Lane for Garem Sem Tingting Olsem Jehovah and Jesus

1-2. Wat nao hem join witim love blo iumi for Jehovah, and hao nao Jesus showimaot datwan?

“IU MAS lovem God bilong iu Jehovah long full heart bilong iu, long full soul bilong iu, long full strong bilong iu, and long full mind bilong iu.” (Luke 10:27) Wat Jesus talem helpem iumi for luksavve hao diswan nao hem barava important komand lo Law blo Moses. So love for Jehovah hem join witim heart blo iumi, wea datwan includim hao iumi feel and wat iumi laekem. And tu, iumi mas worshipim Jehovah witim full soul and full strong blo iumi. Bat love for Jehovah hem join tu witim mind blo iumi, wea datwan includim hao iumi ting lo samting. Hem tru, hem hard for iumi barava minim evri tingting blo Jehovah. Bat, wanfala samting wea savve helpem iumi for minim tingting blo God hem taem iumi studyim “tingting bilong Christ,” bikos Jesus showimaot tingting blo Dadi blo hem lo perfect wei.—1 Cor. 2:16 and English study note “we do have the mind of Christ.”

² Jesus lovem Jehovah witim full mind blo hem. Hem savve wat nao God laekem hem for duim and hem disaed strong for duim datwan, nomata bae hem safa from hem duim stret samting. Bikos Jesus focus for duim wat Dadi blo hem laekem, hem no letem eni samting for distractim hem.

3. Wat nao aposol Peter lanem from Jesus, and wat nao Peter encouragem olketa Christian for duim? (1 Peter 4:1)

³ Peter and olketa nara aposol garem privilege for spendem taem witim Jesus and for lane abaotem hao hem ting lo samting. Taem Peter raetem first leta blo hem, hem encouragem olketa Christian for garem sem tingting olsem Christ mekem olketa redi.a (Readim 1 Peter 4:1.) Lo original languis, taem Peter sei: “Redyim iufala seleva,” hem iusim wanfala military toktok wea describem taem olketa soldia redyim weapon blo olketa for go faet. So if olketa Christian garem sem tingting olsem Jesus, hem olsem olketa garem paoaful weapon for faet againstim feeling for laek duim sin and for againstim world wea Satan rulim.—2 Cor. 10:​3-5; Eph. 6:12.

4. Hao nao disfala article savve helpem iumi for followim advaes blo Peter?

⁴ Lo disfala article, bae iumi story hao Jesus ting and hao iumi savve followim example blo hem. Iumi bae lanem (1) hao for garem sem tingting olsem Jehovah, wea datwan bae helpem iumi for garem wan mind, (2) for hambol, and (3) for garem gudfala tingting and depend lo Jehovah lo wei for prea.

LANE FOR GAREM SEM TINGTING OLSEM JEHOVAH

5. Wat nao showim Peter no garem tingting blo Jehovah?

⁵ Tingim wanfala samting wea Peter duim wea showim hem no garem tingting blo Jehovah. Lo wanfala taem, Jesus talem olketa disaepol dat hem bae go lo Jerusalem and bae olketa bigman blo religion arrestim hem, hem bae safa, and olketa bae killim hem dae. (Matt. 16:21) Maet Peter faendem hem hard for acceptim dat Jehovah bae letem pipol for killim dae Jesus, datfala promis Messiah wea bae sevem Israel. (Matt. 16:16) So Peter tekem Jesus and sei lo hem: “Lord, iu no tok olsem, bae olketa samting hia no kasem iu.” (Matt. 16:22) Peter no garem tingting blo Jehovah abaotem datfala situation, so wat Peter tingim hem no semsem witim tingting blo Jesus.

6. Wat nao Jesus duim wea showim hem barava garem sem tingting witim Jehovah?

⁶ Tingting blo Jesus abaotem datfala situation hem barava semsem witim tingting blo Dadi blo hem lo heven. Jesus sei lo Peter: “Satan, iu go from mi nao! Iu stopem mi for no duim wanem God hem laekem bikos samting wea iu tingim hem no tingting bilong God bat hem tingting bilong olketa man nomoa.” (Matt. 16:23) Maet Peter laek for helpem Jesus, bat Jesus rejectim advaes blo hem. Iumi tu savve lanem samting from diswan. Wat Jehovah laekem Jesus for duim lo datfala taem, hem for Jesus sakrifaesim laef blo hem and no for tingim hemseleva. Peter lanem important leson from datwan abaotem hao for garem sem tingting olsem Jehovah abaotem olketa situation.

7. Wat nao Peter duim wea showim hem adjustim tingting blo hem for followim tingting blo Jehovah? (Lukim piksa.)

⁷ Gogo, Peter showim hem adjustim tingting blo hem for followim tingting blo Jehovah. Jehovah redi for mekem olketa Gentile wea no circumcise for kamap part lo pipol blo God. Peter kasem assignment for preach lo Cornelius wea hem wanfala Gentile. Hem wanfala lo olketa first Gentile for worshipim Jehovah. Olketa Jew savve les lo olketa Gentile, so dastawe Peter needim help for redi for disfala assignment. Taem Peter luksavve lo wat God laekem, Peter adjustim tingting blo hem. So, taem olketa askem hem for go lo Cornelius, hem “no les.” (Acts 10:​28, 29) Hem preach lo Cornelius and famili blo hem, and olketa baptaes.—Acts 10:​21-23, 34, 35, 44-48.

8. Wat nao iumi savve duim for showim iumi adjustim tingting blo iumi for followim tingting blo Jehovah? (1 Peter 3:8)

⁸ Staka year bihaen, Peter encouragem olketa brata and sista for olketa garem sem tingting or “wan mind.” (Readim 1 Peter 3:8.) From iumi pipol blo Jehovah, iumi evriwan savve garem sem tingting taem iumi followim tingting blo Jehovah wea stap lo Bible. For example, Jesus encouragem olketa follower blo hem for putim Kingdom olsem first samting lo laef blo olketa. (Matt. 6:33) Maet wanfala pablisa lo kongregeson blo iu hem disaed for duim full-taem service. Instead for talem hem for chusim comfortable laef, iumi shud story positive abaotem disison blo hem for duim full-taem service and sapotim hem.

MAS HAMBOL

9-10. Wat nao Jesus duim wea showim hem barava hambol?

⁹ Lo naet bifor olketa killim dae Jesus, hem teachim Peter and olketa nara aposol wanfala important leson lo wei for hambol. Bifor datwan, Jesus sendem Peter and John for redyim olketa tings for datfala last kaikai blo olketa tugeta. Samfala samting wea olketa need for preparem hem wanfala dish and olketa towel for olketa iusim for wasim leg blo olketa guest bifor olketa kaikai. Bat hu nao bae hambol for duim diskaen waka?

¹⁰ Jesus no hol bak for duim datfala waka, datwan showim hem barava hambol. Olketa aposol sapraes tumas for lukim hao Jesus duim waka wea olketa slave nao savve duim. Jesus aotem datfala outer garment blo hem, taengem towel raonem waist blo hem and putim wata insaed dish and start for wasim leg blo olketa. (John 13:​4, 5) Maet hem tek taem for wasim leg blo 12-fala aposol, wea includim Judas wea bae betrayim hem. Nomata olsem, Jesus hambol for completim datfala waka. Then lo patient wei, Jesus sei: “Waswe, iufala minim samting wea mi duim long iufala? Iufala kolem mi ‘Teacher’ and ‘Lord,’ and samting iufala talem hem tru. Nomata mi Lord and Teacher bat mi wasim leg bilong iufala. So sapos olsem, iufala tu mas wasim leg bilong narawan.”—John 13:​12-14.

11. Wat nao Peter duim wea showim hem lane for hambol? (1 Peter 5:5) (Lukim tu piksa.)

¹¹ Peter lane from wei wea Jesus hambol. Afta Jesus go bak lo heven, Peter duim wanfala mirakol for healim wanfala man wea kripol from taem hem born. (Acts 1:​8, 9; 3:​2, 6-8) For sure, samting wea Peter duim hem mekem staka pipol for sapraes and kam for lukluk. (Acts 3:11) Peter hem brought ap lo culture wea savve mekhae tumas lo olketa man, so hao, datwan bae affectim wat Peter duim? Nomoa, Peter hambol and no acceptim praise for hemseleva bat hem givim praise go bak lo Jehovah and Jesus wea garem raet for kasem datwan, hem sei: “Faith bilong mitufala long Jesus nao mekem leg bilong disfala man wea iufala lukim and savve long hem for kamap gud moa.” (Acts 3:​12-16) Bihaen, Peter raetem leta for olketa Christian and storyim wei for hambol. Lo original languis, hem sei hambol fasin hem shud kamap olsem kaleko wea iumi werem. Datfala toktok remindim iumi dat Jesus hambol taem hem taengem towel raonem waist blo hem and wasim leg blo olketa aposol.—Readim 1 Peter 5:5.

12. Hao nao iumi savve followim example blo Peter for gohed hambol?

¹² Iumi savve followim example blo Peter taem iumi lane for hambol. Remember, trufala wei for hambol hem no just lo toktok nomoa. Toktok wea Peter iusim for hambol hem join witim mind and hao iumi ting lo iumiseleva and olketa narawan. Iumi duim samting for olketa narawan bikos iumi lovem Jehovah and lovem pipol, and no bikos iumi laekem olketa narawan for praisem iumi. Taem iumi hapi for duim eni samting for Jehovah and olketa brata and sista datwan showim iumi hambol, even if no eniwan lukim wat iumi duim.—Matt. 6:​1-4.

GAREM “GUDFALA TINGTING”

13. Wat nao hem minim for garem “gudfala tingting”? Explainim.

¹³ Wat nao hem minim for garem “gudfala tingting”? (1 Pet. 4:7) For garem gudfala tingting hem minim wanfala Christian duim best blo hem for mekem olketa gud disison wea followim tingting blo Jehovah. Hem savve dat frenship blo hem witim Jehovah hem nao barava important samting lo laef. Hem garem balance tingting abaotem hemseleva and hem no tingse hem savve lo evri samting. And hem evritaem depend lo Jehovah taem hem hambol and prea for direction.b

14. Wat nao Peter duim wea showim hem no depend lo Jehovah?

¹⁴ Lo last naet bifor Jesus dae, hem warnim olketa disaepol and sei: “From samting wea bae happen long mi, iufala evriwan bae lusim mi long disfala naet.” Peter confident for sei: “Nomata olketa narawan hia lusim iu, hard tumas for mi lusim iu!” Jesus talem samfala lo olketa disaepol blo hem: “Iufala mas gohed for lukaot and prea.” (Matt. 26:​31, 33, 41) If Peter followim datfala advaes, maet bae hem no fraet for talem dat hem wanfala disaepol blo Jesus. Instead, Peter barava regretim dat hem denyim Masta blo hem.—Matt. 26:​69-75.

15. During lo naet bifor olketa killim dae Jesus, wat nao helpem hem for gohed garem gudfala tingting?

¹⁵ Jesus barava depend lo Jehovah. Nomata Jesus perfect, hem prea staka taem during lo datfala naet. Datwan helpem hem for no fraet for duim samting wea followim tingting blo Jehovah. (Matt. 26:​39, 42, 44; John 18:​4, 5) Taem Peter lukim wei wea Jesus prea staka taem lo datfala naet, for sure Peter no forgetim datwan for full laef blo hem.

16. Wat nao showim dat Peter lane for garem gudfala tingting? (1 Peter 4:7)

¹⁶ Gogo, Peter lane for barava depend lo Jehovah lo prea. Bihaen Jesus resurrect, hem talem Peter and olketa nara aposol dat bae olketa kasem holy spirit for helpem olketa for preach. Bat Jesus askem olketa for weit lo Jerusalem go kasem datfala taem. (Luke 24:49; Acts 1:​4, 5) Wat nao Peter duim taem hem gohed for weit? Peter and olketa nara Christian “gohed prea” strong. (Acts 1:​13, 14) And tu, lo firstfala leta wea Peter raetem, hem encouragem olketa Christian for garem gudfala tingting and depend lo Jehovah lo prea. (Readim 1 Peter 4:7.) Peter lane for depend lo Jehovah and kamap man wea strongim olketa brata and sista lo kongregeson.—Gal. 2:9.

17. Wat nao iumi need for duim nomata iumi garem spesol ability for duim samting? (Lukim tu piksa.)

¹⁷ For garem gudfala tingting, iumi mas prea lo Jehovah evritaem. Iumi luksavve dat iumi need for gohed prea lo Jehovah nomata iumi garem spesol ability for duim samting. Dastawe, taem iumi mas mekem olketa important disison, iumi need for prea lo Jehovah for help, and trustim dat hem savve lo wat nao hem best for iumi.

18. Hao nao iumi savve adjustim tingting blo iumi for garem sem tingting olsem Jehovah?

¹⁸ Iumi hapi tumas dat Jehovah wakem iumi lo wei wea iumi savve showimaot olketa quality blo hem. (Gen. 1:26) Hem tru, hem hard for iumi showimaot olketa quality blo Jehovah lo perfect wei. (Isa. 55:9) Bat olsem Peter, iumi savve adjustim tingting blo iumi for garem sem tingting olsem Jehovah abaotem olketa samting. Iumi savve duim datwan taem iumi gohed garem sem tingting olsem Jehovah, mas hambol, and for garem gudfala tingting.