom blo hem. And tu, hem help for protectim nation blo hem taem hem buildim olketa strong taon.—1 Ki. 12:​21-24; 2 Chron. 11:​5-12.

3. Wanem important kwestin nao kamap, and wat nao bae iumi storyim lo disfala article?

³ Diswan mekem wanfala important kwestin kamap. If evri king blo Israel duim gud and bad samting, wat nao Jehovah luk for hem for disaedem if wanfala king hem faithful? Ansa blo datfala kwestin bae helpem iumi for minim taem Jehovah hem luk lo iumi, wat nao hem luk for hem. Iumi bae storyim thrifala samting wea Jehovah luk for hem taem hem lukluk lo olketa king blo Israel: heart blo olketa, wei for repent, and wei wea olketa followim tru worship.

OLKETA LOVEM JEHOVAH WITIM FULL HEART

4. Wat nao wanfala difference between olketa faithful king and olketa king wea no faithful?

⁴ Olketa king wea mekem Jehovah hapi olketa worshipim hem witim full heart.b Gud King Jehoshaphat lukaotem “Jehovah witim full heart blo hem.” (2 Chron. 22:9) Bible sei olsem tu abaotem Josiah: “No eni king wea rul firstaem lo hem, hem olsem hem. Hem kam bak lo Jehovah witim full heart blo hem.” (2 Ki. 23:25) Waswe lo Solomon, wea taem hem gogo for olo hem duim olketa bad samting? Bible sei: “Hem no lovem Jehovah, God blo hem witim full heart blo hem.” (1 Ki. 11:4) And Bible sei olsem tu abaotem Abijam, wea hem wanfala king wea no faithful: “Hem no lovem Jehovah, God blo hem witim full heart blo hem.”—1 Ki. 15:3.

5. Explainim wat hem minim for servem Jehovah witim full heart.

⁵ Wat nao hem minim for servem Jehovah witim full heart? For samwan lovem God witim full heart, hem no minim hem servem God bikos hem mas duim datwan. Bat, hem duim bikos hem lovem and barava tinghae lo God. And tu, bae hem gohed for duim datwan lo full laef blo hem.

6. Hao nao iumi savve gohed lovem Jehovah witim full heart? (Proverbs 4:23; Matthew 5:​29, 30)

⁶ Hao nao iumi savve followim example blo olketa faithful king and gohed lovem Jehovah witim full heart? Iumi mas avoidim eni samting wea bae influencim iumi for duim nogud samting. For example, olketa bad entertainment savve mekem heart blo iumi for divaed. And tu, bad association and wei for aftarem olketa material samting savve affectim iumi. If iumi luksavve wanfala samting start for affectim love blo iumi for Jehovah, iumi mas kwiktaem duim samting for aotem.—Readim Proverbs 4:23; Matthew 5:​29, 30.

7. Why nao hem important for avoidim olketa bad influence?

⁷ Iumi mas no letem heart blo iumi for divaed. If iumi no careful iumi savve laea lo iumiseleva and tingse, if iumi increasim spiritual activity wea iumi duim, bae iumi no need for rejectim olketa bad influence. Tingim disfala example, imaginim iu stap aotsaed lo taem wea hem big wind and rain. Taem iu arrive lo haos, iu go insaed and hem drae and warm. Bat hao if iu leavim door hem open? Bae kwiktaem nomoa cold wind and rain kam insaed haos. Wat nao point? Iumi need for duim moa samting winim wei for kaikaim spiritual kaikai wea strongim frenship blo iumi witim Jehovah, wea datwan hem olsem warm ples for stap. Bat, iumi mas satem tu door, wea minim iumi no letem “air” or tingting blo disfala world for influencim iumi for duim nogud samting wea bae divaedem heart blo iumi.—Eph. 2:2.

OLKETA REPENT FROM SIN BLO OLKETA

8-9. Wat nao King David and King Hezekiah duim taem olketa kasem kaonsel? (Lukim piksa.)

⁸ Olsem iumi storyim finis, King David duim olketa serious sin. Bat taem profet Nathan kaonselem hem, David hambol and repent. (2 Sam. 12:13) Toktok blo hem lo Psalm 51 showim klia, hao David barava repent from heart. David no pretend for feel sorre for mekem hem laea lo Nathan or for missim panis.—Ps. 51:​3, 4, 17, smol toktok lo start.

⁹ King Hezekiah tu sin againstim Jehovah. Bible sei: “Heart blo hem kamap praod, wea datwan mekem kros blo God kam againstim hem and againstim Judah and Jerusalem.” (2 Chron. 32:25) Why nao Hezekiah kamap praod? Maet hem praod bikos lo riches blo hem, maet from hem winim olketa blo Assyria, or from mirakol wea healim sik blo hem. Maet hem praod dastawe hem show off and showim olketa riches blo hem lo olketa blo Babylon, and from datwan, profet Isaiah mas kaonselem hem. (2 Ki. 20:​12-18) Bat olsem David, Hezekiah hem hambol and repent. (2 Chron. 32:26) From datwan, Jehovah gohed ting lo hem olsem wanfala faithful king wea “gohed for duim samting wea stret.”—2 Ki. 18:3.

10. Wat nao King Amaziah duim taem hem kasem kaonsel?

¹⁰ Bat King Amaziah blo Judah hem no olsem, hem duim stret samting “bat hem no duim datwan witim full heart blo hem.” (2 Chron. 25:2) Wat nao rong samting wea hem duim? Bihaen Jehovah helpem hem for winim olketa Edomite, Amaziah baodaon lo olketa god blo Edom.c Then taem profet blo Jehovah kaonselem hem, datfala king stubborn and no laek for lisin.—2 Chron. 25:​14-16.

11. Olsem 2 Corinth 7:​9, 11 storyim, wat nao iumi mas duim mekem iumi kasem forgiveness? (Lukim tu olketa piksa.)

¹¹ Wat nao iumi lanem from olketa example hia? Iumi need for repent from olketa sin blo iumi and no duim moa. Waswe sapos iumi kasem kaonsel from olketa elder lo kongregeson, maet even lo wanfala smol samting nomoa? Iumi shud no tingse Jehovah or olketa elder rejectim iumi. Even olketa gud king blo Israel tu kasem kaonsel and repruv. (Heb. 12:6) Taem iumi kasem kaonsel, iumi shud (1) hambol and acceptim, (2) change followim datfala kaonsel, and (3) gohed for servem Jehovah witim full heart. If iumi repent from olketa sin, Jehovah bae forgivim iumi.—Readim 2 Corinth 7:​9, 11.

OLKETA FOLLOWIM TRU WORSHIP

12. Wat nao olketa king duim wea showimaot olketa faithful?

¹² Olketa king wea Jehovah ting lo olketa olsem olketa faithful, olketa no lusim tru worship. And olketa encouragem tu pipol wea olketa rulim for duim datwan. Olsem iumi storyim finis, olketa sin tu. Nomata olsem, olketa faithful for worshipim Jehovah nomoa and even traem best for finisim wei for worshipim idol lo datfala nation.d

13. Why nao Jehovah ting lo King Ahab olsem man wea no faithful?

¹³ Waswe lo olketa king wea Jehovah ting lo olketa olsem olketa no faithful? Olketa duim samfala gud samting. Even wicked King Ahab showim hem lelebet hambol and sorre dat hem sapotim wei for killim dae Naboth. (1 Ki. 21:​27-29) Hem buildim tu olketa taon and winim olketa faet for Israel. (1 Ki. 20:​21, 29; 22:39) Bat Ahab followim waef blo hem and promotim false worship. And no enitaem hem repent from datwan.—1 Ki. 21:​25, 26.

14. (a) Why nao Jehovah ting lo King Rehoboam olsem hem no faithful? (b) Wat nao staka king wea no faithful duim?

¹⁴ Tingim Rehoboam, nara king wea no faithful. Olsem iumi lanem finis, hem duim samfala gud samting taem hem rul. Bat taem rul blo hem kamap strong, hem lusim Law blo Jehovah and followim false worship. (2 Chron. 12:1) Bihaen datwan, samfala taem hem followim tru worship and samfala taem followim false worship. (1 Ki. 14:​21-24) Olketa nara king tu olsem Rehoboam and Ahab wea no followim tru worship. Staka king no faithful and duim samting for sapotim false worship. So, lo eye blo Jehovah, main samting wea mekem hem disaed if wanfala king hem gud or bad, hem depend if olketa followim tru worship.

15. Why nao wei for no lusim tru worship hem important lo Jehovah?

¹⁵ Why nao issue abaotem worship hem important lo Jehovah? Wanfala reason, hem bikos olketa king hia responsible for helpem pipol blo God for gohed lo tru worship. And tu, false worship savve lead go lo wei for duim olketa nara serious sin and mekem pipol for safa. (Hos. 4:​1, 2) And nara samting tu, olketa king hia and pipol wea olketa rulim, olketa dedicate finis lo Jehovah. Dastawe, Bible sei wei wea olketa join insaed false worship hem semsem olsem wei for duim adultery. (Jer. 3:​8, 9) Taem samwan duim adultery, hem sin againstim marit partner and brekem heart blo hem. Lo sem wei tu, man wea dedicate finis lo Jehovah and then hem join insaed false worship hem sin againstim Jehovah and brekem heart blo Hem.e—Deut. 4:​23, 24.

16. Lo tingting blo Jehovah, wat nao showimaot difference between man wea raeteous and man wea wicked?

¹⁶ Wat nao olketa leson wea iumi savve lanem from diswan? Hem tru, iumi mas disaed strong for no join insaed false worship. Bat iumi mas no lusim tu tru worship and iumi mas gohed busy lo service blo God. Profet Malachi talem stret tingting blo Jehovah abaotem difference between wanfala gud person and nogud person. Hem sei: “Iufala bae lukim moa difference between man wea raeteous and man wea wicked, and difference between man wea worshipim God and man wea no worshipim hem.” (Mal. 3:18) Dastawe, iumi mas no letem wei wea iumi no perfect and duim mistek or eni nara samting, for stopem iumi for gohed servem God. For stop for servem Jehovah hem wanfala serious sin.

17. Hao nao disison abaotem hu nao iumi chus for maritim savve affectim worship blo iumi for Jehovah?

¹⁷ If iu singol and ting for marit, waswe iu luksavve toktok blo Malachi abaotem wei for servem God hem affectim disison blo iu abaotem hu nao iu chus for maritim? Maet samwan garem naes wei, bat if datfala person no servem tru God, hao, iu tingse Jehovah ting lo hem olsem hem raeteous? (2 Cor. 6:14) If iu maritim hem, hao, bae hem savve helpem iu gohed strong lo spiritual wei? Tingim diswan: Olketa heathen waef blo King Solomon maet garem samfala gud wei. Bat olketa no worshipim Jehovah, and gogo olketa tanem heart blo Solomon for false worship.—1 Ki. 11:​1, 4.

18. Wat nao parents shud teachim lo pikinini blo olketa?

¹⁸ Parents, iu savve iusim story lo Bible abaotem olketa king for teachim pikinini blo iu for lovem worship blo Jehovah. Helpem olketa for luksavve wei wea Jehovah disaedem if wanfala king hem gud or bad, hem depend lo wei wea datfala king sapotim tru worship. Thru lo toktok and example blo iu, teachim pikinini for luksavve hao olketa spiritual samting mas kam first lo laef blo olketa olsem wei for studyim Bible, attendim meeting, and go lo preaching. (Matt. 6:33) If iu no duim datwan, maet olketa pikinini tingse reason why olketa shud kamap Jehovah’s Witness hem bikos hem lotu blo famili. Taem olsem, bae tru worship hem no important lo olketa or maet olketa even disaed for lusim Jehovah.

19. Waswe lo olketa wea stop for servem Jehovah? (Lukim tu box “Iu Savve Kam Bak lo Jehovah!”)

¹⁹ If samwan stop for servem Jehovah, hao, hem hard nao for hem kam bak lo Hem? Nomoa, hem savve repent and gohed moa lo tru worship. For duim datwan, maet hem need for hambol and acceptim help from olketa elder lo kongregeson. (Jas. 5:14) Hem bae kasem nambawan samting taem hem waka hard for fren bak moa witim Jehovah!

20. If iumi followim example blo olketa faithful king, hao nao bae Jehovah ting lo iumi?

²⁰ So wat nao olketa leson wea iumi lanem from olketa king blo Israel? Iumi savve olsem olketa faithful king, if iumi gohed for barava lovem Jehovah witim full heart blo iumi. Iumi mas lane from mistek blo iumi, repent, and changem wei blo iumi. And iumi mas remember hao hem important tumas for gohed followim worship blo only tru God. If iu gohed faithful lo Jehovah, hem bae ting lo iu olsem samwan wea duim samting wea stret lo eye blo hem.