Givim Glory lo Jehovah

1. Wat nao staka pipol focus lo hem distaem?

HAO, iu lukim dat staka pipol distaem savve tingim tumas olketa seleva? For example, samfala iusim social media for mekhae lo olketa seleva and wat olketa duim. Bat samfala pipol nomoa laek for givim glory lo Jehovah God. Lo disfala article, bae iumi discussim wat hem minim for givim glory lo Jehovah and wat nao shud motivatim iumi for duim datwan. Bae iumi lanem tu wat iumi savve duim for givim glory lo God wea hem shud kasem and wat God seleva bae duim lo future for nem blo hem kasem glory.

WAT NAO HEM MINIM FOR GIVIM GLORY LO JEHOVAH?

2. Wat nao Jehovah duim lo Maunt Sinai for showimaot glory blo hem? (Lukim tu piksa.)

² Wat nao glory hem minim? Lo Bible, datfala word “glory” savve minim eniting wea mekem samwan for luk barava spesol. No longtaem afta nation blo Israel kamap free from wei for slave lo Egypt, Jehovah duim spesol samting wea showimaot glory blo hem. Imaginim: Staka million Israelite hipap tugeta botom lo Maunt Sinai for herem wat God bae talem olketa. Wanfala thik cloud kavarem datfala maunten. Seknomoa, wanfala big earthquake happen, and staka samting happen olsem taem wanfala volcano bosta, and graon hem seksek, laetning, thunder, and saond blo horn hem barava krae big. (Ex. 19:​16-18; 24:17; Ps. 68:8) Taem Jehovah duim olketa paoaful samting wea showimaot glory blo hem, masbi olketa Israelite sapraes tumas.

3. Wat nao hem minim for givim glory lo Jehovah?

³ Bat hao abaot olketa human being? Hao, iumi savve really duim samting wea bae givim glory lo Jehovah? Yes, iumi savve duim. Wanfala wei for givim glory lo Jehovah, hem for talem narawan abaotem bigfala paoa and olketa naesfala wei blo hem. And tu, iumi savve givim glory lo God for evri samting wea hem helpem iumi for duim. (Isa. 26:12) King David hem showimaot nambawan example lo wei for givim glory lo Jehovah. Lo wanfala prea wea hem talem front lo evriwan blo Israel, David sei olsem lo God: “O Jehovah, iu barava hae tumas, iu garem bigfala paoa, iu gud tumas, iu garem glory, and iu barava nambawan, bikos evri samting lo skae and lo earth hem blo iu.” Afta David finis prea, “evriwan lo Israel praisem Jehovah.”—1 Chron. 29:​11, 20.

4. Hao nao Jesus givim glory lo Jehovah?

⁴ Taem Jesus stap lo earth, hem givim glory lo Dadi blo hem taem hem talemaot dat Jehovah nao givim paoa lo hem for duim olketa mirakol. (Mark 5:​18-20) Jesus givim glory lo Jehovah tu lo hao hem story abaotem Dadi blo hem and wei wea hem treatim pipol. Wanfala taem, Jesus hem teach lo sinagog. Wanfala woman wea demon mekem hem sik for 18 years finis hem stap long there and lisin. Wanfala demon mekem body blo hem for bend, so hem no savve standap stret. Datwan hem sorre samting! From Jesus feel sorre lo hem, hem story kaen lo datfala woman and sei: “Woman, bae iu gud bak nao.” Then hem tasim woman hia, and semtaem nomoa hem standap stret and start for “praisem God,” and hem strong and healthy bak! (Luke 13:​10-13) Datfala woman garem gud reason for givim glory lo Jehovah, and iumi tu garem gud reason for duim datwan.

WAT NAO MOTIVATIM IUMI FOR GIVIM GLORY LO JEHOVAH?

5. Wat nao olketa reason wea mekem iumi respectim Jehovah?

⁵ Iumi givim glory lo Jehovah bikos iumi barava respectim hem. Iumi garem staka reason for respectim hem. Jehovah hem Olmaeti, and paoa blo hem no garem limit. (Ps. 96:​4-7) Bigfala wisdom blo hem showaot klia lo olketa samting wea hem wakem. Hem nao givim laef and evri samting wea iumi needim for gohed laef. (Rev. 4:11) Hem loyal. (Rev. 15:4) Evriting wea Jehovah duim hem successful, and hem evritaem duim wat hem promisim. (Josh. 23:14) Dastawe profet Jeremiah sei olsem abaotem Jehovah: “Midolwan lo evri wise man blo olketa nation and midolwan evri kingdom blo olketa, no eniwan hem olsem iu”! (Jer. 10:​6, 7) Tru nao, iumi garem staka gud reason for respectim Dadi blo iumi lo heven. Jehovah duim staka samting wea mekem iumi fit for respectim hem, bat olketa nambawan wei blo hem tu mekem iumi for barava lovem hem.

6. Why nao iumi lovem Jehovah?

⁶ Iumi givim glory lo Jehovah bikos iumi barava lovem hem. Tingim samfala wei blo Jehovah wea mekem iumi for lovem hem. Hem showim mercy and kaen. (Ps. 103:13; Isa. 49:15) Hem understandim iumi, and taem iumi feel sorre hem tu feel sorre. (Zech. 2:8) Hem mekem hem isi for iumi savve lo hem and fren klos witim hem. (Ps. 25:14; Acts 17:27) Hem hambol and “hem bendaon for luk kam lo skae and earth, hem liftimap man wea pipol ting daonem from dust.” (Ps. 113:​6, 7) Olketa reason hia mekem iumi for laek givim glory lo nambawan God blo iumi.—Ps. 86:12.

7. Wat nao spesol chance wea iumi garem?

⁷ Iumi givim glory lo Jehovah bikos iumi laekem olketa narawan for savve lo hem. Staka pipol no savve lo truth abaotem Jehovah. Why? Bikos Satan blindim mind blo olketa taem hem spredim staka nogud laea abaotem Jehovah. (2 Cor. 4:4) Satan mekem pipol for bilivim dat Jehovah hem God wea raf, no kea, and hem nao kosim wei for safa lo disfala world. Bat iumi savve lo truth abaotem God blo iumi! Iumi garem chance for talem pipol tru samting abaotem hem and datwan givim glory lo God. (Isa. 43:10) Psalm 96 hem focus lo wei for givim glory lo Jehovah. Taem iumi discussim olketa toktok lo disfala psalm, ting abaotem samfala samting wea iu savve duim for givim Jehovah glory wea hem shud kasem.

HAO NAO IUMI SAVVE GIVIM JEHOVAH GLORY WEA HEM SHUD KASEM?

8. Wat nao wanfala wei wea iumi savve givim glory lo Jehovah? (Psalm 96:​1-3)

⁸ Readim Psalm 96:​1-3. Iumi savve givim glory lo Jehovah lo wat iumi talem abaotem hem. Olketa verse hia talem pipol blo Jehovah for “singsing lo Jehovah,” for “praisem nem blo hem,” for “talemaot gud nius abaotem hao hem sevem pipol,” and for “talemaot glory blo hem lo olketa nation.” Evri samting hia hem showim hao for iumi givim glory lo Dadi blo iumi lo heven. Olketa faithful Jew and olketa Christian lo first-century bifor, no hol bak for talem olketa narawan abaotem evri gud samting wea Jehovah duim for olketa and for defendim nem blo hem. (Dan. 3:​16-18; Acts 4:29) Hao nao iumi savve duim datwan?

9-10. Wat nao iu lanem from experience blo Angelena? (Lukim tu piksa.)

⁹ Tingim experience blo Sista Angelena,a wea stap lo United States. Hem no fraet for defendim nem blo Jehovah lo company wea hem waka lo hem. From Angelena just start for waka lo datfala company, hem kasem invitation for joinim meeting blo evri niu wakaman wea evriwan bae garem chance for storyim baekgraon blo olketa. Angelena redyim wanfala slide show wea showim hapi wea hem kasem bikos hem wanfala Jehovah’s Witness. Bat just bifor turn blo hem for story, wanfala wakaman introducem hemseleva and sei taem hem smol hem growap lo famili wea Jehovah’s Witness. Hem start for tok spoelem biliv blo iumi. Angelena sei: “Heart blo mi start for pampam. Bat then mi ting: ‘Hao, bae mi letem disfala man for talem laea abaotem Jehovah? Or bae mi defendim Jehovah?’”

¹⁰ Taem datfala workmate story finis, Angelena kwiktaem talem wanfala silent prea. Then lo kaenfala wei hem sei: “Mi garem sem baekgraon olsem iu. Mi growap lo famili wea Jehovah’s Witness, and mi still wanfala Jehovah’s Witness distaem.” Datfala situation hem no isi, nomata olsem, Angelena no letem feeling for fraet for affectim hem and hem showim olketa naes photo blo hem witim olketa brata and sista taem hem attendim olketa spiritual event, and hem gohed defendim biliv blo hem lo wei wea showimaot respect. (1 Pet. 3:15) Wat nao result? Taem Angelena finisim presentation blo hem, attitude blo datfala man hem change. Man hia even talem dat hem garem olketa naes memory tu abaotem taem hem smol and growap lo famili wea Jehovah’s Witness. Angelena sei: “Jehovah hem samwan wea iumi shud defendim. Hem wanfala honor for talem truth abaotem hem.” Iumi tu garem datfala honor for praisem Jehovah and givim glory lo hem even taem olketa narawan no showim respect lo hem.

11. Start kam lo bifor, hao nao olketa tru worshiper blo Jehovah followim principle lo Psalm 96:8?

¹¹ Readim Psalm 96:8. Iumi savve iusim olketa material tings blo iumi for givim glory lo Jehovah. Olketa tru worshiper evritaem duim diswan for givim glory lo Jehovah. (Prov. 3:9) For example, olketa Israelite givim contribution for buildim and maintainim temple. (2 Ki. 12:​4, 5; 1 Chron. 29:​3-9) Olketa disaepol iusim olketa material “samting olketa garem,” for sapotim Christ and olketa aposol. (Luke 8:​1-3) Olketa Christian lo first century tu givim relief supply for olketa brata and sista blo olketa. (Acts 11:​27-29) Distaem tu, iumi givim glory lo Jehovah taem iumi willing for givim olketa donation.

12. Hao nao olketa donation blo iumi givim glory lo Jehovah? (Lukim tu piksa.)

¹² Tingim wanfala experience wea showim hao olketa donation blo iumi savve mekem Jehovah kasem glory. Wanfala report lo 2020, storyim hao wanfala drought lo Zimbabwe hem gohed for longtaem and hem affectim pipol lo there. Staka million pipol klosap dae lo hangere, includim wanfala sista wea nem blo hem Prisca. Nomata datfala drought gohed, Prisca still followim schedule blo hem for preach lo evri Wednesday and Friday, even during lo season for plantim kaikai. Olketa neiba blo hem tok spoelem hem bikos hem go lo ministry winim for hem go houm garden blo hem, olketa sei, “Iu bae dae lo hangere.” Prisca barava trustim Jehovah and evritaem hem sei, “No enitaem Jehovah lusim olketa servant blo hem.” No longtaem bihaen, hem kasem relief supply from organization blo iumi. Olketa donation blo iumi nao mekem hem possible for hem kasem olketa relief supply olsem. Olketa neiba blo Prisca barava sapraes, and talem hem, “God nating lusim iu, so mifala tu laek for lane abaotem hem.” Sevenfala neiba blo hem start for attendim olketa kongregeson meeting.

13. Hao nao wei blo iumi savve givim glory lo Jehovah? (Psalm 96:9)

¹³ Readim Psalm 96:9. Wei blo iumi savve givim glory lo Jehovah. Olketa priest wea serve lo temple blo Jehovah need for klin lo physical wei. (Ex. 40:​30-32) Bat barava important samting nao, wei blo iumi mas klin. (Ps. 24:​3, 4; 1 Pet. 1:​15, 16) Iumi need for waka hard for lusim “old wei” blo iumi, wea datwan minim olketa attitude and samting wea iumi duim wea no klin, and iumi need for garem datfala “niufala wei,” wea minim tingting blo iumi and wat iumi duim hem showimaot olketa nambawan wei blo Jehovah. (Col. 3:​9, 10) Witim help blo Jehovah, nomata samwan garem barava nogud wei and raf tumas, hem savve change and garem datfala niu wei.

14. Wat nao iu lanem from experience blo Jack? (Lukim tu piksa.)

¹⁴ Tingim experience blo Jack, wea hem wanfala raf and dangerous man wea garem nicknem Demon. Olketa sentencem Jack for dae bikos lo olketa crime wea hem duim. Bat during lo taem wea hem weit for olketa killim hem dae, Jack acceptim Bible study from wanfala brata wea savve visitim datfala prison wea Jack stap. Nomata baekgraon blo Jack hem barava nogud, hem lusim olketa old wei blo hem and gogo hem qualify for baptaes. From Jack barava changem wei blo hem, lo day wea olketa killim hem dae, samfala prison gard garem tias lo eye blo olketa taem olketa sei gudbae. Wanfala sergeant wea waka lo datfala prison sei: “Taem Jack just kam, hem nao worst prisoner lo hia. Distaem, hem nao best prisoner.” Lo week bihaen olketa killim dae Jack, olketa brata wea go evri week for conductim meeting, meetim wanfala prisoner wea hem firstaem blo hem for kam lo meeting. Why nao hem disaed for attend? Hem barava tinghae lo wei wea Jack changem wei blo hem and hem laek for savve wat hem need for duim for worshipim Jehovah. So hem klia, wei blo iumi savve givim glory lo Dadi blo iumi lo heven!—1 Pet. 2:12.

WAT NAO JEHOVAH KLOSAP DUIM FOR NEM BLO HEM KASEM GLORY?

15. Wat nao Jehovah klosap for duim mekem nem blo hem kasem glory? (Psalm 96:​10-13)

¹⁵ Readim Psalm 96:​10-13. Olketa last verse lo Psalm 96 hem describem Jehovah olsem wanfala raeteous Judge and King. Lo future, wat nao Jehovah klosap for duim for nem blo hem kasem glory? Bae hem duim datwan taem hem givim olketa judgment blo hem. Klosap nao bae hem distroem Bigfala Babylon bikos hem duim staka nogud samting wea spoelem nem blo hem. (Rev. 17:​5, 16; 19:​1, 2) Taem Bigfala Babylon hem distroe, samfala wea lukim datwan maet disaed for joinim iumi lo tru worship. Then lo Armageddon, Jehovah bae distroem full system blo Satan, and finisim evriwan wea againstim Jehovah and tok spoelem nem blo hem. Bat hem bae sevem olketa wea lovem and obeyim hem and olketa wea tinghae lo wei for givim glory lo nem blo hem. (Mark 8:38; 2 Thess. 1:​6-10) Bihaen lastfala test lo end blo Wan Thousand Year Rul blo Christ, nem blo Jehovah bae hem barava klia from eni blame. (Rev. 20:​7-10) Lo datfala taem, “earth bae fulap lo knowledge abaotem glory blo Jehovah olsem wata hem fulap lo sea.”—Hab. 2:14.

16. Wat nao iu disaed strong for duim? (Lukim tu piksa.)

¹⁶ Iumi barava luk forward lo taem wea evriwan bae givim Jehovah glory wea nem blo hem shud kasem! Bat go kasem datfala taem, iumi laek duim best blo iumi for iusim evri chance wea iumi garem for givim glory lo God blo iumi. For mekhae lo disfala important responsibility, Governing Body chusim Psalm 96:8 for kamap yeartext for 2025: “Givim glory lo Jehovah bikos lo nem blo hem.”