Hao for Kamap Wanfala Tru Fren

HAO, enitaem iu kasem wanfala problem and iu feel olsem iu no garem eniwan for helpem iu? Iumi stap lo taem wea “evri samting hem hard tumas,” and datwan savve mekem iumi feel discourage and feel olsem iumi stap seleva. (2 Tim. 3:1) Bat iumi garem olketa frens wea savve helpem iumi for deal witim olketa challenge wea iumi kasem lo laef. Bible showim hao hem important for garem olketa tru frens lo “taem blo trabol.”—Prov. 17:17.

HAO OLKETA TRU FRENS SAVVE HELP

Taem olketa frens blo aposol Paul travel witim hem, olketa barava helpem hem. (Col. 4:​7-11) Taem Paul stap lo prison lo Rome, olketa frens blo hem duim olketa tings on behalf lo hem bikos hem no fit for duim. For example, Epaphroditus tekem kam olketa tings wea olketa brata and sista lo Philippi sendem kam for Paul. (Phil. 4:18) Tychicus tekem go olketa leta wea Paul raetem for olketa kongregeson. (Col. 4:7; lukim English study note.) From olketa frens blo hem sapotim hem, Paul fit for duim ministry blo hem nomata hem stap olsem prisoner lo haos and bihaen, taem hem stap lo prison. Wat nao iu savve duim for showimaot iu wanfala tru fren?

Staka example blo olketa brata and sista distaem tu showim why hem important for kamap wanfala tru fren. Tingim wat wanfala sista duim wea showim hem wanfala tru fren for Elisabet, wea hem wanfala regular pioneer lo Spain. Taem mami blo Elisabet kasem cancer and olketa herem dat bae hem hard for kamap gud moa, datfala sista savve sendem staka text message wea garem olketa Bible verse for encouragem Elisabet. Elisabet sei: “Olketa message hia barava strongim mi each day and mi feel olsem mi no stap seleva.”—Prov. 18:24.

Iumi savve strongim frenship blo iumi witim olketa brata and sista, taem iumi sapotim olketa for duim olketa kongregeson activity. For example, hao, iu willing for tekem olketa olo brata and sista for go lo olketa meeting or duim ministry? If iu duim datwan, for sure iutufala bae enjoyim wei for encouragem each other. (Rome 1:12) Bat, situation blo samfala Christian mekem hem hard for olketa lusim haos. Wat nao iumi savve duim for kamap wanfala tru fren for olketa?

KAMAP TRU FREN FOR OLKETA WEA NO SAVVE LUSIM HAOS

Samfala brata and sista olketa sik or maet nara situation mekem hem hard for olketa attendim olketa meeting in person. Tingim example blo David wea garem cancer. For winim six months, hem mas kasem treatment for sik blo hem. Full taem wea David kasem treatment, hem and waef blo hem, Lidia, iusim internet for attendim meeting.

Hao nao olketa fren blo David and Lidia lo kongregeson sapotim tufala? Afta each meeting, samfala brata and sista lo Kingdom Hall iusim videoconferencing for story lo David and Lidia. And tu, taem David and Lidia givim koment, afta meeting tufala savve kasem olketa encouraging text message from olketa brata and sista. Wat nao result? Datwan helpem David and Lidia for no feel olsem tufala stap seleva.

Hem gud for iumi includim lo ministry blo iumi olketa brata and sista wea no savve lusim haos. Iumi savve mekem samfala smol change lo schedule blo iumi mekem iumi savve waka witim olketa, and datwan showim iumi no forgetim olketa. (Prov. 3:27) Hao if iu arrangem taem for iutufala duim leta raeting or telephone witnessing? Maet olketa wea no savve lusim haos savve iusim video kol for connect go lo meeting blo field service grup. David and Lidia appreciatim disfala arrangement. David sei: “For connect and meet witim preaching grup and herem short story and prea wea olketa talem, hem barava encouragem mitufala.” And tu, samfala taem iu savve arrange for duim Bible study blo iu lo haos blo brata or sista wea no savve lusim haos blo hem, if hem fitim and hem sef for duim.

Taem iumi waka tugeta witim olketa brata and sista wea no savve lusim haos and iumi lukim olketa naesfala quality blo olketa, bae iumi fren klos witim olketa. For example, taem iu waka tugeta witim olketa brata and sista olsem lo ministry, and iu lukim hao olketa savve tumas for iusim Bible for kasem heart blo samwan, datwan savve mekem iu laek fren gud witim olketa. Taem iu sapotim olketa brata and sista for duim olketa spiritual activity, iu bae garem staka frens.—2 Cor. 6:13.

Paul kasem comfort taem fren blo hem Titus kam for lukim hem. (2 Cor. 7:​5-7) Disfala story blo Paul hem remindim iumi hao iumi savve provaedem comfort for olketa narawan no just lo wat iumi talem, bat iumi savve comfortim olketa tu taem iumi stap witim olketa and duim samting for sapotim olketa.—1 John 3:18.

KAMAP TRU FREN LO TAEM BLO PERSECUTION

Olketa brata and sista blo iumi lo Russia showimaot nambawan example lo wei for sapotim each other. Tingim experience blo Sergey and waef blo hem, Tatyana. Bihaen olketa police searchim haos blo tufala, olketa tekem tufala for kwestinim tufala. Olketa releasem Tatyana first and hem go bak lo haos. Sergey sei: “No longtaem bihaen [Tatyana] kasem haos, wanfala sista wea no fraet hem kam for helpem hem. Kwiktaem nomoa, olketa nara brata and sista kam and helpem hem for stretem bak evriting lo haos.”

Sergey sei: “Mi laekem tumas scripture lo Proverbs 17:​17, wea sei: ‘Wanfala tru fren hem showim love evritaem, and hem kamap wanfala brata blo iu lo taem blo trabol.’ During lo taem blo persecution, olketa toktok hia garem moa mining for mi bikos mi hard for deal witim datfala situation seleva. Jehovah hem provaedem olketa frens wea no fraet for sapotim mi.”a

From olketa situation wea iumi feisim bae kamap moa hard, iumi needim olketa frens wea iumi savve depend lo olketa. Lo taem blo bigfala trabol, iumi bae barava needim olketa. So hem gud for iumi waka hard for kamap wanfala tru fren distaem!—1 Pet. 4:​7, 8.